3
Nomo nihari fene lo siyerowata su, nomo peri heneruwe fene ne wanuwei ne totesiya. Serai nomo peri heneruwe fene lo ne ninawe noꞌotiteye. Serai nomo marepi orese aꞌi fene ne teriteteye. Sosu nomo omo Atens saro iroteye su, nomo peri fene lo ne ninaweteye.a 2 Sosu notosi meni Timoti kaiyemo nomo lo, meni ape Krais lo peri au teꞌeteye ape, fene maꞌe eimawesawiyei. Fene maꞌe aiyeyei su, marepi fene lo au kairefiyerowa. Sosu aiwawe, etiri luwaru aꞌi fene maꞌe heneraiyei su, le marepi hepene fene lo peri fetane aꞌi au teꞌerowa.b 3 Ahowa, lu tewi tamo fene maꞌe au luwaruweyei su, fene lai faraꞌu kairefi aꞌi teitorowa. Fene etiri eite mo apou siye soꞌoruwerowa. Wiyeme aꞌi etiri luwaru tomu neꞌese aꞌi nomo werese maꞌe henerairowa.c 4 Pefine aꞌi nomo fene mase tu iroteye su, mi mi werese nomo fene maꞌe apou au teꞌeteye, “Lu tewi tamo etiri luwaru aꞌi nomo werese maꞌe au irorowa.” Serai lu tewi tamo fene maꞌe au luwaruweye su, fene peri nomo lo tote anite tawesiye. Fene etiri ape soꞌoruwesiya. 5 Serai wiyeme aꞌi ane peri heneruwe fene lo ne ninawe noꞌotiteye su, ane meni ta fene maꞌe eimawesawi. Fene Jisas lo marepi tote tawesisiya awere? Ane meni ape peri heneruwe fene lo ne wanuwei ne eimawesawi. Ane sepei Satan marepi fene lo luwaruweyei ne atoweiyesiya. Satan marepi fene lo au luwaruweyei su, wiyawi nomo lo yahowaꞌi aꞌi heneraiyei.Timoti peri heneruwe Pol maꞌe au teꞌesai.
6 Sosu aꞌi pe Timoti fene arunatiyewe, sosu si tame fai su, le peri heneruwe wisere aꞌi fene lo ne notosi maꞌe au teꞌerai. Marepi fene lo kairefi aꞌi teisiya. Aiwawe fene lu taune werese au noweinoweisiya. Sosu fene mi mi werese nomo ne marepi erasi aꞌi tote wawesiyenamisiya. Fene nihari nomo lo siyeraiyei ne totesiya. Apou aiwawe aꞌi nomo nihari fene lo siyeriyei ne totesiya.d 7 Serai wiyeme aꞌi kaiyemo mo werese, nomo etiri luwaru aꞌi, sosu fofowei erasi teritenamisiya su, meni ape nomo maꞌe marepi tote tawesiyei fene lo au kairefiyeyei teꞌerai. Serai fene marepi nomo lo wisere aꞌi au irowe. Marepi tote tawesiyei fene lo ape kairefi aꞌi teisiya.e 8 Pefine aꞌi fene werese Jisas lo marepi kairefi aꞌi umasinamiyei su, nomo weriyei weriyei marepi erasi aꞌi fene ne au tote nineꞌinamitorowa. 9 Nomo fene ne Owane Sitewi maꞌe au teꞌe wisereye nineꞌinamirowa. Fene lai nomo maꞌe marepi wisere aꞌi au irowe. Sosu aiwawe aꞌi, nomo Owane Sitewi maꞌe marepi wisere erasi aꞌi itiyaꞌu auwei. 10 Sosu mi mi pasi pasi nomo Owane Sitewi maꞌe nihari fene lo siyeyei ne teꞌe toweriteye. Sosu nomo fene maꞌe sewiyerowa. Fene Owane Sitewi ne tote tawesiyei fene lo kairefi aꞌi ne. Ahowa, fene Owane Sitewi ne tote tawesiyei fene lo tewi oso aꞌi irosiya su, nomo marepi tote tawesiyei fene lo au kairefiyeyei.
11 Sosu aꞌi pe nomo Owane Sitewi Tai nomo lo sosu Meni Owane Jisas aiwawe aꞌi, lowesi maꞌe apou teꞌe toweriyei, “Faraꞌu fenesi nomo lu feni fenesi lo maꞌe omo Tesalonaika sahe eimawesawirowa awere?”f 12 Sosu Meni Owane Pefine aꞌi lai fene ne marepi erasi aꞌi tote wawesiyenamiyei. Le marepi fene lo au kairefiyerowa. Serai fene lai lu taune taꞌi taꞌi aꞌi marepi erasi aꞌi tote wawesiye tiyatinamite. Aiwawe fene lu taune werese marepi erasi aꞌi tote wawesiyenamite. Apou aiwawe nomo fene werese ne marepi erasi aꞌi tote wawesiyenamisiya. 13 Sosu Jisas Meni Owane nomo lo lu feni werese, le ne umasinamiteye ape, hi awei maꞌe si tame itorairowa su, Owane Sitewi lai marepi hepene fene lo au ani kairefiyerowa. Nomo Owane Sitewi tai nomo lo sahe teitorowa su, Owane Sitewi lai yo seni pefine aꞌi lo marepi aseyaro fene lo papu irorowa. Owane Sitewi lo nihe se yo seni werese nomo lo waraꞌi aꞌi irotorowa.