2 Mi mi pasi pasi nomo fene werese ne Owane Sitewi maꞌe au teꞌe wisereyesiya. Nomo fene werese ne Owane Sitewi maꞌe au teꞌe towerisiya. 3 Nomo mi mi pasi pasi etiri fene lo tote tawesiyei, fene etiri wisere aꞌi irowe ape, nomo Owane Sitewi, Tai nomo lo hire onusiya ape, au teꞌeteye. Sosu marepi erasi aꞌi fene lo totenamisiya. Serai wiyawi fene lo lu taune tereꞌe tereꞌe au noweinowei irowe ape, Owane Sitewi maꞌe au teꞌesiya. Sosu fene Meni Owane Jisas Krais hi awei maꞌe si tame itorairowa ape, ninawesiya. Nomo etiri eite mo ne Owane Sitewi maꞌe au teꞌesiya.^b 4 Sosu kaiyemo mo nomo lo, Owane Sitewi fene ne totenamisiya. Nomo etiri ta siye soꞌoruwesiya. Owane Sitewi lai fene werese ani ariariyeye. 5 Nomo fene mase iroteye su, nomo fene maꞌe Owane Sitewi lo peri au teꞌe fiyariteye. Owane Sitewi lo peri ape peri yahowaꞌi aꞌi taꞌama. Owane Sitewi lo peri kairefi wiyeme aꞌi se au teꞌeye. Owane Sitewi lo Hepene Waraꞌi aꞌi se aiwawe aꞌi au teꞌeye. Owane Sitewi lo peri tote tawesiyei fene lo kairefiyeteye. Nomo fene mase iroteye su, fene yo seni nomo lo werese siyeteye. Yo seni nomo lo waraꞌi aꞌi iroteye. Nomo fene werese au noweinoweiteye.^c 6 Fene Owane Sitewi lo peri wanuwe su, lu tamo fene maꞌe au luwaruweye. Ahowa, fene Owane Sitewi lo peri wanuwe su, fene werese yo seni nomo lo, umasinamiteye. Owane Sitewi lo Hepene Waraꞌi aꞌi fene maꞌe marepi wisere aꞌi au irowe.^d 7 Fene Owane Sitewi lo marepi umasiteye su, lu taune werese Owane Sitewi lo peri tote tawesiye ape, Pani Masedonia sahe, Pani Grik sahe yo seni fene lo werese wanu umasinamiye. 8 Fene Owane Sitewi lo peri lu taune werese werese maꞌe au teꞌe areiyeye. Lu taune werese maꞌe omo pani Masedonia, omo pani Akaia, irosiya ape, sosu omo werese werese sahe Owane Sitewi lo peri, fene tote tawesiye ape, au teꞌe areiyeye. Fene Owane Sitewi lo peri au teꞌe fiyariye su, serai nomo wiyawi ape taꞌaneyei wou taꞌama. 9 Lu taune werese fene ne nomo maꞌe au teꞌesai. Peri fene lo ape ne apou aiwawe aꞌi ne. Nomo fene aiwawe iroteye su, fene lai nomo au isafiyeteye. Sosu fene god wawero lo etiri werese fu arosawi. Sosu Owane Sitewi lo marepi umasiteye. Owane Sitewi lo marepi umasiteye su, fene Owane Sitewi lo wiyawi taꞌane tohoteteye. Owane Sitewi lai, weriyei weriyei irosiya ape, le pefine aꞌi ne. 10 Peri fene lo ne aiwawe aꞌi Owane Sitewi lai meni eime lo fisiye yo sahe si tame taꞌane norohuwe hene aniye. Nowe tasu le hi awei maꞌe si tame itorairowa. Fene lai meni ape si tame itorairowa ape, ninawesiya. Serai le aiyerowa su, le nomo au noweinoweinamirowa. Sosu nomo werese Owane Sitewi lo ai marepi aweraꞌiyenatirowa.