Meni ta Krais ne tote tawesiyei su, le meni waraꞌi aꞌi ne.
3
Kaiyemo mo, Peri ano eite apou teꞌe tepaꞌasiye. Fene werese Meni Owane Pefine aꞌi ne nineꞌi wisereyenamite. Ane tu naifa peri eite fene maꞌe apou lese ausawi. Ane peri eite fene maꞌe tame lese ausawiyei su, ane marepi orese aꞌi terite taꞌame. Ahowa, ane peri ano eite tote tawesiyei fene lo au kairefiyeyei ne teꞌesiya. 2 Lu tamo yo seni luwaru aꞌi ironamisiya ape, fene lowe ne weiyai! Lowe you erawe wou aꞌi ne. Lowe fene maꞌe apou au teꞌerowa, “Fene tahe fene lo meneꞌe se yaru touwei su, fene Owane Sitewi lo marepi tote umasirowa.” Ahowa! Peri lowe lo ape wawero aꞌi ne. 3 Nomo Meni Owane Krais lo marepi tote tawesi umasiyei su, Owane Sitewi lai yaru lo ta nomo maꞌe au furowa. Nomo Owane Sitewi lo lu taune pefine aꞌi henerairowa. Nomo Owane Sitewi maꞌe Hepene Waraꞌi aꞌi lo se au nineꞌi wisereyerowa. Nomo Meni Owane Krais maꞌe nateyei su, marepi hepene nomo lo tote nineꞌi wisereyerowa. Nomo awei yo seni weriyei tote umasinamitorowata.a 4 Ane apou toteyei su, “Ane faraꞌu awei yo seni irowei su, yo seni ape mo ane Owane Sitewi lo nihe se meni waraꞌi aꞌi awere?” Opiya! Lu taune tamo apou toteyei su, “Nomo lu taune wisere aꞌi ne. Nomo faraꞌu awei yo seni wisere aꞌi ape umasiyei.” Lu taune ape mo peri ano fu wanu etire. Ane lai meni wisere pefine aꞌi tene!b 5 Mai ano ane auteiye su, nowe ereti feni werese feni hesi heta i tepaꞌasiye su, lowesi ane Owane Sitewi lo wesi maꞌe tahe ano towei ne heneti. Ane Israel lo lu tewi pefine aꞌi ne. Ane Benjamin lo lu feni maꞌe fai. Ane Hibru lo meni pefine aꞌi henerai. Tai mai ano aiwawe aꞌi Hibru lo lu feni maꞌe fai. Ane Moses lo yo peri werese tote umasinamiteye. Serai ane meni Farisi henerai.c 6 Ane Owane Sitewi lo wiyawi taꞌane tohoteteye. Ane apou toteye, “Jisas lo lu feni werese Owane Sitewi lo wiyawi au luwaruwesiya.” Serai ane Jisas lo lu feni werese fa au luwaruweyei ne toteye. Ane Moses lo yo peri werese wanu umasi etinamiteye. Moses lo yo peri ape ane ne apou teꞌesiya, “Ne aꞌi lai meni waraꞌi aꞌi ne.” Serai ane awei lo yo seni wisere aꞌi apou ape umasiteye su, ane meni wisere pefine aꞌi tene!d7 Nowe ape se etiri ape mo, ane iroteye ape, ane marepi erasi aꞌi tote etiteye. Ahowa, Meni Krais marepi hepene ano papu wirai su, etiri werese ape mo, ane taꞌaneteye ape, yahowaꞌi aꞌi ne.e 8 Ei, wanure! Etiri werese ane tu iroteye ape, etiri werese ape oroꞌoru lepapaꞌe wou aꞌi ne. Serai Krais Jisas Meni Owane pefine ano marepi hepene ano papu wirai su, le ane maꞌe marepi topo lo au atuatu areiyeteye. Ane Meni Owane Krais lo marepi siye soꞌoruwe tepaꞌasiye su, ane etiri tereꞌe werese ano sasari arunati. Etiri tereꞌe werese ape mo oroꞌoru lepapaꞌe wou aꞌi ne. Serai ane faraꞌu Krais natenamirowa. Etiri ape erasi pefine aꞌi tene! 9 Serai ane lai Meni Krais lo meni eime pefine henerai. Ane Krais maꞌe nate tawesisiya su, ane Owane Sitewi lo nihe se meni aseyaro waraꞌi aꞌi ne. Ane
Moses lo yo peri werese wanu umasinamiteye su, ane Owane Sitewi lo nihe se meni aseyaro aꞌi iro taꞌame. Ane meni owane Krais ne tote tawesi umasiyei su, ane Owane Sitewi lo nihe se meni aseyaro waraꞌi aꞌi henerairowa. Owane Sitewi lai tote tawesiyei ano siyerowa su, le yo seni ano aseyaro waraꞌi aꞌi au iro henerai.f 10 Marepi ano apou totesiya. Ane Meni Krais siye soꞌoruwe areiyereme. Le fisiye yo papu si tame norohuwe sineye su, ane kairefi ape siye soꞌoru areiyereme. Ane Krais lo fofowei erasi teritereme. Meni Krais me tapeꞌi sahe temeniyeye su, le fofowei erasi aꞌi teriteye. Fofowei lo teriteye ape ane aiwawe aꞌi fofowei ape teritereme.g 11 Ane Krais lo etiri werese ape mo siye soꞌoruweyei su, ane apou totesiya, “Owane Sitewi lai ane fisiye yo papu si au taꞌane norohuwe sineyei ne arosairowa.”
Pol Krais lo marepi siye soꞌoruweyei ne inamisiya.
12 Weiya! Wanure! Ane Krais lo yo seni werese siye soꞌoruwe tepaꞌasi taꞌame. Lu tamo ane ne apou teꞌesiya. Pol Krais lo yo seni werese siye soꞌoruwe tepaꞌasiye. Ahowa, ane Krais lo marepi siye soꞌoruweyei ne taꞌane tohotesiya. Ane marepi werese lo siye soꞌoruwe tepaꞌasiyei su, sosu ane yaru ape heneri tepaꞌasirowa. Ei, Krais lo marepi ane ne totenamisiya. Serai le ane maꞌe marepi hepene heꞌi aꞌi au taꞌaneteye.h 13 Kaiyemo mo, ane etiri apou soꞌoruwe tepaꞌasiye. Ane yaru ape maꞌe henerai taꞌama. Ahowa, ane lai etiri ta ironamisiya. Etiri werese ape mo, ane tu iroteye ape, ane tote iꞌane arunatirowa. Sosu ane Krais Jisas lo marepi werese aniyei ne taꞌane tohotenamisiya. Sosu ane yaru ape maꞌe heneriyei ne tohotenamisiya. 14 Ei, ane yaru ape heneriyei ne taꞌane tohotenamisiya. Nowe meꞌiye su, ane yaru ape marepi hepene heꞌi aꞌi haruwei aresaiyei wou aꞌi henerairowa. Owane Sitewi lai ane Krais Jisas ne tote tawesiyei ne ei aniye su, le marepi hepene heꞌi aꞌi mi mi pasi pasi ironamitorowa ape, ane maꞌe aurowa.i
15 Serai fene werese Krais Jisas lo marepi siye soꞌoruwesiya ape fene peri eite mo ne, marepi taꞌi aꞌi tote tawesinamite. Sosu fene marepi tereꞌe ta toteyei su, Owane Sitewi lai marepi fene lo au taꞌane ereseye fareraiyeye.j 16 Ahowa, nomo Krais Jisas lo marepi tewi aꞌi siye soꞌoruwe tepaꞌasiye su, nomo marepi tewi aꞌi lo ape ne tote umasinamite. 17 Kaiyemo mo, fene werese yo seni waraꞌi aꞌi ano fu umasinamite. Sosu aiwawe aꞌi yo seni aseyaro aꞌi nomo fene maꞌe au atuatuteye ape, fene lu taune tereꞌe lo yo seni aseyaro aꞌi apou ape fu umasinamite.k 18 Lu taune tomu neꞌese Krais ne tote umasisiya ape, lowe yo seni luwaru aꞌi ironamisiya. Yo seni lowe lo nomo maꞌe apou au atuatusiya. Lowe Krais Jisas lo me tapeꞌi lo airame aꞌi ne. Ane nowe tu naifa lowe apou ape ne fene maꞌe au teꞌe areiyeteye. Lowe lai yo seni eito eite ironamisiya. Serai ane fene maꞌe lowe ne tame au teꞌe areiyesiya. Marepi ano orese erasi aꞌi tote lusiya. 19 Yo seni luwaru aꞌi, lowe umasinamisiya ape, lowe omo yehe maꞌe henetirowa. Ahowa, lowe Owane Sitewi pefine aꞌi au wisereye nineꞌi se taꞌame. Lowe tahe paꞌare lo marepi towafi lowe lo umasinamisiya. Lowe yo seni neritase aꞌi umasinamisiya. Lowe apou totesiya. “Nomo yo seni apou ape irowei su, tahe paꞌare nomo lo wisere aꞌi teritesiya.” Lowe yaꞌariyei lo yo seni weriyei totenamisiya. Serai fene yo seni luwaru apou ape lowe lo owe ape umasite.l 20 Ahowa, nomo werese ate Owane Sitewi lo omo hire maꞌe lu taune ne. Nomo marepi erasi aꞌi se Meni Owane Jisas Krais lo si tame itoraiyei ape ninawesiya. Le hi awei sato itorairowa su, le nomo Owane Sitewi lo omo hire maꞌe hene wirowa.m 21 Meni Owane Krais si tame itorairowa su, le kairefi pefine aꞌi itorairowa. Kairefi erasi lo se le lu taune werese, sosu etiri werese au noweinoweinamirowa. Aiwawe aꞌi kairefi erasi lo se le tahe paꞌare pereꞌe aꞌi nomo lo, au taꞌane aresaiyerowa. Tahe paꞌare hepene nomo lo Meni Owane Krais lo tahe paꞌare pefine aꞌi wou henerairowa.n