Krais si tame irorairowa ape ne, fene tei taꞌuwe naneite.
5
Sosu aꞌi pe nowe ape se, sosu nowe aiwawe etiri werese henerairowa ape, fene nowe ape mo ne fene wanu soꞌoruwe tepaꞌasiye. Serai nomo peri ape mo one towe sahe fene maꞌe leserowata. 2 Wiyeme aꞌi fene taꞌu nowe eite se, Jisas si tame itorairowa ape, eresene aꞌi taꞌarei meni wou aꞌi wesi ta sahe eresene aꞌi toso wiyei su, etiri tamo taꞌarei anirowa.a 3 Lu taune tomu neꞌese apou teꞌesiya, “Siyete, etiri werese wisere aꞌi irosiya. Nomo werese marepi fetane aꞌi irosiya.” Ahowa! Nowe ape se etiri orese luwaru aꞌi lowe werese maꞌe itorairowa. Apou aꞌi menitani ta meni eime auteiyei ape, le fofowei erasi teriterowa. Nowe eite se lowe werese orese aꞌi itero aweraꞌiyenatirowata.b 4 Ahowa, kaiyemo mo, fene werese pasi aꞌi iro taꞌame. Fene mi mi pasi pasi siye eti ninawesiya. Serai nowe ape se fene maꞌe eresene aꞌi henerairowata, taꞌarei meni ta wou aꞌi ne. 5 Fene werese, Owane Sitewi lo eimane umasinamisiya ape, mi erasi sahe irosiya. Nomo werese pasi aꞌi iro taꞌame. Ahowa, nomo nowe pasiyeyei iro taꞌame.c 6 Serai nomo werese nihe owe ape howeite. Ahowa, lu taune tomu neꞌese pasi aꞌi nihe howeisiya. Nomo werese siye ninawe etire. Sosu aiwawe marepi nomo lo aseyaro aꞌi pei ironamite. 7 Wiyeme aꞌi. Lu taune, nihe howeiyei ape, pasi aꞌi nihe howeisiya. Lu taune saꞌi meremereye aꞌi ayei su, marepi lowe lo pasi aꞌi se meremereye irowei. 8 Ahowa, nomo poweiye mi sahe irosiya su, nomo marepi amerame aꞌi ironamire. Nomo uperi ani asiye. Uperi ape apou aꞌi Jisas ne tote tawesi umasisiya. Sosu nomo lu taune werese maꞌe marepi erasi aꞌi tote wawesiyenamisiya. Sosu nomo tiye ereti se aniteyei. Tiye ape se apou wou aꞌi Jisas lai nomo werese hene ani wirowa. Serai nomo nowe ape ninawesiya.d 9 Owane Sitewi lai nomo werese au ariariyeye. Serai nomo Owane Sitewi lo ai marepi aweraꞌiyenatiyei. Ahowa, marepi hepene heꞌi Meni Owane Jisas Krais auwe ape, fene mi mi weriyei ironamitorowa. 10 Meni ape, Jisas, nomo ne temeniyeye. Serai Jisas si tame itoraiyei su, nomo le mase weriyei weriyei ironamitorowa. Lu taune tamo temeniye tepaꞌasiye. Etiri faraꞌu aꞌi ne. Nomo werese hire maꞌe Jisas mase taꞌuweriyei. Sosu nomo weriyei weriyei le mase ironamirowa.e 11 Serai fene peri eite se lu taune werese taꞌi taꞌi aꞌi au teꞌe wisereye tiyatite. Sosu aiwawe aꞌi fene marepi lowe lo au kairefiyete. Pereye aꞌi fene apou aꞌi lowe maꞌe ironamisiya.Fene yo seni aseyaro irote.
12 Sosu aꞌi pe Kaiyemo mo werese, nomo peri ta fene maꞌe au teꞌesiya Fene lu tamo wiyawi fene mase taꞌanesiya ape, marepi wisere aꞌi totenamite. Lu tereꞌe tamo, Owane Sitewi lai fene ne au noweinoweiyei ne ariariyeye ape, fene marepi wisere aꞌi totenamite. Lu ape mo Owane Sitewi lo yo seni fene maꞌe au teꞌe atuatuwei. 13 Lowe fene mase wiyawi taꞌanesiya su, fene lowe werese marepi erasi aꞌi tote wawesiyenamite. Fene lu taune taꞌi taꞌi aꞌi maꞌe ai peri owe ape iro tiyatite. 14 Sosu kaiyemo mo, nomo peri kairefi aꞌi se fene maꞌe au teꞌesiya. Lu taune tamo wiyawi towafi lowe lo taꞌane taꞌame su, fene lai marepi lowe lo fu fareraiyere. Lu taune tamo atoweiye se, fene lowe peri wisereye au teꞌere. Sosu lu taune tamo tahe hawi aꞌi irosiya su, fene lowe pati ferafereire. Sosu aiwawe lu taune fene maꞌe peri luwaru aꞌi irowei su, fene lu taune werese maꞌe marepi momotei aꞌi au teꞌere.f 15 Meni ta fene maꞌe au luwaruweyei su, fene yo seni luwaru aꞌi ape itiyaꞌu owe ape irore.g 16 Fene marepi nineꞌiye weriyei weriyei au irote.h 17 Fene Owane Sitewi maꞌe weriyei weriyei au teꞌe teꞌe tiyatite. 18 Etiri werese ne fene Owane Sitewi maꞌe au teꞌe wisereye nineꞌite. Owane Sitewi lo marepi fene ne Meni Owane Jisas se iroteye.i 19 Owane Sitewi lo Hepene Waraꞌi aꞌi yehe wou aꞌi ne. Le marepi hepene fene lo papu irosiya. Fene marepi fene lo wiyawi lo owe ape ani fu arote.j 20 Owane Sitewi lai meni ta lo ahi se peri au teꞌeyei su, fene peri ape lo meꞌiyeni maꞌe owe ape atati arure. 21 Fene etiri werese siye eti hese ereire. Etiri ta wisere aꞌi fene anite tawesire. Etiri ta luwaru aꞌi fene fu arosawire.k 22 Etiri werese luwaru aꞌi fene itero aweraꞌiyenatire.
23 Sosu aꞌi pe nomo Owane Sitewi maꞌe au teꞌesiya, “Owane Sitewi, marepi fetane aꞌi auwe ape, ne marepi aseyaro fene ne au irore.” Sosu Owane Sitewi lai, hepene, tahe paꞌare werese fene lo au noweinoweiyei. Owane Sitewi lai fene werese au noweinoweiyei su, fene yo seni werese aseyaro henerairowa. Serai Meni Owane Jisas si tame itoraiyei su, fene werese marepi farere aꞌi iroteyei.l 24 Owane Sitewi lai fene werese, ei aniyei ape, marepi lo farere aꞌi ne. Owane Sitewi lai peri ta au teꞌeyei. Serai peri lo ape wiyeme aꞌi henerairowa. 25 Kaiyemo mo, fene nomo ne Owane Sitewi maꞌe au teꞌe towerite.m 26 Sosu fene Jisas lo lu feni werese maꞌe erite wisereyere. 27 Ane peri ta kairefi aꞌi se au teꞌeyei. Fene Jisas lo lu feni werese maꞌe one towe eite au siye teꞌere. 28 Meni Owane Jisas Krais lo ferafereiyei fene mase ironamiteyei.