Nomo Krais lo tahe paꞌare taꞌi aꞌi ironamisiya.
4
Ane Meni Owane Pefine ne tote tawesi umasiteye su, lu tamo ane kalabus wesi sahe fu arowe. Serai Owane Sitewi lai fene lu tewi pefine aꞌi lo heneraiyei ne ariariyeye su, ane fene maꞌe eisiya, fene Owane Sitewi lo yo seni waraꞌi aꞌi pei umasinamite.a 2 Iyape towafi fene lo owe ape ei ani arowete. Ahowa, fene etiri werese sahe eresene aꞌi ironamite. Lu taune maꞌe marepi momotei aꞌi iro tiyatinamite. Fene Krais lo wawesiyeyei se lu taune werese maꞌe au atuatunamite.b 3 Owane Sitewi lo Hepene Waraꞌi aꞌi lai fene werese marepi taꞌi aꞌi au ironamiteye. Serai fene marepi fetane aꞌi iro tiyatinamite. Marepi fetane aꞌi ape lai fene werese nate tawesi tiyatinamisiya.c 4 Owane Sitewi lo lu tewi pefine lo tahe paꞌare taꞌi aꞌi tene. Owane Sitewi lo Hepene Waraꞌi taꞌi aꞌi lai tahe paꞌare ape papu ironamisiya. Sosu Owane Sitewi lai fene Krais lo si tame itorairowa ape, ninaweteyei ne ei ariariyeye. Ninaweteyei ape taꞌi aꞌi ne. 5 Meni Owane Pefine taꞌi aꞌi ne. Nomo werese le ne aꞌi tote tawesiyei taꞌi aꞌi umasinamiteyei. Sosu aiwawe aꞌi nomo saꞌi se ani huwei su, nomo saꞌi se taꞌi aꞌi ani huwei. 6 Owane Sitewi taꞌi aꞌi ne. Le lu taune werese lo Owane Sitewi Tai Pefine aꞌi ne. Le etiri werese werese lo sitewi ne. Aiwawe aꞌi le etiri werese au noweinoweinamisiya. Le etiri werese papu ironamisiya. Serai nomo werese werese marepi taꞌi aꞌi totenamite.d 7 Krais lai nomo taꞌi taꞌi maꞌe ferafereiyei pefine lo neri aꞌi auwe. Le marepi lo se nomo taꞌi taꞌi maꞌe etiri tewi aꞌi ape noneyei ne ariariyeye.e 8 Serai Owane Sitewi lo one towe sahe apou teꞌesiya,“Le omo niꞌarawe hire maꞌe wiye su, le airame tomu neꞌese lo wafei se ereti ti tawesisiya ape, amerame aꞌi hene aitai. Le lu taune maꞌe etiri wisere aꞌi neri aꞌi auwe.” Sng 68:18
9 Peri ape teꞌesiya su, “Le omo niꞌarawe hire maꞌe wiye” peri lo eti piye teꞌesiya awere? Apou aꞌi teꞌesiya, Le tu hi awei maꞌe itorai.f 10 Serai Jisas hi awei maꞌe itorai. Sosu aiwawe aꞌi meni ape omo niꞌarawe hire maꞌe wiye ape, le aꞌi meni ape ne. Le niꞌarawe hire maꞌe aweraꞌiyenatiyewe, omo hire pefine maꞌe wiye. Le hire pefine maꞌe wiye su, le etiri werese werese papu wi temeꞌeriyenamirowa. 11 Sosu Krais lu taune maꞌe etiri wisere aꞌi ape mo neri aꞌi auwe. Etiri wisere aꞌi ape mo kairefi aꞌi apou aꞌi ne. Le lu tamo Owane Sitewi lo peri lu taune maꞌe au teꞌe fiyariyei ne ariariyeye (Aposel). Le lu tamo, etiri nowe meꞌiye su henerairowa ape, au teꞌe areiyeyei ne ariariyeye (Profet). Le lu tamo, lu feni lo au atuatu ferafereirowa ape, ariariyeye (Pasta). Le, lu taune tamo Owane Sitewi lo peri wiyeme aꞌi au teꞌe atuaturowa ape, ariariyeye.g
12 Krais lai kairefi lo ape lu taune maꞌe le ne tote tawesisiya ape, auwe. Kairefi lo ape se, lowe lu taune maꞌe au pati ani tiyatiteye. Aiwawe aꞌi lowe kairefi lo ape se lu taune, le ne tote tawesisiya ape, au kairefiyerowa. 13 Kairefi lo ape, le nomo maꞌe auwe ape, nomo mase ironamirowa. Nowe ape se lu taune werese tote tawesi towafi lowe lo eito aiwawe aꞌi henerai tepaꞌasirowa. Lowe werese Owane Sitewi lo meni eime ne eito aiwawe aꞌi siye soꞌoruwerowa su, nomo werese taꞌi taꞌi aꞌi tote tawesiyei towafi nomo lo erasi pefine aꞌi henerairowa. Sosu yo seni aseyaro waraꞌi pefine aꞌi, Krais papu iro temeꞌeriyesiya ape, nomo siye umasirowa. Serai nomo Krais aiwawe pefine aꞌi henerairowa.h
14 Serai nomo Krais aiwawe pefine aꞌi henerairowa su, nomo eimane osu wou taꞌama. Tote tawesiyei nomo lo wai erasi wou taꞌama. Fiyaru lai wai erasi ape ani awetu awetosiya. Peri heneruwe yahowaꞌi ta lu tamo lai nomo maꞌe au atuatu areiyeyei su, nomo faraꞌu tei kairefiyerowa. Lu ape mo peri heneruwe yahowaꞌi tote tawesisiya ape, lowe marepi wawero lowe lo lu taune marepi au teꞌe tatai anirowa. Apou wou fiyaru lai wai erasi ani aweto awetuteye. Sosu lowe marepi wawero aꞌi lu taune maꞌe au teꞌe arearerowa. 15 Ahowa, nomo peri wiyeme aꞌi lo lu taune ne tote wawesiyeyei se au teꞌe fiyarirowa. Nomo Krais aiwawe aꞌi henerairowa. Meni ape Krais, le aꞌi lai sitewi pefine nomo lo ne. 16 Nomo werese Krais ne tote tawesi umasisiya ape, kairefi lo unahi sahe ironamisiya. Nomo werese taꞌi taꞌi aꞌi taꞌuwe nate tawesi tiyatisiya. Nomo taꞌi taꞌi aꞌi lai lu taune ani pati tiyatisiya. Nomo wiyawi towafi nomo lo irowei su, Owane Sitewi lo lu feni pefine aꞌi kairefi erasi aꞌi henerairowa. Sosu nomo werese marepi tote wawesiye tiyatirowa.i
Yo seni aseyaro aꞌi umasinamite.
17 Ane fene maꞌe Meni Owane Pefine lo iyape se au teꞌesiya. Fene werese weiyai! Lu taune Jisas ne tote tawesiteye taꞌame ape, lowe yo seni luwaru ironamisiya. Serai fene yo seni luwaru aꞌi apou ape lowe lo owe ape umasite. Marepi lowe lo yahowaꞌi totesiya.j 18 Lowe Krais lo marepi siye soꞌoru taꞌama. Lowe apaniye towafi lowe lo au anite tawesisiya. Marepi lowe lo au anite tawesisiya. Serene lowe Krais lo peri wiyeme aꞌi wanurowata. Serai lowe marepi hepene heꞌi aꞌi Owane Sitewi lai ausiya ape, anirowata. 19 Lowe marepi atoweiye neritaseye te taꞌame. Sosu lowe marepi lowe lo se tafaꞌe yo seni luwaru aꞌi ironamisiya. Mi mi weriyei weriyei lowe yo seni luwaru aꞌi apou ape iroteyei ne totenamisiya. Lowe etiri maꞌaru siye wisereyenamisiya. 20 Ahowa, fene yo seni apou ape tote umasiteye. 21 Fene peri pefine aꞌi, Jisas sahe ironamisiya ape, wanu umasiye su, lu tamo fene maꞌe yo seni waraꞌi aꞌi lo au teꞌe atuatuwe su, fene Krais ne tote tawesinamisiya. 22 Lowe fene maꞌe peri pefine aꞌi au atuatuwe su, fene marepi hepene weriyei fa arunatire. Fene aiwawe aꞌi yo seni luwaru aꞌi, fene tu naifa ironamiteye ape, fa arunatire. Fene yo seni luwaru aꞌi ironamiyei su, marepi hepene weriyei aiwawe aꞌi luwaru erasi pefine aꞌi henerairowa. Yo seni luwaru aꞌi lu taune werese ironamisiya ape, yo seni ape lai marepi towafi lowe lo arearenamiteye.k 23 Ahowa, lu tamo Krais lo peri heneruwe wisere aꞌi fene maꞌe au atuatuteyei su, fene marepi seni fene lo heꞌi aꞌi fa heneraire.l 24 Marepi hepene heꞌi aꞌi, Owane Sitewi lai taꞌane ape, fene maꞌe fa heneraire. Marepi hepene heꞌi aꞌi ape Owane Sitewi pefine aiwawe wou aꞌi ne. Le aꞌi lai meni aseyaro waraꞌi aꞌi ne. Yo seni lo wisere aꞌi tene. Serai fene aiwawe aꞌi yo seni aseyaro wisere aꞌi fa heneraire.m
25 Serene fene mi mi weriyei peri wawero owe ape au teꞌete. Nomo werese taꞌi taꞌi aꞌi Krais lo lu tewi taꞌi aꞌi ne. Sosu tahe paꞌare tewi aꞌi lo ne. Serai fene peri wiyeme aꞌi lu taune tereꞌe maꞌe teꞌe tiyatite.n
26 “Fene ai marepi toteyei su, yo seni luwaru aꞌi owe ape irote.” Sng 4:4
Poweiye itoweriyei su, ai marepi fene lo tote iꞌane arunatire. Ai marepi fene lo mase owe ape tote howeite.o 27 Sepei luwaru aꞌi, iyape Satan, fene au ani luwaruweyei ne totenamisiya. Serene fene yo ta le maꞌe fene au luwaruweyei ne owe ape aure! 28 Meni ta etiri tamo taꞌarei aniyei su, le taꞌarei lo yo seni fa arunatite. Sosu le wiyawi farere aꞌi fu ironamite. Le ereti lo se wiyawi taꞌanerowa su, le faraꞌu etiri tamo lu taune ariye aꞌi maꞌe faraꞌu au isafiye nonetorowa. 29 Fene peri teꞌeyei su, peri luwaru aꞌi owe ape teꞌete. Ahowa, lu taune marepi orese se fene peri wisere aꞌi lowe maꞌe au teꞌere. Fene peri wisere aꞌi au teꞌeyei su, fene tote tawesiyei lowe lo au kairefiyerowa. Sosu lu taune fene lo peri wanuwei su, fene lo peri ape lowe maꞌe au pati ferafereirowa.p 30 Fene Owane Sitewi lo Hepene Waraꞌi aꞌi ape maꞌe marepi orese se owe aute. Le fene papu ironamisiya. Fene Krais ne tote tawesiye su, fene Krais mase natenamiteye. Owane Sitewi lai Hepene Waraꞌi aꞌi lo fene maꞌe auwe. Serai le fene werese mase mi mi weriyei weriyei ironamitorowa. Le lai fene Krais mase wafei wou ti nate tawesinamisiya. Serai nowe yeꞌewi se, Jisas si tame itorairowa su, lu taune le fisaꞌi lo se eteye ape, le omo hire maꞌe hene wirowa.q 31 Fene ai marepi orese aꞌi owe ape totenamite. Aiwawe fene ai peri erasi owe ape au teꞌete. Fene lu taune maꞌe ai marepi fene lo owe ape au atuatunamite. Fene peri erasi ai marepi se owe ape hare teꞌete. Fene peri luwaru aꞌi lu taune maꞌe au luwaruweyei ne owe ape teꞌete. Sosu aiwawe aꞌi fene yo seni luwaru aꞌi owe ape ironamite.r 32 Fene marepi wisere aꞌi Owane Sitewi lo lu taune maꞌe iro tiyatinamite. Lowe maꞌe marepi tote wawesiye tiyatinamite. Owane Sitewi lai Krais se yo seni luwaru aꞌi fene lo tote iꞌaneyewe, ani sasarisawi. Serene lu taune tamo fene maꞌe au luwaruweyei su, fene yo seni luwaru aꞌi lowe lo fa tote iꞌanenamite.s