3 Kaiyemo mo werese, nomo mi mi werese aꞌi Owane Sitewi maꞌe fene ne au teꞌe wisereyeyei. Wiyeme aꞌi marepi tote tawesiyei fene lo Owane Sitewi ne kairefi aꞌi henerai. Sosu aiwawe fene lai lu taune werese aꞌi marepi erasi aꞌi tote wawesiyenamisiya. Yo seni ape fene lo erasi aꞌi henerai. 4 Serai nomo fene ne lu taune werese aꞌi maꞌe au teꞌe ani aroweye. Piyene awere? Lu taune tamo fene maꞌe au luwaruweye su, sosu fene kalabus wesi maꞌe heneti su, fene werese kairefi aꞌi teinamiteye. Fene Owane Sitewi lo marepi aweraꞌiyenati taꞌame.^b

5 Lu tamo fene au luwaruweye su, fene tote tawesiyei fene lo tei kairefiyenamiteye. Serai nomo Owane Sitewi ne tote tawesiyei kairefi aꞌi fene lo wanuwe su, nomo Owane Sitewi maꞌe au teꞌe wisereyeye. Serai Owane Sitewi lai nomo maꞌe apou au teꞌe atuatusiya, Owane Sitewi lo yo seni werese wiyeme aꞌi tene! 6 Owane Sitewi lo marepi wiyeme aꞌi tene. Lu tamo fene maꞌe au luwaruwesiya su, Owane Sitewi lai lowe maꞌe itiyaꞌu au luwaruweyei. Nowe yeꞌewi se, le lai lowe maꞌe itiyaꞌu au luwaruweyei.^c 7 Sosu aꞌi Meni Owane Jisas si tamo itorairowa su, Owane Sitewi lai fene maꞌe marepi erasi aꞌi au fetaneyerowa. Le Owane Sitewi lo omo arunatirowawe, itorairowa su, lu taune werese Meni Owane Jisas yehe kairefi erasi aꞌi ape siyerowa. Le Owane Sitewi lo ipari wisere kairefi aꞌi aiwawe itorairowa.^d 8 Si tame itorairowa su, Jisas lai lu taune werese Owane Sitewi ne meꞌiyeni maꞌe atati aruwe ape, sosu Jisas lo peri heneruwe umasi taꞌama ape, le lowe werese maꞌe itiyaꞌu au luwaruwerowa.^e 9 Lu taune werese ape mo Owane Sitewi lai lowe maꞌe mi mi pasi pasi werese itiyaꞌu au luwaruwerowa. Lowe werese mi mi pasi pasi weriyei yehe omo maꞌe temeniyerowa. Owane Sitewi lai lowe werese yehe omo maꞌe eyeri erasi eimawesawi. Lowe weriyei weriyei fofowei erasi aꞌi teritenamitorowa. Lowe Owane Sitewi lo nihari, sosu kairefi lo, mi mase siyerowata.^f 10 Nowe ape se Jisas si tame itorairowa su, lu taune werese peri lo umasiye ape, lowe le maꞌe au teꞌe wisereyerowa. Lowe Owane Sitewi lo marepi tote tawesirowa ape, lowe kairefi lo maꞌe siye eti wisereyerowa. Fene aiwawe aꞌi, le siyerowa. Nomo Jisas lo peri teꞌe areiyeye su, fene peri lo wanu tote tawesi umasinamiteye.^g

11 Nomo fene ne Owane Sitewi maꞌe mi mi werese au teꞌe towerisiya. Nomo Owane Sitewi maꞌe fene ne apou teꞌe towerisiya, “Fene mi mi werese Owane Sitewi lo marepi fu umasinamite. Fene yo seni aseyaro fu irote. Sosu tote tawesiyei fene lo kairefi aꞌi teite.” Fene etiri ape mo irowei su, Owane Sitewi lai fene ne au teꞌe wisereyeyei.^h 12 Nomo Owane Sitewi maꞌe fene ne apou au teꞌesiya, “Owane Sitewi ne lu feni no omo Tesalonaika irosiya ape, Meni Owane Jisas lo iyape ei ani aroweyei ne au irore.” Sosu Jisas aiwawe aꞌi, le iyape fene lo ei ani aroweyei. Wiyeme aꞌi Owane Sitewi nomo lo Meni Owane Jisas Krais aiwawe ferafereiyei ape fene maꞌe neri aꞌi auwe.