6 Fene meni Owane Krais ne tote tawesiye su, fene le sahe weriyei weriyei tei nate tawesi umasinamite! 7 Fene Krais ne tote tawesiye su, le tote tawesiyei fene lo Meni Sitewi wiyeme pefine aꞌi henerai. Apou wou aꞌi me napi hi awei papu wisiya. Lu tamo Krais lo marepi fene maꞌe au teꞌe atuatuteye su, lowe tote tawesiyei Krais ne fene maꞌe auwe. Serai fene tote tawesiyei fene lo tei kairefiyenamite. Sosu fene Owane Sitewi maꞌe erasi aꞌi au teꞌe wisereye nineꞌinamite.^d

8 Fene weiyai! Lu taune tomu neꞌese fene maꞌe peri fiyaru heneruwe wawero aꞌi, sosu marepi yahowaꞌi au teꞌe areareyei ne totesiya. Lowe yaꞌariyei lo marepi tote umasiteye. Sosu aiwawe aꞌi lowe sepei luwaru aꞌi, etiri hi awei sato au noweinoweisiya ape, lowe marepi lowe lo tote umasiteye. Peri wawero, sosu marepi yahowaꞌi, peri sitewi taꞌame ape, lowe Krais lo marepi tote umasi te taꞌame. 9 Owane Sitewi lo marepi hepene werese aꞌi lo Krais papu ironamisiya. Apou wou meni lo hepene ta tahe paꞌare lo papu wi temeꞌeriyesiya.^e 10 Fene lai Krais papu irosiya. Serai marepi hepene fene lo wisereyeyei erasi pefine aꞌi henerai tepaꞌasiye. Lu owane werese aꞌi le maꞌe unahi ironamisiya. Sosu le kairefiyeyei werese apou ape ani ararosiya. Serai le meni tutawe pefine aꞌi henerai.^f 11 Fene Meni Owane Krais mase tei nate tawesi umasisiya su, fene sahe yaru ta tereꞌe irosiya. Lu tamo tahe fene lo meneꞌe se tou taꞌame. Ahowa, Meni Krais lai fene maꞌe yaru tereꞌe ta auwe. Yaru ape yo seni aseyaro waraꞌi aꞌi ne. Le yo seni luwaru werese aꞌi fene lo au ani sasari fiyarisawi. Serai fene lu taune aseyaro waraꞌi aꞌi Owane Sitewi lo nihe se henerai tepaꞌasiye. Ei, Meni Krais yaru ape fene maꞌe au tepaꞌasiye.^g 12 Fene Meni Owane Krais ne tote tawesiye. Sosu moꞌo meni ta fene saꞌi au ani huwe. Saꞌi au ani huwei ape lo peri sitewi apou teꞌesiya. Fene Krais aiwawe wou temeniyeye, fisiye yo papu aiwawe wou fuwe. Sosu Owane Sitewi lai Krais si tame taꞌane norohuwe sineye su, le kairefi lo se fene aiwawe wou aꞌi si tame norohuwe sineyei. Serai le meni Krais si tame norohuwe sineye su, le nomo werese maꞌe kairefi lo au atuatu areiyeye.^h 13 Tu naifa fene yo seni luwaru aꞌi ironamiteye su, marepi hepene fene lo temeniyeye. Marepi luwaru aꞌi fene nate tawesinamiteye. Ahowa. Fene meni Krais ne tote tawesi umasiye su, Owane Sitewi lai fene marepi hepene heꞌi aꞌi au taꞌaneye. Sosu le yo seni luwaru werese aꞌi fene lo tote iꞌanenamiye. Fene Krais mase hepene norohu heꞌi aꞌi ironamisiya.ⁱ 14 Nomo yo peri, Moses leseye ape, ato towesinati su, yo peri ape nomo ani araronamiteye, sosu nomo maꞌe ai atu tiyatinamiteye. Ahowa, lowe Jisas me tapeꞌi sahe aine tawere temeniyeye su, le yo peri ape yo seni luwaru nomo lo ne teꞌesiya ape, au ani poꞌutesawi.^j 15 Meni Owane Krais me tapeꞌi sahe temeniyeye su, Owane Sitewi lai sepei Satan, sosu sepei luwaru werese aꞌi lo aine nayewe, hi ani ararowe. Le lu taune werese omo werese sahe apou au atuatuwe. Le lowe werese hi ani ararowe.

16 Serai ane ayei lo yo peri ne fene maꞌe au teꞌesiya. Lu tamo ayei lo yo peri fene maꞌe au atuatuwei su, fene yo peri ape owe ape umasite. Lu tamo fene maꞌe apou teꞌeyei su, “Fene Owane Sitewi lo marepi umasiyei ne toteyei su, fene saꞌi ayei lo yo peri fa umasite. Aiwawe aꞌi fene taꞌuwe hereiyei lo yo peri fa umasite. Yame heꞌi heneraiyei su, fene yo peri nomo lo fa umasite. Sosu aiwawe aꞌi fene nowe amou lo yo peri fa umasite.” Ahowa, fene yo peri werese lowe lo owe ape umasite.^k 17 Tu naifa weriyei etiri eite mo lowe au atuatusiya ape, apou wou aweru awerou yahowaꞌi ne. Etiri ape mo etiri pefine werese aꞌi meꞌiye henerairowa ape, napetu poꞌutesiya. Etiri heꞌi aꞌi eite mo lowe meni Krais sahe ironamisiya.^l 18 Lu taune tamo lai marepi towafi lowe lo hi ani ararowei ne totesiya. Ahowa, lowe fene maꞌe arearesiya. Lowe Owane Sitewi lo sepei wisere aꞌi au wisereyesiya. Lowe suwou peri tomu neꞌese siyeteyewe, lu taune maꞌe au teꞌe areareteye. Lowe fene maꞌe apou teꞌeyei su, “Fene suwou peri nomo lo fa umasite.” Ahowa, fene peri lowe lo owe ape wanu tote umasite. Lowe yaꞌariyei lo marepi tote umasinamisiya. Serai lowe iyape towafi lowe lo ei ani arowenamisiya. 19 Sosu lu ape mo Krais ne tote nate tawesi se taꞌame. Krais lai Owane tutawe nomo lo ne. Lu taune werese Krais ne tote tawesi umasinamisiya ape, lowe Meni Owane Krais unahi ironamisiya. Lowe meni Krais tei nate tawesisiya su, lowe lu taune tereꞌe tereꞌe tiyati au ferafereisiya. Lowe lu taune tereꞌe au ferafereisiya su, tote tawesiyei lowe lo kairefi aꞌi ironamisiya. Sosu aiwawe aꞌi lu taune aseyaro werese aꞌi ape mo lowe kairefi aꞌi teisiya. Serai lu taune aseyaro waraꞌi aꞌi Owane Sitewi lo marepi umasinamirowa. Sosu lu taune ape mo tomu neꞌese aꞌi henerairowa.^m

20 Yo seni luwaru werese aꞌi fene lo Krais mase fisiye yo papu temeniye poꞌuteye. Serai fene yaꞌariyei lo yo peri yahowaꞌi unahi tei se taꞌame. Ane peri ta fene ne apou wanuwe. Fene yaꞌariyei lo yo seni tote umasisiya. Sosu fene yo peri apou ape lowe lo tote umasinamisiya. Serai ane marepi orese aꞌi teritesiya.ⁿ 21 Yo peri lowe lo apou teꞌesiya, “Etiri eite ereti se owe ape aniteye. Etiri eite owe ape peyoꞌote. Fene etiri ape ereti se owe ape anite hetesiyere.” 22 Yo peri eite mo lowe awei lo etiri noweinoweisiya. Etiri ape mo poꞌuteyei su, yaꞌariyei lo yo peri eite aiwawe aꞌi poꞌuterowa. Awei lo lu lai yo peri ape mo lese atuatuteye. Yaꞌariyei lo yo peri werese ape mo yahowaꞌi henerairowa.^o 23 Awei lo yo peri ne, lowe nihari lowe lo wou marepi wisere aꞌi ne. Lu taune tamo yo peri apou ape umasiyei su, lowe etiri tereꞌe tereꞌe ape ne au wisereye nineꞌiyei. Lowe marepi towafi lowe lo hi ani araronamisiya. Ahowa, lowe marepi hepene lowe lo ei ani arowesiya. Lowe apou totesiya, nomo tahe paꞌare towafi nomo lo au aine luwaruweyei su, Owane Sitewi lai nomo ne tote wisereyeyei. Ahowa, yo peri ape mo, lowe tafaꞌe yo seni luwaru aꞌi einamirowata.