Owane Sitewi lai yo seni farere aꞌi siyereme.
4
Peri yeꞌewi kaiyemo mo, nomo fene maꞌe yo seni werese fene lo au teꞌe atuatuteye. Fene yo seni aseyaro aꞌi irowei su, Owane Sitewi fene ne au wisereye nineꞌiyei. Nomo fene mase iroteye su, fene peri nomo lo wanu umasiteye. Fene yo seni aseyaro aꞌi ironamiteye. Sosu nomo kairefi aꞌi se tame teꞌe towerisiya. Fene werese Owane Sitewi lo marepi fu iro tohote umasinamite. 2 Sosu fene Owane Sitewi lo marepi werese, nomo Jisas lo kairefi se au teꞌeteye ape, wanu soꞌoruwesiya. 3 Owane Sitewi lo marepi fene ne apou toteye. Fene Owane Sitewi lo marepi werese fu umasinamite. Fene Owane Sitewi lo peri wanuteye su, fene tafaꞌe yo seni luwaru aꞌi owe ape irote.a 4 Sosu fene tani naituwei su, fene taꞌi taꞌi aꞌi Owane Sitewi lo yo seni aseyaro aꞌi fu umasite. Fene aiwawe yo seni farere aꞌi irote. 5 Ahowa, lu taune tereꞌe, Owane Sitewi lo marepi umasi taꞌame ape, lowe taune werese siye wisereyeye. Fene lai yo seni apou ape owe ape umasite.b 6 Fene werese lu tamo maꞌe etiri luwaru aꞌi owe ape irote. Ahowa, fene kaiyemo mo werese maꞌe owe ape arearete. Fene meni tereꞌe ta lo tani maꞌe tafaꞌe yo seni luwaru aꞌi owe ape irote. Fene etiri luwaru aꞌi apou ape irowei su, Owane Sitewi lai fene maꞌe etiri orese aꞌi itiyaꞌu aurowa. 7 Ahowa, Owane Sitewi lai nomo werese ei ariariyeye. Serai nomo werese yo seni luwaru aꞌi apou ape owe ape irote. Nomo Owane Sitewi lo marepi fu umasite.c 8 Wiyeme aꞌi. Meni ta yo seni amou meꞌiyeni maꞌe atati arunatiyei su, le awei lu lo marepi umasinamiyei. Ahowa, le lai Owane Sitewi, fene maꞌe Hepene Waraꞌi aꞌi lo eimawesai ape, le lai Owane Sitewi ne meꞌiyeni maꞌe atati arunatiyei. Owane Sitewi lo Hepene Waraꞌi aꞌi fene maꞌe yo seni aseyaro aꞌi au teꞌe atuatuwei ne itorai.dFene yo seni aseyaro aꞌi fa iro kairefiyenamite.
9 Sosu aꞌi pe fene Jisas lo lu feni werese marepi erasi aꞌi tote wawesiye tiyatinamisiya. Serai nomo peri ape teꞌe areiye taꞌame. Fene etiri ape wanu soꞌoruwe tepaꞌasiye. Owane Sitewi lai fene maꞌe etiri ape teꞌe areiyeye.e 10 Wiyeme aꞌi! Fene lai lu feni werese maꞌe pani Masedonia sahe marepi erasi aꞌi tote wawesiyenamiye. Sosu kaiyemo mo, nomo peri kairefi aꞌi se fene maꞌe teꞌesiya. Fene lu taune werese maꞌe marepi erasi fu tote wawesiyenamite. 11 Sosu etiri werese fene irowei ape, fene mi mi werese marepi momotei aꞌi ironamite. Fene yo seni luwaru aꞌi owe ape irote. Aiwawe aꞌi fene etiri fene lo au iro noweinoweite. Fene wiyawi werese ereti towafi fene lo se taꞌanete. Serai fene lu tamo tereꞌe maꞌe marepi orese aꞌi owe ape au irote. Peri ape mo nomo fene maꞌe au teꞌe areiye tepaꞌasiye.f 12 Serai fene etiri towafi fene lo poꞌute taꞌame. Wiyeme aꞌi fene yo seni ape umasiteyei su, lu taune, Jisas lo peri umasi taꞌame ape, fene ne au tote wisereyeyei.
Meni Owane Pefine aꞌi si tame aiyerowa.
13 Kaiyemo peri ano wanure. Fene peri ape fu wanu soꞌoruwere. Lu taune tamo temeniye tepaꞌasiye. Fene lowe ne ewiteyei erasi owe ape irote. Fene faraꞌu marepi orese oso aꞌi teriteyei. Lu taune tomu neꞌese Jisas lo yo peri umasi taꞌame ape, lowe ewiteyei erasi aꞌi au irowe. Fene yo seni apou ape owe ape umasite. 14 Nomo etiri ta soꞌoruwe tepaꞌasiye. Meni Owane Jisas me tapeꞌi sahe temeniyeye. Nowe hesi heta i tepaꞌasiye su, Owane Sitewi lai le si tame taꞌane norohuwe sineye. Owane Sitewi lai nomo maꞌe peri teꞌe naneiteye. Nomo Jisas lo peri wanu tote tawesi umasinamiteyei su, Owane Sitewi lai nomo, temeniyeyei ape, si tame taꞌane norohuwe sinerowa. Apou aꞌi, le Jisas si tame taꞌane hene ani sineye. Owane Sitewi lai nomo maꞌe peri teꞌe naneiye su, etiri wiyeme aꞌi henerairowa.g 15 Owane Sitewi lai ane maꞌe peri ape au teꞌeye. Serai ane peri ape Owane Sitewi ane maꞌe au teꞌeye ape, fene maꞌe au teꞌesiya. Le apou eiye, “Meni Owane Jisas si tame itorairowa su, lu taune werese, tu temeniyeye ape mo, le lowe werese, peri lo ne wanu umasiteye ape, si tame taꞌane norohuwe hene anirowa. Sosu le nomo werese Jisas lo peri wanu umasinamiteye ape, le nomo hepene se nomo moꞌo hene anirowa.”h 16 Sosu aꞌi pe Owane Sitewi Pefine aꞌi lai si tame itoraiyei su, le peri kairefi aꞌi hare uterowa. Sosu aiwawe aꞌi Owane Sitewi lo ipari tutawe peri erasi hare uterowa. Sosu aiwawe noꞌu erasi Owane Sitewi lo mapefuwe faterowa. Noꞌu wanuwei su, Krais lo lu taune temeniye tepaꞌasiye ape, le lowe werese tu si tame taꞌane norohuwe hene ani wirowa. 17 Sosu moꞌo nomo sato irosiya ape, Jisas lai nomo werese niꞌarawe hire maꞌe hene ani wirowa. Sosu nomo lu taune werese tu wiye ape, mase niꞌarawe maꞌe taꞌuwerowa. Serai nomo werese weriyei weriyei Jisas mase ironamitorowa. 18 Serai fene lu taune taꞌi taꞌi maꞌe peri ape au teꞌe wisereye fetaneyere.