Ane eimane, mai tai aiwawe aꞌi maꞌe teꞌesiya.
6
Ane eimane werese maꞌe teꞌesiya. Fene Meni Owane Pefine tote tawesisiya ape, tai mai fene lo, lo peri wanu umasite. Fene peri lowesi lo wanu umasiyei su, yo seni fene lo farere aꞌi ne.a 2 Owane Sitewi lo yo peri wiyeme aꞌi Moses leseye ape apou teꞌesiya.“Tai mai fene lo, fene iyape lowe lo ei ani arowete.” Kis 20:12
Owane Sitewi lai yo peri lo ape au teꞌeye su, le peri teꞌe naneiyei ta aiwawe teꞌeye. Le yo peri tutawe lo ape, peri teꞌe naneiyei ta iroteye ape, au teꞌeye. 3 Teꞌe naneiyei ape apou aiwawe aꞌi ne.
“Fene tai mai lo peri wanu umasiyei su, etiri werese fene irowei ape, wisere aꞌi henerairowa. Sosu fene iyu menei tomu neꞌese hi awei sato ironamirowa.” Lo 5:16
4 Ane tai maꞌe teꞌesiya. Yo seni luwaru aꞌi eimane fene lo maꞌe owe ape irote. Serai lowe fene maꞌe ai marepi toterowa. Ahowa, fene meni owane pefine lo marepi umasinamite. Fene Meni Owane Pefine lo marepi umasiyei su, fene eimane fene lo maꞌe yo seni aseyaro aꞌi au atuatu areiyerowa. Fene lowe maꞌe yo seni aseyaro aꞌi atuatuteyei su, lowe yo seni aseyaro aꞌi fene lo siye tote umasirowa.b
Ane wiyawi yahowaꞌi lu maꞌe au teꞌesiya.
5 Ane wiyawi yahowaꞌi taꞌane siye lu maꞌe teꞌesiya. Fene hi awei sato irosiya su, fene meni owane fene lo, lo peri wanu umasinamite. Fene peri lowe lo arisiyei su, lowe fene ne ai marepi toterowa. Serai fene lowe ne erasi aꞌi auseriye atoweiyerowa. Fene wiyawi lowe lo taꞌaneyei su, fene wiyawi lowe lo ape marepi pefine aꞌi se fa taꞌanete. Apou aiwawe aꞌi fene Krais lo wiyawi taꞌanerowa.c 6 Wiyawi werese ape fene meni owane fene lo ne, irowei ape, wiyawi wisere pefine aꞌi ironamite. Le fene siyeteyei su, fene wiyawi wisere aꞌi irote. Aiwawe aꞌi le eyeri maꞌe iyei su, ne wiyawi onotaꞌano aꞌi owe ape ironamite. Fene Krais lo peri wanu umasisiya su, fene Krais lo wiyawi yahowaꞌi taꞌane siye lu henerai. Serai fene Owane Sitewi lo marepi wanu umasite. Marepi kairefi aꞌi fene lo se, fene Owane Sitewi lo marepi umasinamite. 7 Fene wiyawi fene lo taꞌaneteyei su, fene marepi nineꞌi wisereyete. Fene wiyawi taꞌaneteyei su, fene apou totete. “Ane Meni Owane Pefine ne wiyawi ape au taꞌaneteyei. Ane wiyawi taꞌaneteyei su, ane wiyawi ape lu tamo maꞌe au nineꞌiyei ne taꞌanerowata.” 8 Fene etiri ape apou siye soꞌoruwesiya. Meni Owane Pefine lai lu taune werese maꞌe wiyawi wisere aꞌi iroteye ape, le etiri wisere aꞌi ta lowe maꞌe itiyaꞌu aurowa. Wiyawi yahowaꞌi taꞌane siye lu, sosu lu taune tereꞌe maꞌe le lowe maꞌe aiwawe aꞌi aurowa.d
Wiyawi yahowaꞌi siye lu lo owane maꞌe au teꞌesiya.
9 Lu owane, ane peri ta fene maꞌe teꞌesiya. Apou aiwawe aꞌi fene wiyawi yahowaꞌi taꞌane siye lu fene lo maꞌe yo seni wisere aꞌi ironamite. Fene lowe maꞌe owe ape au teꞌe atoweiyete. Fene peri ape soꞌoruwe tepaꞌasiye. Meni owane fene lo omo hire maꞌe irosiya. Sosu wiyawi yahowaꞌi taꞌane siye lu lo Meni Owane Pefine aiwawe aꞌi omo hire maꞌe irosiya. Meni Owane Pefine ape lu taune werese werese aꞌi maꞌe yo seni taꞌi aiwawe aꞌi au atuatunamisiya.e
Fene ai atu lo ipari tahe kairefi aꞌi ani asite.
10 Peri yeꞌewi ane fene maꞌe eisiya. Meni Owane Pefine sahe tei kairefiyete. Kairefi erasi pefine aꞌi lo se, fene tei kairefiyete. 11 Owane Sitewi lo ai atuwei lo ipari tahe werese ani asire. Fene Owane Sitewi lo ai atuwei lo ipari tahe ani asiyei su, fene faraꞌu sepei Satan lo marepi areareye ape maꞌe ai atu tiyatirowa.f 12 Nomo ai atuwei su, nomo awei lo lu se ai atu tiyati taꞌame. Ahowa, nomo sepei kairefi luwaru werese aꞌi mo maꞌe ai atu tiyatinamisiya. Sosu sepei Satan lo lu feni pasi aꞌi ironamisiya ape, nomo lowe maꞌe ai atu tiyatisiya. Aiwawe aꞌi nomo sepei kairefi werese aꞌi maꞌe, marepi luwaru aꞌi ironamisiya ape, ai atu tiyatinamisiya.g 13 Serene fene Owane Sitewi lo ai atuwei lo ipari tahe kairefi werese aꞌi fa ani asinamite. Serai nowe luwaru aꞌi ape henerairowa su, fene faraꞌu tei kairefiyenamirowa. Sosu fene ai atuwei ape tepaꞌasiyei su, fene saro aꞌi tei kairefiyenamirowa. 14 Serai fene tei kairefiyenamite. Lire fene lo lire wafei se ti tawesire. Lire wafei ape apou aiwawe aꞌi peri pefine aꞌi ne. Metete fene lo sahe uperi ta ani asire. Uperi ape apou aiwawe aꞌi yo seni aseyaro aꞌi ne.h 15 Lowe tahe lowe fene lo sahe ani asire. Lowe tahe ape apou aiwawe aꞌi ne. Owane Sitewi lo marepi fetane aꞌi lo peri heneruwe ape lai fene Owane Sitewi lo peri au teꞌeyei ne au pati anirowa.i 16 Ereti fene lo se tiye kairefi aꞌi anite teite. Tiye ape apou aiwawe aꞌi ne. Owane Sitewi ne tote tawesiyei ne. Fene tiye ereti fene lo se anite teiyei su, sepei Satan luwaru aꞌi lai fene maꞌe eine yehe werese aꞌi nei tawesirowata. 17 Fene Krais ne tote tawesi umasisiya su, Owane Sitewi lai yo seni luwaru werese aꞌi fene lo au sasari poꞌutesawi. Marepi hepene heꞌi aꞌi fene lo ape, mato sahe ani asire. Mato tuhe kairefi aiwawe aꞌi ne. Ereti fene lo sahe Owane Sitewi lo Hepene Waraꞌi aꞌi lo ipari meneꞌe pite aꞌi anitete. Ipari meneꞌe ape apou aiwawe aꞌi, Owane Sitewi lo peri pefine werese aꞌi ne.j 18 Mi mi weriyei weriyei Owane Sitewi lo Hepene Waraꞌi aꞌi se, fene Owane Sitewi maꞌe teꞌe tiyatinamite. Fene Owane Sitewi maꞌe teꞌe tiyatirowa su, peri tereꞌe tereꞌe se au teꞌe towerite. Etiri ta fene poꞌuteyei su, fene Owane Sitewi maꞌe teꞌe towerire. Mi mi weriyei fene sepei Satan, weiyai! Fene mi mi weriyei fene owe ape taꞌorete. Mi mi weriyei fene Owane Sitewi lo lu tewi pefine aꞌi ne Owane Sitewi maꞌe au teꞌe towerinamite.k
19 Sosu aꞌi pe fene ane ne Owane Sitewi maꞌe teꞌe towerinamite. Ane Owane Sitewi lo peri au teꞌe fiyarirowa su, le lai peri wiyeme aꞌi lo ane maꞌe au teꞌeyei ne aurowa. Serai ane lu taune maꞌe Owane Sitewi lo peri heneruwe Krais ne, au teꞌe areiyerowa. Peri heneruwe lo ape ane au teꞌerowa su, ane tote atoweiyerowata.l 20 Owane Sitewi lai ane maꞌe peri heneruwe lo ape au teꞌe fiyariyei ne ariariyeye. Pereye ane kalabus wesi sahe irosiya. Sosu ane lu taune maꞌe Owane Sitewi lo peri au teꞌesiya. Serai fene ane ne Owane Sitewi maꞌe teꞌe towerite. Sosu ane Owane Sitewi lo peri au teꞌe fiyariyei su, ane tote atoweiyerowata. Ahowa, ane peri lo au teꞌe fiyari areiyerowa.m
Pol lu taune maꞌe au teꞌe eritesawi.
21 Ane fene maꞌe meni Tikikus eimawesawirowa. Nomo le ne marepi erasi aꞌi tote wawesiyesiya. Le aiwawe aꞌi Krais lo lu feni pefine aꞌi ne. Le mi mi weriyei Meni Owane Pefine lo wiyawi taꞌanenamisiya. Le fene maꞌe heneriyei su, le etiri werese ne, ane maꞌe henerai ape, fene maꞌe au teꞌerowa. Sosu etiri werese ane taꞌaneteye ape, fene wanu tote soꞌoruwerowa.n 22 Serene ane meni ape fene maꞌe eimawesawirowa. Serai fene etiri werese ane sosu lu feni ano, sahe henerai ape, wanu soꞌoruwerowa. Aiwawe aꞌi le lai marepi fene lo maꞌe marepi wisere fetane aꞌi au teꞌerowa.
23 Sosu aꞌi pe ane Owane Sitewi maꞌe apou ei towerisiya. Tai, sosu Meni Owane Jisas Krais, lowesi fene maꞌe le ne tote tawesisiya ape, marepi fetane aꞌi sosu tote wawesiyeyei lowesi lo fene maꞌe aurowa. 24 Owane Sitewi lo ferafereiyei lu taune maꞌe Owane Jisas Krais nomo lo ne tote wawesiyenamisiya ape, ironamitorowa. Tote wawesiyeyei ape mi mi pasi pasi weriyei luwaruwe poꞌuterowata. Ane, Pol, one towe eite fene maꞌe lese ausawiyei.