Nomo Krais mase si tame norohuwe sine tepaꞌasiye.
3
Sosu aꞌi pe fene Krais ne tote tawesi umasisiya su, fene Krais lo temeniyeyei wou aꞌi irowe. Serai Owane Sitewi lai Krais si tame taꞌane norohuwe sineye su, le fene aiwawe wou si tame taꞌane norohuwe sineye. Serai fene etiri werese Owane Sitewi lo omo hire maꞌe irosiya ape, siye eti tote umasite. Meni Krais Owane Sitewi lo omo sahe ereti ai feni lo maꞌe onunamisiya.a 2 Fene etiri werese ne Owane Sitewi lo omo hire maꞌe irosiya ape tote etire. Etiri ape mo wisere erasi aꞌi tene! Aiwawe aꞌi awei lo etiri werese ne fene marepi erasi aꞌi owe ape totete.b 3 Marepi hepene weriyei fene lo temeniye tepaꞌasiye. Sosu Owane Sitewi lai marepi hepene heꞌi aꞌi fene maꞌe auwe. Marepi hepene heꞌi aꞌi fene lo meni Krais papu weriyei weriyei ironamisiya. 4 Meni Krais ape le marepi hepene fene lo, lo sitewi ne. Le hi awei maꞌe si tame itorairowa su, fene le mase aiwawe aꞌi Owane Sitewi lo mitaiyeyei erasi sahe amerame aꞌi ironamitorowa.5 Serai marepi hepene weriyei fene lo temeniyeye su, fene etiri yo seni luwaru werese aꞌi meꞌiyeni maꞌe atati tote arunatite. Fene tafaꞌe yo seni luwaru aꞌi owe ape irote. Yo seni luwaru aꞌi owe ape irote. Marepi luwaru aꞌi owe ape totete. Etiri werese aꞌi owe ape siye wisereyete. Etiri werese taꞌuwe aniyei ne owe ape totete. Lu taune yo etiri tomu neꞌese taꞌuwe aniyei su, lowe god wawero aꞌi maꞌe au wisereye nineꞌirowa.c 6 Lu taune yo seni luwaru aꞌi apou ape irowei su, Owane Sitewi lai lowe maꞌe ai marepi erasi aꞌi toterowa.d 7 Sosu tu naifa fene Krais ne tote tawesi taꞌame su, fene taꞌu yo seni luwaru aꞌi apou ape aiwawe aꞌi iroteye. 8 Ahowa, pereye nowe eite se fene yo seni apou ape fu ani arosawite. Ai peri owe ape teꞌete. Ai marepi owe ape totete. Lu taune tereꞌe maꞌe owe ape au luwaruwete. Sosu lowe maꞌe peri luwaru aꞌi owe ape teꞌete. Fene peri teꞌeyei su, fene peri kairefi luwaru unou aꞌi owe ape teꞌete.e 9 Fene kaiyemo mo fene lo maꞌe peri wawero owe ape au teꞌe tiyatite. Fene marepi hepene weriyei fene lo fu ani arosawi su, etiri luwaru werese aꞌi fene tu naifa iroteye ape, apou aiwawe aꞌi peri wawero, fene owe ape teꞌete.f 10 Fene marepi hepene heꞌi aꞌi sahe ironamisiya. Marepi heꞌi aꞌi fene lo sahe irosiya ape, etiri werese heꞌi aꞌi henerairowa. Owane Sitewi pefine aꞌi fene taꞌaneye ape, fene nihari lo wou aꞌi aresai heneraisiya. Marepi hepene heꞌi aꞌi fene lo lai Owane Sitewi lo marepi pefine aꞌi fene maꞌe au atuatu areiyesiya.g 11 Marepi hepene heꞌi aꞌi sahe Juda lo lu taune, sosu omo pani Grik lo lu taune, lowe Krais ne tote tawesi umasiyei su, lowe werese Owane Sitewi lo nihe se aiwawe taꞌi aꞌi ne. Lu tewi tahe towafi lowe lo touwei yaru ape, sosu lu tewi tereꞌe tahe towafi lowe lo touwei yaru taꞌame ape, lowe aiwawe taꞌi aꞌi ne. Lu taune werese peri tereꞌe teꞌesiya ape, omo eyeri maꞌe fai ape, sosu lu taune omo pani Skitia maꞌe fai ape. Lowe you erawe wou aꞌi ne. Lowe Krais ne tote tawesiyei su, lowe Owane Sitewi lo nihe se aiwawe taꞌi aꞌi ne. Lu taune wiyawi yahowaꞌi taꞌanesiya ape, sosu lu taune wiyawi maꞌaru se taꞌanesiya ape, lowe aiwawe aꞌi ne. Ahowa, Meni Owane Krais lai lu taune werese Krais lo peri wanu tote tawesi umasisiya ape, le lowe papu ironamisiya. Ei, Meni Krais le Meni Owane tutawe lowe lo ne.h
12 Owane Sitewi lai fene au ariariyeye. Le fene werese lu taune aseyaro waraꞌi aꞌi au taꞌane iro henerai. Le fene werese marepi erasi aꞌi tote wawesiyenamisiya. Serai fene yo seni aseyaro aꞌi pei irote. Lu taune tereꞌe maꞌe au ferafereite. Lowe maꞌe marepi momotei aꞌi au irote. Fene marepi fene lo hi ani ararote. Marepi fetane aꞌi irote. Lu tamo fene maꞌe au luwaruweyei su, fene ai marepi erasi aꞌi owe ape totete.i 13 Fene kaiyemo mo fene lo maꞌe ai marepi owe ape tote tiyatite. Ahowa, fene lu taune lo yo seni luwaru aꞌi tote iꞌane arosawi tiyatite. Lu tamo fene maꞌe au luwaruweyei su, fene yo seni lowe lo tote iꞌanenamite. Tu naifa fene yo seni luwaru aꞌi ironamiteye. Meni Owane Pefine aꞌi lai yo seni luwaru aꞌi fene lo au ani sasari pamoweye. Serai fene lu taune tereꞌe lo yo seni luwaru aꞌi tote iꞌanenamite.j 14 Fene yo seni aseyaro apou ape ironamite. Ahowa, etiri ta tutawe fene irote. Fene kaiyemo mo fene lo marepi erasi aꞌi tote wawesiye tiyatinamite. Fene lu taune tereꞌe maꞌe marepi erasi aꞌi tote wawesiyenamiyei su, fene werese marepi taꞌi pefine aꞌi ironamirowa.k 15 Krais lai nomo marepi fetane aꞌi ausiya. Serai marepi fetane aꞌi lo ape lai faraꞌu marepi fene lo au noweinoweinamite. Owane Sitewi lai fene werese marepi fetane aꞌi irowei ne ei taꞌuwerai. Sosu fene Krais sahe tahe paꞌare taꞌi aꞌi henerai. Etiri werese ape ne, fene Owane Sitewi maꞌe au teꞌe wisereye nineꞌinamite.l 16 Sosu aiwawe aꞌi Meni Krais lo peri werese fene papu erasi pefine aꞌi fa henerairowa. Fene lu taune tereꞌe maꞌe Owane Sitewi lo peri au teꞌe atuatu tiyatiyei su, fene Owane Sitewi lo marepi wisere aꞌi se tote tawesiyei lowe lo au ani kairefiyete. Fene Owane Sitewi pefine maꞌe au teꞌe wisereye nineꞌiyei su, fene Owane Sitewi lo peri Buk Song, Devit leseteye ape, au teꞌe wisereye nineꞌite. Aiwawe aꞌi Owane Sitewi lo peri tereꞌe se yakowei ahi peri wisere aꞌi se au teꞌe wisereye nineꞌite. Sosu peri tereꞌe Owane Sitewi lo marepi pefine aꞌi au teꞌe wisereye nineꞌite. Fene Owane Sitewi maꞌe au teꞌe wisereyeyei su, fene marepi papu au wisereye nineꞌinamirowa.m 17 Peri werese fene teꞌesiya ape, wiyawi werese fene taꞌanesiya ape, fene etiri ape mo Meni Owane Krais fene lo ne au ironamite. Sosu etiri werese fene irowei ape, fene Jisas lo iyape se Owane Sitewi Tai Pefine aꞌi maꞌe au teꞌe wisereyete.n
Pol naiyaripi awaripi ne au teꞌesiya.
18 Sosu aꞌi pe taune meni se ane fene maꞌe teꞌesiya. Fene meni fene lo unahi ironamite. Peri lowe lo fene wanu umasite. Fene Meni Owane Krais ne au nineꞌiyei ne toteyei su, fene yo seni apou ape irote.o
19 Ane lu werese taune se ape mo maꞌe peri ta au teꞌesiya. Fene taune fene lo marepi erasi aꞌi tote wawesiyenamite. Fene ai marepi lowe maꞌe owe ape totenamite. Ahowa, fene lowe maꞌe marepi momotei fetane aꞌi ironamite.p
20 Ane eimane werese maꞌe peri ta au teꞌesiya. Etiri werese sahe fene tai mai fene lo lo peri wanu tote umasinamite. Fene peri lowe lo wanu umasiyei su, Owane Sitewi fene ne marepi erasi aꞌi au tote wisereye nineꞌirowa.q
21 Ane tai werese maꞌe peri ta au teꞌesiya. Fene ai peri yahowaꞌi eimane fene lo se owe ape teꞌete. Fene marepi lowe lo tote luwaruweyei su, lowe mi mi weriyei marepi luwaru orese aꞌi teritenamitorowa.r
Ane wiyawi yahowaꞌi siye lu Krais ne tote tawesisiya ape maꞌe au teꞌesiya.
22 Ane lu taune wiyawi yahowaꞌi, taꞌanesiya ape, peri ta au teꞌesiya. Etiri werese sahe fene meni owane fene lo, lo peri wanu umasinamite. Fene hi awei sahe irosiya su, lowe fene au noweinoweirowa. Fene apou owe ape totete. “Meni owane ano ane siyesiya su, serai ane wiyawi lo taꞌane tohoteyei. Le wiyawi ano siyeyei su, le ane maꞌe au ei nineꞌirowa.” Ahowa, fene owe ape totere. Meni owane fene lo eyeri maꞌe irosiya su, fene aiwawe aꞌi wiyawi lo ani tohotenamite. Fene le maꞌe owe ape arearete. Piyene awere? Fene Krais lo yo seni umasisiya su, fene Meni Owane Pefine aꞌi iyape lo teꞌe ani arowete.s 23 Sosu aiwawe aꞌi fene wiyawi werese taꞌanesiya ape, fene wiyawi wisere pefine aꞌi taꞌane tohotete. Sosu apou totere, “Wiyawi ape ane taꞌanesiya ape, ane Meni Owane Pefine lo wiyawi taꞌanesiya. Ane awei lo meni owane ne wiyawi taꞌaneyei wou taꞌame.” 24 Fene wiyawi werese fene lo taꞌaneyei su, fene marepi apou tote anite tawesite. “Meni Owane Pefine lai fene etiri wisere aꞌi lu taune maꞌe au ariariye naneiye ape aurowa. Fene Meni Owane Krais lo wiyawi taꞌanesiya.” 25 Sosu aiwawe aꞌi lu taune tamo yo seni luwaru aꞌi irowei su, Krais lai lowe maꞌe fofowei erasi itiyaꞌu aurowa. Ei, lu taune tereꞌe werese yo seni luwaru aꞌi iroteyei su, Owane Krais lai lowe taꞌi taꞌi aꞌi fofowei erasi lowe maꞌe itiyaꞌu aurowa. Meni Owane Krais lai marepi taꞌi aꞌi lo se lu taune werese maꞌe au hese ereirowa. Lu hesi yo seni luwaru aꞌi irowei su, Krais lowesi taꞌi taꞌi aꞌi maꞌe ai marepi toterowa. Ahowa, le meni ta fofowei erasi aurowata. Sosu meni tereꞌe ta fofowei erasi aweraꞌiyenatirowa.t