3-4 Tote tawesiyei fene lo Meni Owane Krais Jisas ne, sosu aiwawe aꞌi fene lu taune aseyaro waraꞌi aꞌi ne marepi erasi aꞌi tote wawesiyenamisiya. Notosi Owane Sitewi maꞌe au teꞌe wisereyenamisiya. Le Meni Owane Jisas Krais lo Tai Pefine aꞌi ne. Notosi fene ne mi mi weriyei Owane Sitewi maꞌe teꞌe towerinamisiya.^a 5 Piye lo sitewi fene Meni Owane Krais ne tote tawesisiya awere? Sitewi lo ape apou aꞌi ne. Fene etiri werese Owane Sitewi lo omo hire sahe irosiya ape ninawenamisiya. Aiwawe aꞌi fene marepi hepene heꞌi aꞌi Owane Sitewi fene maꞌe aurowa ape ninawesiya. Fene Krais Jisas lo peri pefine aꞌi wanuwe su, fene le ne tote tawesi umasiteye. Peri pefine ape apou aꞌi Krais Jisas lo peri heneruwe wisere aꞌi ne.^b 6 Lu tamo Krais lo peri heneruwe wisere aꞌi fene maꞌe au teꞌe areiyeteye su, fene peri ape wanu tote tawesi umasiteye. Lu taune tamo omo pani werese werese sahe peri heneruwe ape au teꞌe fiyari areiyesiya su, lu taune tomu neꞌese aꞌi peri ape wanu umasisiya. Lowe peri ape wanu umasisiya su, marepi hepene lowe lo aseyaro waraꞌi aꞌi aresaiyesiya. Aiwawe aꞌi fene Krais lo peri heneruwe wisere aꞌi wanuwe su, sosu Owane Sitewi lo ferafereiyei pefine aꞌi wanu soꞌoruwe tepaꞌasiye su, marepi hepene fene lo aseyaro waraꞌi aꞌi aresaiyeteye. 7 Meni Epafras lai fene maꞌe peri heneruwe wisere aꞌi au atuatu areiyeteye. Fene peri lo wanuwe su, fene Krais ne tote tawesi umasinamiteye. Meni ape Krais lo wiyawi meni ne. Notosi fene maꞌe aiye taꞌame su, le yaru notosi lo Krais lo wiyawi au taꞌaneteye. Notosi meni ape marepi wisere erasi aꞌi tote wawesiyenamisiya.^c 8 Le notosi maꞌe apou eiye, Owane Sitewi lo Hepene Waraꞌi aꞌi marepi erasi aꞌi tote wawesiyenamiyei lo fene maꞌe auwe. Serai fene lu taune werese marepi wisere erasi aꞌi tote wawesiye tiyatinamisiya.

9 Serene meni Epafras marepi erasi aꞌi tote wawesiyeyei fene lo notosi maꞌe au teꞌesai su, notosi mi mi weriyei Owane Sitewi maꞌe fene ne au teꞌe towerinamiteye. Notosi Owane Sitewi maꞌe apou teꞌe towerisiya, fene Owane Sitewi lo marepi werese pefine aꞌi siye soꞌoruwe temeꞌeriyerowa. Aiwawe aꞌi notosi le maꞌe apou teꞌe towerisiya, Owane Sitewi lai marepi wisere aꞌi lo fene maꞌe au atuatu areiyerowa.^d 10 Fene Owane Sitewi lo marepi werese siye soꞌoruweye su, fene faraꞌu Meni Owane Pefine lo yo seni waraꞌi aꞌi umasinamirowa. Etiri werese fene irowei ape, le fene ne marepi wisere aꞌi tote nineꞌisiya. Mi mi weriyei lu taune tamo yo seni waraꞌi aꞌi fene lo siyeyei su, lowe Krais maꞌe aiyerowa. Sosu aiwawe aꞌi Owane Sitewi lo marepi werese marepi fene lo sahe erasi pefine aꞌi henerairowa. 11 Sosu Owane Sitewi lai tote tawesiyei fene lo marepi ape maꞌe kairefi erasi pefine aꞌi lo se au kairefiyerowa. Le tote tawesiyei fene lo ape au kairefiyeyei su, fene tei kairefiyerowa. Ei, etiri luwaru aꞌi fene maꞌe henerairowa su, le tote tawesiyei fene lo au ani kairefiyenamitorowa. Fene tote tawesiyei fene lo aweraꞌiyenatirowata. Le fene maꞌe marepi momotei fetane aꞌi aurowa.^e 12 Sosu fene Owane Sitewi Tai Pefine aꞌi maꞌe au teꞌe wisereye nineꞌirowa. Le etiri tomu neꞌese omo hire sahe taꞌuwe naneiteye. Serai fene le ne tote tawesi umasinamisiya su, fene werese Owane Sitewi lo nihe se aseyaro waraꞌi aꞌi henerairowa. Serai fene werese etiri werese ape mo omo hire sahe irosiya ape anirowa.^f

13 Tu naifa nomo werese yo seni luwaru aꞌi lo kairefi unahi iroteye. Ahowa, Owane Sitewi lai nomo werese yo seni luwaru aꞌi apou ape sahe iroteye ape, hene ani arosaiyewe, sosu le nomo meni eime pefine lo, lo omo pani pefine aꞌi maꞌe heneti.^g 14 Meni eime pefine lo lai yo seni luwaru werese aꞌi nomo lo si eteyewe, au ani sasarisawi. Serai nomo le ne tote tawesi umasiyei su, le yo seni luwaru werese aꞌi nomo lo au ani pamowe sasarisawirowa. Le aꞌi lai yo seni luwaru werese aꞌi nomo lo tote iꞌanenatinamirowa.^h

15 Sosu aꞌi pe lu taune werese werese lai Owane Sitewi pefine aꞌi siyerowata. Ahowa, Jisas lai Owane Sitewi lo nihari hepene aiwawe aꞌi ne. Etiri werese werese le unahi ironamisiya. Le meni tutawe pefine aꞌi ironamitorowa.ⁱ 16 Jisas se Owane Sitewi lai etiri werese kairefi lo se au taꞌaneteye. Etiri werese Owane Sitewi lo omo hire sahe irosiya ape, etiri werese hi awei sato irosiya ape, etiri werese nomo faraꞌu siyesiya ape, etiri werese nomo siye taꞌame ape, lu owane werese kairefi apou ape irosiya ape, lu owane werese lu taune au noweinoweisiya ape, Meni Owane Krais lai etiri werese werese ape mo au taꞌaneteye. Etiri werese ape mo topo lo aꞌi ne. 17 Tu naifa weriyei weriyei, etiri werese werese henerai taꞌame su, Meni Owane Krais sato iroteye. Le aꞌi lai etiri werese lo sitewi aꞌi ne. Le etiri werese werese ereti lo se au noweinoweinamisiya.^j 18 Lu taune werese le ne tote tawesi umasinamisiya ape, le aꞌi lai meni tutawe aꞌi ne. Lu taune werese ape mo lowe Krais lo tahe paꞌare ne. Meni ape si tame tutawe norohuwe sineye. Serai Meni Owane Krais lai etiri werese werese lo meni tutawe pefine aꞌi henerairowa.^k 19 Owane Sitewi lo marepi se le lai Krais lo marepi hepene papu temeꞌeriye ironamiteye.^l 20 Sosu Owane Sitewi apou toteye. “Lu taune sosu etiri werese ane maꞌe si tame fa aiyere.” Sosu lowe marepi momotei fetane aꞌi ano anirowa. Serai ane faraꞌu meni eime ano se, lowe ane maꞌe henetairowa. Etiri werese omo hire maꞌe irosiya ape, etiri werese hi awei sahe irosiya ape, lowe werese ane maꞌe fa aiyere. Serai Owane Sitewi lai meni Owane Krais me tapeꞌi sahe temeniyeyei ne eimawesai su, le marepi hepene momotei fetane aꞌi lu taune werese le mase ironamitorowa.^m

21 Tu naifa fene werese Owane Sitewi eyeri maꞌe iroteye. Fene yo seni luwaru aꞌi iroteye su, fene Owane Sitewi maꞌe au luwaruweteye. Serai fene marepi fene lo sahe Owane Sitewi maꞌe ai marepi totenamiteye.ⁿ 22 Ahowa, Meni Owane Krais me tapeꞌi sahe temeniyeye su, le fene Owane Sitewi maꞌe henetai. Le fene Owane Sitewi maꞌe henetaiyei su, fene nati wafei pefine aꞌi lo henerai. Sosu yo seni werese fene lo Owane Sitewi lo nihe se aseyaro waraꞌi aꞌi ironamitorowa.^o 23 Serai fene werese Krais lo peri heneruwe wisere aꞌi fene wanuwe ape ne, tote tawesi umasinamirowa su, tote tawesiyei fene lo fa tei kairefiyere. Owane Sitewi lo peri teꞌe naneiyei ape mo fene ninawesiya ape, fene meꞌiyeni maꞌe owe ape arunatite. Krais lo peri heneruwe wisere aꞌi ape fene maꞌe marepi hepene heꞌi wisere aꞌi auwe. Ei, lowe peri heneruwe ape lu taune werese werese maꞌe omo werese hi awei sahe au teꞌe fiyari areiyeteye. Ane Pol, Owane Sitewi lai ane Krais lo peri heneruwe wisere aꞌi au teꞌe fiyari areiyeyei ne ariariyeye.

24 Sosu aꞌi pe ane fofowei erasi aꞌi tahe paꞌare ano sahe teritesiya su, ane fene ne marepi erasi nineꞌisiya. Lu taune tomu neꞌese aꞌi, Krais lo yo umasisiya ape, lowe fofowei erasi aꞌi teriterowa. Serai lowe tahe paꞌare lowe lo sahe fofowei erasi teriterowa su, Meni Krais, sosu lu feni werese lo aiwawe aꞌi fofowei lowe lo ape teriterowa. Lu tamo ane fofowei erasi aine nayei su, ane lowe maꞌe marepi luwaru aꞌi teꞌerowata. Ahowa, ane Krais lo tahe paꞌare aiwawe aꞌi fofowei erasi aꞌi ape au teriterowa. Serai ane fofowei erasi teriteyei su, ane marepi erasi aꞌi tote nineꞌirowa. 25 Owane Sitewi lai ane maꞌe wiyawi erasi ta fene ne au pati aniyei ne auwe. Serai ane lu taune Krais lo yo umasiteye ape, ane lowe ne wiyawi meni ape apou aꞌi ne. Serai ane Owane Sitewi lo peri werese lu taune maꞌe au teꞌe fiyari areiyesiya.^p 26 Tu naifa weriyei Owane Sitewi lai marepi pefine aꞌi lo lu taune werese maꞌe fareyareyeteye. Lu taune werese werese Owane Sitewi lo marepi pefine aꞌi soꞌoru taꞌama. Ahowa, pereye nowe eite se Owane Sitewi lai marepi pefine aꞌi lo lu taune aseyaro waraꞌi aꞌi lo maꞌe au atuatu areiyesiya.^q 27 Serai Owane Sitewi lai apou aꞌi toteye, “Ane peri pefine wisere aꞌi ano lu tewi tereꞌe tomu neꞌese maꞌe au atuatu areiyerowa.” Peri pefine lo ape apou aꞌi ne, Owane Jisas Krais le marepi hepene fene lo papu ironamisiya. Sosu le mitaiyei erasi pefine aꞌi se si tame itorairowa su, nomo le ne ninawenamisiya. 28 Serai nomo lu taune tomu neꞌese maꞌe Meni Owane Krais lo peri au teꞌe fiyari areiyesiya. Nomo Krais lo peri au teꞌe areiyesiya su, nomo lu taune werese maꞌe marepi wisere aꞌi se au teꞌe areiyerowa. Sosu aiwawe aꞌi nomo lowe maꞌe yo seni aseyaro waraꞌi aꞌi au atuaturowa. Lu taune werese aꞌi Krais ne tote tawesi umasisiya ape mo, nomo lowe Owane Sitewi maꞌe lu taune waraꞌi aꞌi hene aitairowa. 29 Sosu ane wiyawi ape taꞌanesiya su, ane wiyawi ani tohotesiya. Ane marepi orese aꞌi teritesiya. Ahowa, Meni Owane Krais ane maꞌe au kairefiyesiya. Ei, kairefiyeyei lo ape erasi aꞌi marepi hepene ano papu au pati ani kairefiyenamisiya.^r