Nomo werese yo seni aseyaro waraꞌi aꞌi pei ironamite.
4
Sosu aꞌi pe kaiyemo mo. Ane fene ne marepi erasi aꞌi tote wawesiyenamisiya. Ane fene werese siyereme. Fene lai marepi ano au nineꞌinamisiya. Ane tote tawesiyei fene lo siyeye su, ane Owane Sitewi maꞌe au teꞌe wisereyeye. Serai ane fene maꞌe teꞌesiya. Meni Owane Pefine ne tote tawesiyei ne, ane fene maꞌe au atuatu areiyeteye ape, fene tote tawesiyei fene lo le ne tei kairefinamite.a2 Ane taune hesi Yuodia sosu Sintike maꞌe teꞌesiya. Fenesi ai marepi owe ape tote tiyatite. Fenesi Meni Owane Pefine lo marepi taꞌi aꞌi tote umasinamite. 3 Aiwawe aꞌi ane meni ta ane mase lefeifoteye ape maꞌe eisiya. Ne tu naifa ane mase Krais lo wiyawi taꞌaneteye. Serai ane ne maꞌe eisiya. Ne taune hesi lo ai marepi ape au teꞌe fareraiyere. Lowesi ane mase lu taune tamo maꞌe Owane Sitewi lo peri heneruwe ape au teꞌe areiyeteye. Lowesi meni Klemen aiwawe aꞌi Krais lo wiyawi taꞌaneteye. Lu taune tereꞌe ane mase taꞌaneteye ape, lowesi lowe mase wiyawi taꞌaneteye. Ei, Owane Sitewi lai iyape lowe lo sosu taune hesi lo iyape aiwawe aꞌi one towe sahe lese fu tepaꞌasiye. One towe ape sahe lu taune werese lo iyape, Owane Sitewi lowe maꞌe marepi hepene heꞌi aꞌi auwe ape, Owane Sitewi lai iyape lowe lo lese fuwe.b 4 Fene werese nowe mi weriyei weriyei Meni Owane Pefine ne aꞌi teꞌe nineꞌi wisereyenamite. Ane fene maꞌe si tame eisiya, fene werese le ne teꞌe nineꞌi wisereyenamite. 5 Meni Owane Pefine witane aꞌi si tame itoraiyei ne ataheyeraiwa. Serai fene werese yo seni momotei wisere aꞌi fu umasinamite. Fene yo seni eito eite umasiyei su, lu taune werese lai yo seni aseyaro waraꞌi aꞌi fene lo siyerowa.c 6 Fene etiri werese ne owe ape tote ewitete. Ahowa, fene nowe weriyei weriyei marepi tote ewiteyei fene lo, Owane Sitewi pefine maꞌe au teꞌete. Fene Owane Sitewi maꞌe teꞌe toweriyei su, fene le maꞌe au teꞌe wisereye nineꞌi arowenamite.d 7 Sosu Owane Sitewi lo marepi momotei fetane aꞌi fene maꞌe au napeturowa. Le marepi hepene fene lo Meni Owane Krais Jisas sahe tei kairefiyenamirowa. Marepi momotei fetane aꞌi Owane Sitewi nomo maꞌe aurowa ape, erasi pefine aꞌi henerairowa. Nomo werese Owane Sitewi lo marepi momotei fetane aꞌi ape ne soꞌoruwerowata.e
8 Kaiyemo mo, ane peri yeꞌewi ta fene maꞌe au teꞌesiya. Etiri werese ape mo wisere aꞌi irosiya ape, etiri werese ape mo pefine aꞌi irosiya ape, etiri werese waraꞌi aꞌi irosiya ape, etiri werese aseyaro aꞌi irosiya ape, etiri werese wisereye nineꞌisiya ape, etiri werese farere aꞌi irosiya ape, etiri werese apou ape mo fene erasi aꞌi tote tawesinamite. 9 Peri werese ape mo ne, ane fene maꞌe au teꞌe areiyeteye ape, etiri werese ane fene maꞌe au atuatuteye ape, fene etiri ape mo umasinamite. Etiri ape mo ane fene mase iroteye su, fene umasinamite. Fene etiri eito eite umasiyei su, Owane Sitewi lai marepi momotei fetane aꞌi fene maꞌe ausiya ape, fene mase ironamirowa.f
Pol lowe maꞌe au teꞌe wisereyeye.
10 Sosu aꞌi pe fene ane ne tame au ferafereiteye. Serai ane Meni Owane pefine aꞌi ne au teꞌe wisereye nineꞌisiya. Nowe mi mi werese fene ane noweinoweiyei ne totenamiteye. Ahowa, fene yo ta ane ne au ferafereiyei ne iro taꞌame. 11 Ahowa, ane etiri ariye iro te taꞌame. Ane fene maꞌe etiri ta fa ausaiyei ne teꞌesai taꞌame. Ei, ane etiri werese ariye aꞌi su, etiri tomu neꞌese iroteyei su, Owane Sitewi ane maꞌe marepi wisere aꞌi au atuatuwe. Serai ane mi mi weriyei marepi wisere aꞌi tote nineꞌinamisiya. 12 Ei, ane etiri ariye iroteye su, ane marepi wisere aꞌi tote nineꞌinamisiya. Aiwawe aꞌi ane etiri tomu neꞌese iroteye su, ane marepi wisere aꞌi tote nineꞌinamisiya. Mi mi tomu neꞌese ane ayei werese poꞌuteye. Sosu ane lau erasi iroteye. Sosu aiwawe aꞌi mi mi tomu neꞌese se Owane Sitewi lai ane maꞌe ayei tomu neꞌese auteye. Serai ane etiri ape soꞌoruwe tene. Mi mi weriyei ane marepi momotei fetane aꞌi ironamitorowa. 13 Sosu ane marepi momotei fetane aꞌi lo sitewi apou teꞌesiya, “Krais lo kairefi aꞌi lai ane au ani tei kairefiyesiya. Kairefi lo ape aꞌi lai ane faraꞌu etiri werese taꞌanerowa.”g
14 Ahowa, ane marepi orese aꞌi teriteye su, fene ane maꞌe au ferafereisai. Ei, fene yo seni wisere aꞌi ane ne au irowe. 15 Tu naifa ane omo Filipai lo lu taune maꞌe tutawe Owane Sitewi lo peri au teꞌe areiyeye su, fene werese sato wanu iroteye. Fene werese maꞌaru tamo ane ne au ferafereiteye. Serai ane omo pani Masedonia arunati su, fene aꞌi lai ane au ferafereisawi.h 16 Ane Omo Tesalonaika sahe iroteye su, ane etiri ta ariye aꞌi iroteye. Nowe mi neꞌese fene maꞌaru etiri ape ane maꞌe ausai. 17 Wiyeme aꞌi ne. Fene apou owe totere. Ane fene maꞌe maꞌaru etiri ta mo ne fene maꞌe ei towerirowawe, ane maꞌe fa au ne. Ahowa, fene maꞌaru etiri tamo auwei su, Owane Sitewi lai fene maꞌe marepi wisere aꞌi aurowa. Fene marepi wisere aꞌi teritenamirowa. 18 Meni ape Epafroditus, le etiri neri aꞌi fene lo ane maꞌe aitai su, ane maꞌaru etiri tamo temeꞌeriyesiya. Ane maꞌaru etiri tamo ariye iro te taꞌame. Etiri neri aꞌi fene lo ape lai saꞌi heneri wisere aꞌi wou ne. Fene Owane Sitewi maꞌe au heseye. Serai Owane Sitewi lai etiri neri aꞌi fene lo ereti lo se aniteye. Sosu le fene ne wisereye nineꞌisiya. 19 Serai Owane Sitewi Pefine aꞌi ano etiri werese werese aꞌi irosiya ape, le lai Krais Jisas lo iyape se etiri tamo fene maꞌe au ferafereirowa. Etiri werese fene ariye irosiya ape, le fene maꞌe aurowa. 20 Nomo Owane Sitewi Tai Pefine aꞌi lo iyape mi mi weriyei weriyei ei ani arowetorowa. Nomo le ne au teꞌe wisere nineꞌinamitorowa. Wiyeme aꞌi tene.
21 Ane lu taune werese maꞌe Krais Jisas lo yo seni umasisiya ape, au teꞌe nineꞌisawisiya. Lu taune Omo Rom sahe ane mase irosiya ape aiwawe aꞌi fene maꞌe au teꞌe nineꞌi wisereyesiya. 22 Lu taune werese werese Jisas lo yo seni umasisiya ape, lowe fene maꞌe au teꞌe wisereyesawisiya. Lu taune tamo awei meni owane Sisar lo wesi sahe wiyawi taꞌanesiya ape, lowe Jisas lo yo seni umasisiya ape, lowe aiwawe aꞌi fene maꞌe au teꞌe wisereyesawisiya. 23 Meni Owane Jisas Krais lo ferafereiyei marepi hepene fene lo mase ironamitorowa.