2
Atu fene owane Krais lo yo seni umasiteye su, marepi hepene fene lo kairefi aꞌi irosiya awere? Krais lai fene ne marepi erasi totenamisiya. Atu fene marepi momotei fetane aꞌi irosiya awere? Owane Sitewi lo Hepene Waraꞌi aꞌi fene nomo mase ironamisiya awere? Fene Owane Sitewi lo ferafereiyei ape lu taune maꞌe au atuatu teꞌe areiye tiyatisiya awere? 2 Fene marepi apou ape irosiya su, Krais lo marepi erasi pefine aꞌi fene sahe irosiya su, fene marepi taꞌi aꞌi irosiya su, fene yo seni taꞌi aꞌi umasisiya su, fene marepi ano erasi aꞌi ane maꞌe au tote nineꞌite. 3 Fene yo seni apou ape umasiyei su, marepi towafi fene lo aꞌi owe ape umasite. Fene ai atu kuseriyei aꞌi owe ape umasite. Ahowa, fene marepi towafi fene lo hi tote ani ararote. Sosu fene lu taune tereꞌe maꞌe iyape erasi aꞌi teꞌe ani arowete. Ei, fene iyape towafi fene lo hi tote ani ararote.a 4 Fene etiri towafi fene lo aꞌi owe ape noweinowei ariariyete. Ahowa, fene lu taune tereꞌe lo etiri mase aꞌi fa au noweinowei ariariyenamite.bFene Krais lo marepi umasinamite.
5 Fene Krais Jisas lo marepi toteyei aiwawe aꞌi ape fu tote anite tawesinamite.
6 Owane Krais lai Owane Sitewi pefine aꞌi wou ironamiteye. Le Owane Sitewi aiwawe aꞌi ne. Ahowa, le Owane Sitewi lo etiri sitewi werese anite tawesiyei ne tote taꞌame. Sosu le Owane Sitewi pefine aiwawe wou aꞌi henerairowa.c
7 Le Owane Sitewi lo sitewi werese arunatiyewe, meni iyape taꞌame wou aꞌi henerai. Menitani ta lai auteiye su, le awei meni lo nihari wou aꞌi henerai. Le wiyawi meni yahowaꞌi wou iroteye.d
8 Sosu le hi awei sato iroteye su, le meni lo nihari wou henerai.
Le Owane Sitewi lo marepi, sosu peri werese lo tote umasinamiteye. Owane Sitewi lai le maꞌe apou eiye su, “Ne temeniyere!” Krais Owane Sitewi lo peri ape wanuwe su, le Owane Sitewi lo peri wanu umasiye. Ei, le me tapeꞌi sahe temeniyeye.e
9 Serai Owane Sitewi lai owane Krais si tame au taꞌane norohuwe sineye. Owane Sitewi lai le hire ei ani aroweteye. Le le maꞌe iyape pefine aꞌi auwe. Iyape lo ape lai iyape tereꞌe werese hi ani araroteye.f
10 Lu taune werese iyape lo wanuwei su, lowe uporo lowe lo le maꞌe fa apeꞌi onure. Lu taune Owane Sitewi lo omo hire maꞌe irosiya ape, lu taune hi awei sato irosiya eite mo, sosu lu taune awei unahi papu irosiya ape, lowe le maꞌe lowe uporo lowe lo fa apeꞌi onure.g
11 Serai lu taune werese le ne apou teꞌerowa, “Owane Jisas Krais le lai Owane pefine tene!” Lowe werese Owane Sitewi Tai Pefine aꞌi lo iyape ei teꞌe nineꞌi ani arowenamitorowa.h
Yo seni aseyaro aꞌi nomo lo lu taune maꞌe au atuatute.
12 Sosu aꞌi pe kaiyemo mo ano, fene weriyei weriyei peri ano wanu umasinamiteye. Ane fene mase iroteye su, fene Owane Sitewi lo peri wanu tote umasinamiteye. Ahowa, pereye nowe eite se ane pani eyeri maꞌe kalabus wesi sahe irosiya. Ane fene mase sato ariye su, fene Owane Sitewi lo peri werese fa wanu tote umasinamiyei ne tote etite. Owane Sitewi lai fene si hene ani tepaꞌasiye. Serai fene Owane Sitewi lo marepi werese siye soꞌoruweyei ne tote etinamite. Marepi hepene heꞌi aꞌi Owane Sitewi lai fene maꞌe au teꞌe naneiye ape, fene mi mi weriyei tei kairefinamite. Fene marepi hepene fene lo ironamiyei su, fene Owane Sitewi ne atoweiye suꞌarinamite. Le kairefi erasi aꞌi ne. 13 Ei, Owane Sitewi lo marepi fene ne apou aꞌi ne. Fene werese yo seni aseyaro waraꞌi aꞌi fa umasinamite. Serai Owane Sitewi lai mi mi weriyei wiyawi lo fene papu taꞌanesiya. Le fene yo seni waraꞌi aꞌi au ironamirowa, sosu fene marepi werese lo tote umasinamirowa. 14 Etiri werese fene irowei ape, fene ai peri, ai marepi owe ape yeneti yenetete. 15 Fene Owane Sitewi lo marepi tote umasinamiyei su, marepi hepene fene lo aseyaro waraꞌi aꞌi ironamirowa. Owane Sitewi lo nihe se fene Owane Sitewi lo lu feni pefine aꞌi henerairowa. Ahowa, fene hi awei sato irosiya. Lu taune tomu neꞌese yo seni luwaru aꞌi tote ironamisiya. Fene lu taune apou ape ponei sahe irosiya su, fene Owane Sitewi lo peri lowe maꞌe au atuatu fiyari areiyerowa. Fene eiwariyemi tamo mitaiyeyei pasi wou henerairowa. 16 Fene lu taune ape mo maꞌe peri pefine aꞌi au teꞌe atuatusiya. Lowe peri ape wanu umasiyei su, Owane Sitewi lai lowe maꞌe marepi hepene heꞌi aꞌi aurowa. Serai nowe yeꞌewi su Meni Owane Krais si tame aiyerowa su, ane marepi nineꞌi wisereyerowa. Piyene awere? Wiyawi werese ano yahowaꞌi henerairowata.i 17 Tote tawesiyei fene lo Owane Sitewi maꞌe au hese ei ani arowesiya wou aꞌi ne. Serai apou aꞌi lu tamo ane aine teraꞌeyei su, fisaꞌi ano eite wain saꞌi wou aꞌi Owane Sitewi maꞌe au hese ereirowa. Sosu fisaꞌi ano tote tawesiyei fene lo maꞌe ani terosorowa su, tote tawesiyei fene lo, sosu fisaꞌi ano lai Owane Sitewi maꞌe au hese ei ani arowerowa. Serai ane marepi nineꞌi wisereyesiyawe, fene maꞌe marepi nineꞌiyei ano aurowa. 18 Fene aiwawe aꞌi marepi wisereyete. Sosu fene marepi nineꞌiyei fene lo ane mase au ironamite.j
Pol meni Timoti omo Filipai maꞌe teꞌe eimawesawiyei ne toteye.
19 Sosu aꞌi pe Meni Owane Jisas lo marepi ane maꞌe au teꞌe atuatuwei su, ane nowe witane se aꞌi meni Timoti fene maꞌe teꞌe eimawesawiyei ne totesiya. Le fene maꞌe heneraiyei su, le tote tawesiyei fene lo siye soꞌoruwerowa. Sosu le ane maꞌe si tame au teꞌenarairowa. Serai ane tote tawesiyei fene lo ne marepi erasi aꞌi nineꞌirowa. 20 Owe meni tereꞌe ta ane mase irosiya ape, Timoti aiwawe wou taꞌama. Le fene werese ne marepi erasi tote wawesiyenamisiyawe, fene ne totenamisiya. Le etiri topo lo ne totenami taꞌame. 21 Lu tewi tereꞌe tamo lowe etiri towafi lowe lo aꞌi au ani noweinoweiyei ne totesiya. Lowe Jisas Krais lo wiyawi au taꞌane te taꞌame.k 22 Timoti lo yo seni marepi ape ne fene siye soꞌoruwe tepaꞌasiye. Ane lu taune maꞌe Owane Sitewi lo peri heneruwe wisere aꞌi au teꞌe fiyari areiyeteye su, le ane mase au pati taꞌaneteye. Apou wou eimane tai lo au pati taꞌanesiya. Le meni eime pefine ano wou aꞌi ne. 23 Ane kalabus wesi sahe irosiya. Serai ane etiri orese aꞌi ane sahe teritesiya ape siye soꞌoruweyei su, etiri orese aꞌi ano poꞌuteyei awere? Ane etiri werese siye soꞌoruweyei su, ane le fene maꞌe nowe witane se aꞌi teꞌe eimawesawirowa. 24 Marepi erasi ano apou totesiya. Nowe oso aꞌi su ane fene maꞌe aiyerowa. Owane Pefine aꞌi lai yo ta au taꞌanerowa. Ane soꞌoruwe tepaꞌasiye.
25 Sosu aꞌi pe ane meni Epafroditus, kaiyemo nomo lo ne, apou totesiya. Tu naifa ane marepi orese aꞌi iroteye su, fene lai le ane maꞌe fa au pati aniraiyei ne teꞌe eimawesai. Le Krais lo meni pefine aꞌi ne. Le ane mase iroteye su, le Krais lo wiyawi au taꞌaneteyewe, ane eyate feni maꞌe tei kairefinamiteye. Ei, le ane aiwawe aꞌi lefeifonamiteye. Serai meni eite ane fene maꞌe si teꞌe eimawesawiyei ne tote kairefiyesiya.l 26 Le fene ne marepi erasi aꞌi tote ewitesiya. Fene le u se wanuwe ape ne. Serai le marepi toteyei orese aꞌi teriteye. Serai le fene werese siyeyei ne tote kairefiyesiya. 27 Ei, pefine aꞌi ne. Le tu naifa u tahe erasi se. Le temeniye ataheyeye. Ahowa, Owane Sitewi lai le maꞌe au ferafereiye. Sosu le ane maꞌe aiwawe aꞌi au ferafereiye. Piyene awere? Le apou toteye, “Pol marepi orese aꞌi teritesiya su, Serai ane orese erasi tereꞌe ape le maꞌe aurowata.” 28 Serai ane marepi erasi aꞌi se le fene maꞌe eimawesawiyei ne totesiya. Le fene maꞌe heneraiyei su, fene marepi nineꞌi wisereyerowa. Fene le siyeyei su, orese ano poꞌuterowa. 29 Sosu le fene maꞌe heneraiyei su, fene meni owane pefine lo iyape se le hene wisereyere. Aiwawe aꞌi lu taune tereꞌe yo seni eito eite ironamiteye ape, fene iyape lowe lo ei ani arowere. 30 Serai fene meni Epafroditus lo iyape ei ani arowere. Piyene awere? Le Krais lo wiyawi taꞌanenamiteye su, le temeniye ataheyeye. Etiri luwaru neꞌese aꞌi le maꞌe henerai. Ahowa, le topo lo tahe ape ne tote taꞌame. Le ane maꞌe au pati aniyei ne fai. Fene ane maꞌe au pati ani taꞌame su, meni ape yaru fene lo aniyewe, ane maꞌe au pati aniteye.