Mi mi werese Owane Sitewi lo yo seni waraꞌi aꞌi umasinamite.
5
Fene Owane Sitewi lo eimane pefine aꞌi ne. Le fene marepi erasi aꞌi tote wawesiyenamisiya. Serene Owane Sitewi lo yo seni werese ne, fene lai yo seni apou aiwawe umasinamite.a 2 Mi mi weriyei lu taune maꞌe marepi wawesiyeyei au atuatunamite. Krais nomo maꞌe marepi erasi aꞌi tote wawesiyeteye su, fene lu taune tereꞌe maꞌe tote wawesiyenamite. Krais lai nomo ne au temeniyeye. Le me tapeꞌi sahe temeniyeye su, le Owane Sitewi lo au heseyei heneri wisere aꞌi le maꞌe henerai. Serai Owane Sitewi le ne marepi wisereye nineꞌinamisiya.b 3 Tafaꞌe yo seni luwaru aꞌi fene mase owe ape ironamite. Aiwawe aꞌi fene yo seni unou aꞌi apou ape owe ironamite. Fene etiri werese owe ape siye wisereyenamite. Owane Sitewi lo lu tewi pefine aꞌi etiri werese apou ape mo, lowe fa owe ape irote. Etiri werese ape mo luwaru aꞌi tene. 4 Aiwawe aꞌi fene peri luwaru aꞌi owe ape teꞌenamite. Fene peri meremereye aꞌi owe ape teꞌete. Peri neritase luwaru aꞌi owe ape teꞌete. Ahowa, fene mi mi weriyei Owane Sitewi maꞌe au teꞌe wisereyenamite. 5 Peri ano wanu etite. Peri ano wiyeme aꞌi tene. Owe meni ta tafaꞌe yo seni luwaru aꞌi irowei su, le Krais, sosu Owane Sitewi lo omo sahe yaru topo lo wi onurowata. Aiwawe aꞌi lu taune ta yo seni unou aꞌi irowei su, etiri maꞌaru siye wisereyeyei su, lowe Owane Sitewi lo omo hire maꞌe siyerirowata. Meni ta etiri maꞌaru siye wisereyeyei su, le god wawero ne au teꞌe nineꞌi wisereyerowa.c 6 Lu tamo peri yahowaꞌi fene maꞌe owe ape teꞌe arearete. Peri yahowaꞌi aꞌi ape mo ne, Owane Sitewi lo ai peri erasi lu taune maꞌe, peri lowe lo umasisiya ape, itorai.d 7 Serai fene peri wawero werese aꞌi lowe lo owe ape wanu umasinamite. 8 Tu naifa fene yo seni luwaru aꞌi ironamiteye.Serene fene pasi aꞌi marepi hepene fene lo papu temeꞌeriyeteye. Ahowa, pereye fene meni owane pefine ne tote tawesi umasisiya su, Owane Sitewi lo mitaiyeyei erasi marepi hepene fene lo papu au temeꞌeriyenamisiya. Serene fene yo seni aseyaro aꞌi fa umasinamite. Fene Owane Sitewi lo eimane pefine aꞌi mitaiyeyei lo umasisiya ape wou heneraire.e 9 Mitaiyeyei ape papu etiri hesi heta irosiya. Etiri wisere werese aꞌi ne, sosu yo seni waraꞌi aꞌi ne, sosu peri wiyeme aꞌi ne. 10 Etiri werese ape ne fene Meni Owane Pefine marepi au nineꞌisiya ape, fene siye soꞌoruwete. Serai fene etiri ape mo ironamite. 11 Yo seni luwaru aꞌi ape mo lu taune pasi aꞌi se irosiya ape, fene owe ape ironamite. Ahowa, fene yo seni luwaru aꞌi ape mo amerame aꞌi au teꞌe areiyete. 12 Yo seni luwaru aꞌi ape mo ne, lu taune eresene aꞌi fareyare irosiya ape, fene owe ape teꞌe tiyatite. Peri apou ape neritase aꞌi tene! 13 Ahowa, mitaiyeyei ape henerairowa su, etiri werese amerame aꞌi henerairowa. Etiri werese fene siyesiya ape, mitaiyeyei ape sahe heneraisiya.f 14 Serene Owane Sitewi lo peri apou teꞌesiya,
“Fene nihe howeisiya ape, nihe petenere. Fene temeniyesiya ape, si norohuwe sinere! Sosu Krais fene maꞌe tei mitaiyerowa.” Ais 26:19
15 Serai etiri werese fene irowei ape, Weiyai! Etiri ape mo lu taune marepi luwaru aꞌi se irosiya ape, fene etiri apou ape owe ape ironamite. Ahowa, fene yo seni farere aꞌi tote umasinamite. Lu taune marepi wisere aꞌi totesiya ape, lowe yo seni aseyaro waraꞌi aꞌi ironamisiya. 16 Nowe mi mi werese lu taune yo seni luwaru aꞌi ironamisiya. Serene fene yo seni luwaru werese aꞌi fa arunatite. Sosu yo seni aseyaro aꞌi ironamite.g 17 Serai fene marepi meremereye aꞌi owe ape irote. Ahowa, Meni Owane Pefine lo marepi werese aꞌi fene lai fa siye soꞌoruwete. 18 Saꞌi meremereye aꞌi owe ape a temeꞌeriyenamite. Fene saꞌi meremereye aꞌi anamiyei su, yo seni fene lo aiwawe aꞌi meremereye aꞌi henerairowa. Saꞌi meremereye aꞌi lai marepi hepene fene lo au luwaruwerowa. Ahowa, fene Owane Sitewi lo Hepene Waraꞌi aꞌi marepi hepene fene lo papu fa wi temeꞌeriyenamite.h 19 Fene yakowei ahi apou ape au teꞌe nineꞌi tiyatite. Peri nineꞌi ape mo meni owane tutawe, Devit, Owane Sitewi maꞌe leseye ape, au teꞌe nineꞌite. Yakowei ahi tamo marepi hepene aseyaro aꞌi papu irosiya ape, teꞌe tiyatite. Aiwawe aꞌi yakowei ahi Owane Sitewi lo Hepene fene maꞌe auwe ape, au teꞌe tiyatite. Fene noꞌu nineꞌiyei ape marepi fene lo papu Meni Owane Pefine maꞌe au teꞌenamite.i 20 Meni Owane Jisas Krais lo iyape se, mi mi weriyei Owane Sitewi Owane Sitewi Tai Pefine aꞌi maꞌe etiri werese werese au teꞌe wisereyenamite.j 21 Fene Krais ne marepi erasi aꞌi tote wisereyesiya. Serene fene lu taune marepi taꞌi aꞌi totenamite.k
Lu taune maꞌe naitusiya ape, ane fene maꞌe teꞌesiya.
22 Taune, fene Meni Owane Pefine tote umasisiya ape, fene meni towafi fene lo saro unahi ironamite.l 23 Krais lai lu tewi pefine aꞌi lo sitewi ironamisiya. Apou aiwawe aꞌi meni ta tani lo sitewi ironamisiya. Lu tewi pefine aꞌi lo lai Krais lo tahe paꞌare ne. Le lu tewi pefine aꞌi lo marepi hepene heꞌi aꞌi auwe.m 24 Lu taune Krais ne tote tawesisiya ape lowe kairefi lo unahi ironamisiya. Serene aiwawe aꞌi taune, fene meni towafi fene lo etiri werese se saro unahi ironamite.
25 Ane lu maꞌe taune naitusiya ape, au teꞌesiya. Krais lai lu tewi pefine aꞌi ne au temeniyeye. Serene le lowe ne marepi erasi aꞌi tote wawesiyenamisiya. Fene taune fene lo ne aꞌi marepi tote wawesiyenamite.n 26 Le lu tewi pefine lo ne aseyaro waraꞌi aꞌi irowei ne temeniyeye. Serene nomo yo seni luwaru aꞌi arunatiyewe, yo seni aseyaro aꞌi ironamisiya. Krais lai Owane Sitewi lo peri pefine aꞌi se lu tewi pefine lo au ani aseyaroweye. Apou wou aꞌi meni ta saꞌi se ani huwe.o 27 Krais lu tewi pefine lo ne temeniyeye su, le lu taune le ne tote tawesisiya ape, le maꞌe taꞌuwe hene anirowa. Lu tewi pefine aꞌi lo tani naituwei lo wou aꞌi ne. Tani naituwei lo mitaiyeyei erasi aꞌi henerairowa. Le yo seni marepi luwaru aꞌi apou ape irorowata. Ahowa, le yo seni marepi aseyaro waraꞌi aꞌi ironamitorowa.p 28 Serene lu werese taune towafi lowe lo maꞌe marepi erasi aꞌi apou aiwawe aꞌi tote wawesiyenamite. Lowe taune towafi lowe lo maꞌe tahe paꞌare towafi lowe lo aiwawe aꞌi tote wawesiyesiya. Meni ta ape tani lo tote wawesiyesiya ape, le tahe paꞌare topo lo aiwawe aꞌi tote wawesiyesiya. 29 Owe meni ta lai tahe paꞌare topo lo ai marepi totenamirowata. Ahowa, le tahe paꞌare topo lo au noweinoweinamirowa. Le aiwawe aꞌi ayei ta tahe paꞌare au ene arowa. Sosu apou aiwawe aꞌi Krais lai lu tewi pefine aꞌi lo maꞌe au noweinoweinamirowa. 30 Serai nomo werese taꞌi taꞌi tewi aꞌi tahe paꞌare lo irosiya su, le nomo ne au noweinoweinamisiya. 31 Owane Sitewi lo one towe apou teꞌesiya.
“Serai meni ta tai mai topo lo arunatirowawe, tani topo lo maꞌe nate tawesi naiturowa. Lowesi tahe paꞌare taꞌi aꞌi henerairowa.” Stt 2:24
32 Peri ape fareyareteye ape erasi pefine aꞌi henerai. Wanu etire! Peri pefine aꞌi ape ane fene maꞌe au teꞌesiya ape apou aꞌi ne. Lu tewi pefine aꞌi lo, lowe Krais lo tahe paꞌare pefine aꞌi ne.q 33 Ahowa, fene werese taꞌi taꞌi tani towafi fene lo maꞌe marepi erasi aꞌi tote wawesiyenamite. Le tahe paꞌare topo lo maꞌe tote wawesiyesiya ape aiwawe aꞌi ne. Sosu aiwawe aꞌi tani lo lai meni topo lo ne erasi aꞌi fa tote wisereyenamite.