Pol lo wiyawi Omo Tesalonaika sahe taꞌaneteye.
2
Kaiyemo mo werese, etiri ape mo fene soꞌoruwesiya. Nomo fene maꞌe sewiyeyei ne fai su, nomo aiyeteyei nomo lo yahowaꞌi aꞌi henerai taꞌama. 2 Ahowa! Tu nomo Omo Filipai saro iroteye su, nomo fofowei erasi teriteye. Lu owane tamo nomo me au se aineteye. Fene werese peri ape wanu soꞌoruwe tepaꞌasiye. Sosu nomo fene mase iroteyei ne fai su, Owane Sitewi lai kairefi lo mase nomo au pati ferafereiteye. Lu taune tomu neꞌese peri nomo lo einamiyei ne toteteye. Ahowa, nomo fene maꞌe Owane Sitewi lo peri au teꞌe fiyari areiyeteye.a 3 Nomo fene maꞌe peri au teꞌe fiyariye su, nomo peri wawero ta au teꞌe taꞌame. Sosu marepi nomo lo unou aꞌi se, nomo au teꞌe fiyari taꞌame. Nomo fene maꞌe yo seni areareyei se au teꞌe taꞌame. 4 Ahowa, Owane Sitewi lai nomo maꞌe wiyawi lo ape auwe. Serai nomo Owane Sitewi lo peri au noweinoweisiya. Serai nomo Owane Sitewi lo peri au teꞌe fiyariye su, nomo lu taune maꞌe peri hawi aꞌi se teꞌe se taꞌame. Ahowa, nomo Owane Sitewi lo peri wiyeme au teꞌesiya. Owane Sitewi lai marepi werese nomo lo siye soꞌoruweye.b 5 Ahowa, peri wisere aꞌi au teꞌeye su, nomo peri hawi aꞌi au teꞌe taꞌame. Fene wanu soꞌoruwe tepaꞌasiye. Sosu Owane Sitewi lai marepi nomo lo siye soꞌoruweteye. Nomo maꞌaru fene lo siye wisereyeyei ne tote taꞌame. Nomo marepi kuseriyei tamo mase aiye fareyare taꞌame. Owane Sitewi lai marepi farere aꞌi nomo lo siye soꞌoruweteye. 6 Ahowa, nomo lu iyape se iro taꞌame. Nomo iyape nomo lo fene ei ani arowei wou taꞌama. Aiwawe aꞌi nomo iyape nomo lo lu taune tereꞌe ei ani arowei wou taꞌama. Peri wiyeme aꞌi ne! Jisas Krais lai ane peri lo au teꞌe fiyariyei ne eimawesawi. Ane Jisas mi mi weriyei umasinamiteye. Serai ane faraꞌu iyape ano se fene maꞌe ei ani aroweyei. Ahowa ane iyape ano ei ani aroweyei wou taꞌama. Ane meni yahowaꞌi aꞌi ne.7 Nowe ape se nomo fene mase iroteye su, nomo yo seni momotei aꞌi iroteye. Aiwawe mai ta eimane werese lo au noweinoweiteye. 8 Sosu nomo fene werese ne marepi erasi aꞌi tote wawesiyenamisiya. Serai nomo fene maꞌe Owane Sitewi lo peri au teꞌeye su, nomo marepi wisere aꞌi teriteteye. Sosu nomo fene maꞌe Owane Sitewi lo peri au teꞌe fiyariye. Nowe ta su nomo faraꞌu fene ne au pati feraferei taꞌanerowa. Etiri luwaru aꞌi fene maꞌe heneraiyei su, nomo marepi erasi aꞌi fene ne tote wawesiyenamisiya. Hepene nomo lo fene aiwawe aꞌi ironamisiya. Nomo fene werese ne marepi erasi aꞌi tote wawesiyenamisiya. 9 Kaiyemo mo nomo lo, tu naifa nomo fene mase iroteye su, fene yo seni nomo lo siye soꞌoruweteye. Nomo mi mi pasi pasi wiyawi tohote taꞌaneteyewe, maꞌaru tamo aniteye. Sosu nomo ayei tamo eteye. Nomo fene maꞌe ayei tamo ei tatai ani taꞌame. Ahowa, nomo wiyawi taꞌaneye su, nomo fene maꞌe Owane Sitewi lo peri au teꞌe fiyariteye.c 10 Fene lai Owane Sitewi aiwawe aꞌi etiri eite mo apou siyeye. Nomo wiyawi taꞌane tohoteye. Nomo Owane Sitewi lo marepi umasiteye. Aiwawe aꞌi nomo yo seni farere aꞌi umasiteye. Sosu nomo yo seni aseyaro aꞌi fene maꞌe, Jisas lo peri umasiteye ape, au iroteye. 11 Fene etiri eite siye soꞌoruwe tepaꞌasiye. Nomo fene au noweinoweiteye. Apou aiwawe aꞌi tai tamo eimane werese lo au noweinoweisiya. Fene yo seni ape siye soꞌoruwesiya. Fene etiri luwaru aꞌi tamo heneraiyei su, nomo peri wisere aꞌi au teꞌeteye. Sosu yo seni farere aꞌi au teꞌe atuatuteye. 12 Nomo peri wisere aꞌi fene maꞌe au teꞌeteye. Fene werese Owane Sitewi lo marepi fu umasinamite. Owane Sitewi lai fene omo lo maꞌe ei aniye. Sosu mi kairefi lo se fene maꞌe napetuwe.d
13 Serai nomo Owane Sitewi maꞌe mi mi pasi pasi au teꞌe nineꞌi wisereyeyei. Fene Owane Sitewi lo peri, nomo au teꞌeteye ape, wanu tote tawesi umasinamiteye su, fene peri ape wanu tote tawesiteye. Marepi fene lo apou toteye, peri ape Owane Sitewi lai au teꞌe areiyeteye. Peri ape meni lo marepi maꞌe fai taꞌama. Owane Sitewi lai peri lo au teꞌesai. Owane Sitewi lo peri ape lai fene werese, Jisas lo yo seni umasinamisiya ape, marepi hepene fene lo ani atati aresaiyeteye.e 14 Sosu kaiyemo mo nomo lo, fene lai Jisas lo lu feni werese, pani Judia irosiya ape, yo seni lowe lo umasiteye. Lu feni ape Owane Sitewi lo marepi tote tawesi umasinamiteye. Juda lo lu tewi tamo lu feni ape maꞌe yo seni luwaru aꞌi au irowe. Fene aiwawe aꞌi lu tewi fene lo tamo, lowe fene maꞌe yo seni luwaru aꞌi au irowe.f 15 Juda lo lu tewi ape mo, lowe Jisas me tapeꞌi sahe aine teraꞌeye. Aiwawe aꞌi lowe Owane Sitewi lo au teꞌe siye lu tamo aine teraꞌeye. Lu tewi ape lai nomo omo pani ape nowe maꞌe ani fu arosawi. Serai Owane Sitewi lai lu tewi ape ne ai marepi totenamiteye. Ahowa, lu tewi ape lu taune werese maꞌe ai atu tiyatiteye.g 16 Nomo lu tewi tereꞌe Owane Sitewi lo peri au teꞌe fiyariye su, Juda lo lu tewi ape lai ahi nomo lo au einamiyei ne toteye. Lowe lu tewi tereꞌe, Jisas lo peri umasiteye ape, einamiyei ne toteye. Juda lo marepi sahe yo seni luwaru aꞌi temeꞌeriyeye. Yo seni luwaru aꞌi temeꞌeriyeye su, Owane Sitewi lai lowe maꞌe ai marepi erasi toteye.
Pol lu taune Omo Tesalonaika sahe tame sewiyeyei ne toteye.
17 Sosu aꞌi pe kaiyemo mo werese, nomo fene maꞌe sewiyeyei ne totesiya. Ahowa, nomo lai nihari fene lo siyerowata. Juda lo lu tewi lai yo nomo lo einamiye. Serai nomo nihari fene lo siyerowata. Ahowa, marepi nomo lo fene ne marepi erasi aꞌi tote wawesiyenamisiya. Serai nomo nihari fene lo siyeyei ne tohotesiya. 18 Nomo fene maꞌe aiyeyei ne totesiya. Ane, Pol, nowe tomu neꞌese fene maꞌe sewiyeyei ne toteye. Ahowa, sepei Satan lai yo ano einamiye. 19 Fene aꞌi lai marepi waraꞌi aꞌi, nomo ninawesiya ape, fene aꞌi lai marepi nineꞌiyei nomo maꞌe ausiya. Sosu fene Jisas ne tote tawesiye su, nomo fene ne marepi erasi aꞌi totenamiteye. Serai Meni Owane Jisas Krais si tame itorairowa su, le nomo maꞌe marepi nineꞌiyei aitairowa.h 20 Wiyeme aꞌi ne. Fene aꞌi lai marepi wisere aꞌi nomo lo irosiya. Fene Jisas lo marepi umasiteye su, Owane Sitewi lai nomo maꞌe iyape se auwe.