2 Ane fene werese maꞌe teꞌesiya. Fene Owane Sitewi maꞌe mi mi weriyei teꞌe towerinamite. Fene Owane Sitewi maꞌe teꞌe toweriteyei su, Owane Sitewi ne erasi aꞌi tote etinamite. Fene Owane Sitewi maꞌe au teꞌe toweriteyei su, fene Owane Sitewi maꞌe au teꞌe wisereye nineꞌinamite.^b 3 Sosu aiwawe aꞌi fene nomo ne Owane Sitewi maꞌe au teꞌe towerinamite. Fene apou au teꞌe towerire, “Owane Sitewi, ne Pol sosu Timoti ne au pati ferafereire. Serai lowe peri no lu taune maꞌe au teꞌe fiyari areiyerowa. Aiwawe aꞌi ne lowe maꞌe peri fareyareye aꞌi Krais ne au teꞌeyei ne au pati anire. Serai lowe peri pefine aꞌi lu taune maꞌe au teꞌe fiyari areiyerowa.” Ane Owane Sitewi lo peri pefine aꞌi lu taune maꞌe au teꞌeye su, lu tamo ane kalabus wesi maꞌe hene ani fu aroweye.^c 4 Serai fene ane ne Owane Sitewi maꞌe apou au teꞌe towerire. Ane Owane Sitewi lo peri pefine aꞌi au teꞌeyei su, ane lu taune maꞌe peri pefine ape amerame aꞌi au teꞌe areiyerowa.

5 Sosu aiwawe aꞌi fene lu taune tereꞌe Krais lo yo seni umasi taꞌame ape, ponei sahe iroteyei su, fene marepi wisere aꞌi se totete. Fene yo seni luwaru aꞌi lowe lo apou ape owe ape tote umasite. Fene weriyei weriyei Krais lo yo seni wisere aꞌi lowe maꞌe au atuatu areiyete. Lowe yo seni aseyaro fene lo siyeyei su, lowe Krais ne tote tawesi umasirowa.^d 6 Fene lu taune maꞌe Owane Sitewi lo peri au teꞌeyei su, fene marepi wisere aꞌi se, sosu marepi momotei fetane aꞌi se au teꞌe areiyete. Serai lu taune tamo fene maꞌe peri ta teꞌe toweriyei su, fene faraꞌu peri pefine farere aꞌi lowe maꞌe itiyaꞌu au teꞌere.^e

7 Ane meni Tikikus fene maꞌe eimawesawirowa. Le Krais lo kaiyemo pefine aꞌi nomo lo ne. Le mi mi weriyei Krais lo wiyawi taꞌanenamisiya. Sosu le ane aiwawe aꞌi notosi Meni Owane Pefine lo wiyawi lu ne. Serai le fene maꞌe heneraiyei su, le etiri werese ane maꞌe henerai ape, fene maꞌe au teꞌe soꞌoruwerowa.^f 8 Serai ane meni ape fene maꞌe eimawesawirowa. Le fene maꞌe heneriyei su, le fene maꞌe etiri nomo lo ne au teꞌe soꞌoruwerowa. Ane le marepi momotei fetane aꞌi fene maꞌe au teꞌe wisereyeyei ne eimawesawirowa.^g 9 Sosu ane meni tereꞌe, iyape Onesimus, le mase fene maꞌe eimawesawirowa. Meni ape Krais lo yo seni umasinamisiya. Sosu le kaiyemo pefine aꞌi nomo lo ne. Le Kolosi lo weneri fene lo ne. Lowesi fene maꞌe heneriyei su, lowesi fene maꞌe etiri werese nomo maꞌe henerai ape au teꞌe soꞌoruwerowa.^h

10 Sosu aꞌi pe nomo lu taune maꞌe au teꞌe wisereye nineꞌisawisiya. Meni Aristarkus fene maꞌe au teꞌe wisereye nineꞌisawisiya. Le ane mase kalabus wesi sahe irosiya. Sosu meni Mak aiwawe aꞌi fene maꞌe au teꞌe wisereye nineꞌisawisiya. Tu naifa ane le ne fene maꞌe peri ta au teꞌesawi. Le fene maꞌe heneriyei su, fene le maꞌe eritere. Meni ape Barnabas lo airu feni ne.ⁱ 11 Sosu meni tereꞌe ta Jisas iyape tereꞌe Jastus, le fene maꞌe au teꞌe wisereye nineꞌisawisiya. Lu ape mo Jastus, Mak, sosu Aristarkus, lowe Juda lo lu tewi aꞌi Krais lo yo seni tote umasinamisiya. Lowe Owane Sitewi lo marepi toteyei werese ane mase au taꞌanesiya. Lowe marepi wisere aꞌi ane maꞌe au feraferei kairefiyesiya.

12 Sosu aꞌi pe meni tereꞌe omo Kolosi maꞌe fai ape, iyape Epafras, fene maꞌe au teꞌe wisereye nineꞌisiya. Le Meni Owane Jisas Krais lo wiyawi meni ne. Le mi mi weriyei fene ne Owane Sitewi maꞌe au teꞌe towerinamisiya. Le Owane Sitewi maꞌe au teꞌe towerinamisiya su, le apou eisiya. “Owane Sitewi lai tote tawesiyei fene lo fa tei kairefiyete.” Sosu fene Owane Sitewi lo marepi werese siye soꞌoruwerowa.^j 13 Meni ape lai fene ne marepi erasi aꞌi tote wawesiyenamisiya. Le fene maꞌe wiyawi erasi aꞌi tohote feraferei taꞌane tohoteteye. Sosu lu taune Krais ne tote tawesisiya ape, omo Laodisia, sosu Omo Hierapolis irosiya ape, le lowe maꞌe wiyawi erasi aꞌi au feraferei taꞌaneteye. 14 Meni Demas sosu meni Luk, lowesi fene maꞌe au teꞌe wisereye nineꞌisiya. Luk kaiyemo nomo lo ne. Le lu taune u tahe au taꞌane faraꞌuweteye. Serai nomo werese le ne marepi erasi aꞌi tote wawesiyenamiteye.^k

15 Fene nomo ne lu taune Krais ne tote tawesisiya ape, omo Laodisia irosiya ape, au teꞌe wisereye nineꞌire. Aiwawe aꞌi fene menitani Nimfa maꞌe sosu lu taune wesi lo maꞌe Krais maꞌe au teꞌe wisereye nineꞌiyei ne taꞌuweye ape, fene lowe maꞌe au teꞌe wisereye nineꞌire. 16 Sosu fene one towe eite siye teꞌe tepaꞌasiyei su, fene lu taune omo Laodisia sahe irosiya ape, one towe eite lowe maꞌe ausawire. Sosu aiwawe aꞌi ane one towe tereꞌe ta Laodisia lo lu taune maꞌe leseye. Lowe one towe ape siye teꞌe tepaꞌasiyei su, lowe fene maꞌe ausawiyei. Fene one towe eite aniyei su, fene one towe ape siye teꞌe umasinamite. 17 Sosu fene meni Arkipus maꞌe apou teꞌere, “Wiyawi ape Meni Owane Pefine lai ne maꞌe auwe ape, ne au heteta noweinowei tepaꞌasite.”^l 18 Sosu ane Pol fene maꞌe au teꞌe wisereye nineꞌisiya. Ane peri yeꞌewi eite ereti topo ano se leseye. Ane kalabus wesi sahe irosiya. Serai fene ane ne Owane Sitewi maꞌe teꞌe towerinamite. Owane Sitewi lo marepi wisere fetane aꞌi fene maꞌe mi mi weriyei fa ironamite. Peri papera.^m