3 Ane fene ne totenamiyei su, ane Owane Sitewi Pefine maꞌe fene ne au teꞌe nineꞌi wisereyenamisiya. 4 Sosu ane fene ne Owane Sitewi maꞌe mi mi weriyei ei towerisiya su, ane marepi nineꞌi wisereyeyei se au tote ei towerinamisiya. 5 Tu naifa ane Jisas Krais lo peri heneruwe wisere aꞌi au teꞌe fiyariteye su, fene aiwawe ane mase wiyawi lo au taꞌaneteye. Ane nowe tutawe fene maꞌe henerai su, fene Meni Owane Krais lo peri tote tawesiteye. Sosu pereye nowe eite se fene aiwawe ane mase wiyawi lo au taꞌaneteye. Serai ane fene ne Owane Sitewi maꞌe au teꞌe nineꞌi wisereyenamisiya. 6 Owane Sitewi lai wiyawi heꞌi wisere aꞌi lo ape fene maꞌe au taꞌane atuatu areiyeteye. Nowe meꞌiye su Krais Jisas si tame itorairowa su, le fene maꞌe wiyawi wisere aꞌi taꞌane tepaꞌasirowa. Etiri ape ane soꞌoruwesiya tene!^b 7 Mi mi weriyei weriyei ane fene ne totenamisiya. Marepi ano farere aꞌi ne. Serai ane faraꞌu fene ne totenamisiya. Piyene awere? Ane marepi ano sahe fene ne weriyei weriyei totenamisiya. Ane kalabus wesi sahe iroteye su, fene lai ane ne Owane Sitewi lo ferafereiyei ape au atuatuteye. Nowe meꞌiye su, lowe ane kalabus wesi nowe maꞌe hene arosai su, ane Krais lo peri heneruwe wisere aꞌi au teꞌe areiyeteye. Fene ane mase wiyawi lo taꞌanenamiteye. Owane Sitewi lo ferafereiyei se, le wiyawi ape nomo maꞌe auwe. Serai ane Owane Sitewi lo peri lu taune maꞌe au teꞌe kairefiyeteye su, ane peri heneruwe lo wiyeme pefine aꞌi au atuatu areiyeye. Owane Sitewi lo ferafereiyei ape lai fene ane aiwawe aꞌi ironamiteye. 8 Ane marepi erasi aꞌi fene ne tote wawesiyenamisiya. Serai Owane Sitewi lai marepi ano siye soꞌoruwe tepaꞌasiye. Tote wawesiyeyei ano fene werese ne meni Owane Krais lo marepi erasi pefine aiwawe wou aꞌi totenamisiya.

9 Ane fene ne Owane Sitewi maꞌe apou au ei towerinamisiya. Marepi wawesiyeyei fene lo mi mi werese erasi aꞌi henerairowa. Sosu marepi wawesiyeyei fene lo lu taune maꞌe au atuatu tiyatirowa. Sosu aiwawe aꞌi Owane Sitewi lai marepi wisere aꞌi fene maꞌe aurowa. Sosu etiri werese lo si tewi ape mo fene lai siye soꞌoruwe ereirowa. 10 Ane fene ne Owane Sitewi maꞌe apou au ei towerisiya. Fene yo seni aseyaro waraꞌi aꞌi sosu awei lo yo seni luwaru aꞌi siye eti areiyerowa. Fene yo seni apou ape siyerowa su, fene yo seni aseyaro waraꞌi aꞌi fu umasinamite. Serai nowe meꞌiye ape su, Krais si tame itorairowa su, fene marepi hepene fene lo aseyaro waraꞌi aꞌi ironamitorowa.^c 11 Sosu aiwawe aꞌi ane Owane Sitewi maꞌe fene ne ei towerisiya. Marepi hepene fene lo yo seni aseyaro waraꞌi aꞌi temeꞌeriyeyei. Jisas Krais lai yo seni aseyaro waraꞌi aꞌi ape mo fene maꞌe au ironamisiya. Fene yo seni apou ape irowei su, fene Owane Sitewi lo iyape pefine aꞌi ei ani arowerowa. Serai fene lai Owane Sitewi maꞌe au teꞌe nineꞌi wisereyerowa.

12 Kaiyemo mo ano, etiri luwaru aꞌi tamo ane maꞌe henerai su, ane fene maꞌe au teꞌe areiyesiya. Fene wanu soꞌoruwere. Etiri werese ape mo ane maꞌe henerai ape, Owane Sitewi lo peri heneruwe wisere erasi aꞌi henerai. Serai lu taune tomu neꞌese peri lo ape wanu tote tawesiteye. 13 Ane Jisas lo peri tote tawesi umasinamisiya. Ane Owane Sitewi lo peri au teꞌe areiyeteye su, lu tamo lai ane kalabus wesi papu maꞌe henetiyewe ani fu arowe. Ai lu werese Rom lo meni owane tutawe iyape Sisar au noweinoweisiya ape, lowe ane kalabus wesi sahe irosiya ape, lo yo sitewi siye soꞌoruwesiya. Lu taune tereꞌe tereꞌe aiwawe aꞌi lowe ane kalabus wesi sahe irosiya ape, lo yo sitewi wanu soꞌoruwesiya.^d 14 Ane kalabus wesi sahe irosiya. Owane Sitewi lai ane au noweinoweinamisiya. Serai lu taune tomu neꞌese Owane Sitewi lo peri tote tawesi umasisiya ape, Owane Sitewi lo ferafereiye ane ne siyeye su, tote tawesiyei lowe lo kairefi aꞌi iroteyewe, lowe mi mi weriyei lu taune maꞌe Krais lo peri heneruwe wisere aꞌi au teꞌe areiyeteyei. Lowe atoweiye te taꞌame. 15 Wanure! Lu tamo Owane Sitewi lo peri au teꞌesiya ape, lowe ane maꞌe ai marepi totenamisiya. Aiwawe aꞌi lowe ane maꞌe ai peri teꞌe teꞌe tiyatiteye. Ahowa, lu tamo tereꞌe Owane Sitewi lo peri au teꞌesiya ape, lowe lu taune werese lo tote tawesiyei fa kairefiyeye ne totesiya. 16 Lowe lu taune maꞌe marepi erasi aꞌi tote wawesiyenamisiya. Serai lowe lu taune maꞌe Meni Krais ne au teꞌe areiyesiya. Owane Sitewi lai wiyawi ape ane maꞌe auwe. Sosu lowe ane ne siye soꞌoruwesiya. Lu taune tamo peri wawero au teꞌeteye su, ane peri lowe lo au teꞌe fareraiyeteye. 17 Lu tereꞌe tamo lai marepi luwaru aꞌi se meni Krais lo peri au teꞌesiya. Lowe iyape towafi lowe lo erasi au teꞌe nineꞌi arowesiya. Marepi sitewi lowe lo luwaru aꞌi ne. Ane kalabus wesi sahe irosiya su, lowe ane ne marepi orese aꞌi irowei ne totesiya.

18 Fene wanure! Lowe ane maꞌe marepi orese aꞌi irowei ne toteyei su, wisere aꞌi ne. Serai etiri tutawe ane marepi sahe irosiya ape, apou ape ne. Lowe Krais lo peri heneruwe wisere aꞌi au teꞌesiya. Meni ta Krais lo peri marepi luwaru aꞌi se au teꞌesiya su, ane marepi orese se taꞌama. Aiwawe aꞌi meni ta marepi wisere aꞌi se Krais lo peri au teꞌe fiyariyei su, ane marepi wisere aꞌi tote nineꞌinamisiya. Ei, ane mi mi weriyei marepi wisere aꞌi tote terite nineꞌinamisiya. 19 Fene Owane Sitewi maꞌe ane ne au pati aniyei ne teꞌe towerinamisiya. Serai Jisas Krais lo Hepene Waraꞌi aꞌi ane maꞌe au pati ani tei kairefiyesiya. Serai ane etiri ta soꞌoruwesiya. Etiri luwaru orese aꞌi eite ne, kalabus wesi sahe teritesiya ape, Owane Sitewi lai ane kalabus wesi nowe maꞌe au toso henerairowa. Ane nowe maꞌe heneraiyei su, ane marepi tahe wisere fetane aꞌi teritetorowa.^e 20 Ane etiri ta marepi erasi pefine aꞌi totenamisiya. Nowe mi mi weriyei, sosu pereye nowe eite se, etiri werese ane irowei ape, ane Krais lo yo seni ne neritaseyerowata. Ane Owane Sitewi maꞌe apou ei towerisiya. Ane hepene se irosiya su, ane temeniyeyei su, ane mi mi weriyei marepi kairefi aꞌi teinamirowa. Ane awei sahe irosiya su, ane lu taune werese maꞌe Krais lo kairefi ane mase ironamisiya ape, au teꞌe atuatu areiyerowa.

21 Mi mi pasi pasi aꞌi ane hepene se irosiya su, ane meni Krais ne totenamisiya. Serai ane temeniyeyei su, ane marepi wisere aꞌi tote nineꞌirowa. Piyene awere? Ane Krais mase mi mi pasi pasi weriyei ironamitorowa.^f 22 Ei, ane hepene se sato irorowa su, ane Meni Owane Krais lo wiyawi au taꞌanenamirowa. Ane eiwerou irorowa awere? Ane soꞌoru taꞌama. 23 Ane piye marepi tote umasirowa awere? Etiri kairefi aꞌi tene! Ane soꞌoru taꞌama. Ane awei sahe sato arunatiyei ne totesiya su, sosu mi mi pasi pasi weriyei Krais mase ironamitorowa. Etiri ape wisere pefine aꞌi tene!^g 24 Ahowa. Serai marepi tutawe ano apou totesiya. Ane awei sahe iroteyei su, ane faraꞌu fene maꞌe au pati ferafereiterowa. 25 Ane soꞌoruwe tepaꞌasiye. Ane fene mase wiyawi ta pati taꞌaneyei ne tote kairefiyesiya. Serai ane awei sato fene mase au pati ferafereiyei ne irotorowa. Ane tote tawesiyei fene lo au nineꞌi kairefiyerowa. 26 Serai ane fene maꞌe si tame henerairowa su, fene Krais Jisas maꞌe tote nate anite tawesinamiteye. Fene ane ne marepi erasi aꞌi tote wisereyerowa.

27 Serai ane fene maꞌe teꞌesiya. Wanure! Fene yo seni aseyaro waraꞌi fa ironamite. Serai fene Krais lo peri heneruwe wisere aꞌi au neritaseyetorowata. Sosu ane fene maꞌe heneraiyei su, ane yo seni aseyaro aꞌi fene lo ne wanurowa. Sosu aiwawe aꞌi ane pani eyeri maꞌe irorowa su, ane yo seni aseyaro aꞌi fene lo wanurowa. Ane fene ne apou wanurowa. Fene Meni Owane Krais maꞌe tei kairefiye natenamisiya. Fene marepi taꞌi aꞌi se Krais lo wiyawi au taꞌanesiya. Sosu fene werese aiwawe aꞌi tote tawesiyei lo peri heneruwe wisere aꞌi au teꞌe fiyari areiyesiya.^h 28 Fene tote tawesiyei fene lo tei kairefiyeyei su, fene airame fene lo werese ne atoweiyerowata. Lowe etiri luwaru ape mo fene maꞌe au luwaruwerowa. Fene airame fene lo marepi kairefi aꞌi fene lo siyeyei su, lowe fene ne apou siye soꞌoruweyei. Owane Sitewi lai fene maꞌe au ferafereirowa. Sosu fene lai lu luwaru aꞌi ape maꞌe hi ani ararorowa. 29 Serai Owane Sitewi lai fene maꞌe au ferafereiye. Serai fene lai Krais ne tote tawesiye. Fene Krais ne tote tawesisiya su, fene fofowei erasi aꞌi teriterowa. Sosu marepi orese aꞌi fene maꞌe henerairowa. Serai fene Krais ne tote tawesiyei su, sosu fene fofowei erasi aꞌi teriterowa.ⁱ 30 Tu naifa ane fene mase iroteye su, fene marepi orese aꞌi ano siye soꞌoruwe tepaꞌasiye. Sosu pereye nowe eite se ane kalabus wesi sahe irosiya su, fene marepi orese tereꞌe ano eite wanusiya. Nowe ape se fene aiwawe aꞌi marepi orese aꞌi apou ape teritesiya.