Meni ape, yo peri arisinamiyei ape, henerairowa.
2
Sosu aꞌi pe nomo peri ta au teꞌeyei. Nowe ta su Meni Owane Jisas Krais si tame itorairowa su, Owane Sitewi lai lu taune werese, Jisas lo yo seni umasiye ape, le maꞌe si tame hene taꞌuwe anirowa. Serai nomo fene maꞌe, kaiyemo mo werese, au teꞌeyei. 2 Lu tamo fene maꞌe apou au teꞌeye su, “Jisas Krais si tame fai.” Peri wawero! Meni Owane lo nowe ape se henerai se taꞌame. Lu tamo apou teꞌeyei su, “Nomo Pol lo one towe aniye, le apou eiye, ‘Krais si tame fai.’” Aiwawe aꞌi lu tamo apou eiye, “Owane Sitewi lo ipari nomo maꞌe Jisas si tame itorai tepaꞌasiye ne, au teꞌeye.” Peri werese ape mo wawero aꞌi ne! Fene marepi fetane irote. Krais si tame fai taꞌama. 3 Lu tamo fene maꞌe owe ape arearere. Etiri tamo tutawe henerairowa. Etiri ape mo henerai tepaꞌasiye su, moꞌo Jisas si tame itorairowa. Lu taune tomu neꞌese Owane Sitewi maꞌe teꞌe naruwei. Lowe Owane Sitewi meꞌiyeni maꞌe atati aruwe. Sosu aiwawe arisi siye meni wiyeme aꞌi Owane Sitewi lai lu taune werese maꞌe amerame aꞌi au atuaturowa. Meni ape Owane Sitewi lai weriyei weriyei yehe omo maꞌi ani fu arosawiyei. Etiri ape mo tu henerairowa.a 4 God wawero towafi lowe lo lu taune au wisereyeye ape, meni ape lai Owane Sitewi werese ani fu arosawiyei. Aiwawe aꞌi le Owane Sitewi towafi lowe lo etiri ani fu arosawiyei. Sosu le apou eiyei, “Ane Owane Sitewi lo wesi wi onurowa. Ane Owane Sitewi lo me toꞌu sahe onurowa. Ane Owane Sitewi wiyeme aꞌi henerai tepaꞌasiyei.” Peri ape wawero aꞌi tene!b5 Tu naifa ane fene mase iroteye su, ane etiri ape mo fene maꞌe au teꞌeteye. Fene peri ano tote iꞌaneye awere? 6 Etiri ta lai arisi siye meni ape lo yo einamisiya. Fene etiri ape wanu soꞌoruwe tepaꞌasiye. Ane tu etiri ape ne fene maꞌe au teꞌe tepaꞌasiye. Owane Sitewi lai nowe ta ariariyeye. Nowe ape heneraiyei su, Owane Sitewi lai etiri ape nomo maꞌe au atuatu areiyerowa. Serai Owane Sitewi lai peri arisi siye meni wiyeme aꞌi lu taune werese maꞌe atuatu areiyerowa. Serai lu taune werese aꞌi meni ape siyerowa. 7 Nowe ape se lu taune tomu neꞌese Owane Sitewi lo peri arisinamisiya. Ahowa, meni ta lai arisi siye meni ape einamirowa. Le meni ape kairefi aꞌi se anite tawesirowa. Serai Owane Sitewi lai le henetiyei su, lu taune werese peri arisi siye meni ape siyerowa. 8 Lu taune werese werese aꞌi meni ape siyerowa. Sosu Meni Owane Jisas aiyerowa su, le ahi heneruwe kairefi lo se peri arisi siye meni aine teraꞌerowa. Sosu aiwawe aꞌi itorairowa su, le mitaiyeyei pefine aꞌi lo se meni ape aine teraꞌe poꞌuterowa.c 9 Peri arisi siye meni ape aiyerowa su, le Satan lo kairefi se wiyawi erasi pefine aꞌi areare irorowa. Le etiri yaru areare aꞌi taꞌanerowa. Lu taune wiyawi lo siyerowa su, lowe marepi hepene se suꞌarirowa. Le lu taune tomu neꞌese marepi lowe lo tatai anirowa.d 10 Sosu le etiri tereꞌe tereꞌe luwaru aꞌi tamo au irorowa. Le lu taune tomu neꞌese, Owane Sitewi lo yo umasi taꞌame ape, au arearerowa. Lu feni werese ape mo Owane Sitewi lo marepi tote tawesi taꞌame su, serai lowe weriyei weriyei temeniyerowa. Lowe Owane Sitewi lo marepi umasiyei su, Owane Sitewi lai lowe maꞌe marepi hepene heꞌi aꞌi aurowa. Ahowa, lowe Owane Sitewi lo marepi umasi taꞌame su, le lowe maꞌe marepi hepene heꞌi aꞌi au taꞌame. 11 Lowe Owane Sitewi lo marepi umasi taꞌame su, Owane Sitewi lai lowe maꞌe sepei wawero ausawiyei. Serai lowe peri wawero aꞌi wanuwei su, lowe peri ape umasiyei. 12 Serai lu taune werese Owane Sitewi lo peri wiyeme aꞌi umasi taꞌame ape, sosu etiri luwaru aꞌi maꞌe au teꞌe wisereyeye su, Owane Sitewi lai lowe maꞌe au hese ereirowa. Owane Sitewi lai lowe werese yehe omo maꞌe ani fu arosawirowa. Lowe mi mi pasi pasi yehe omo sahe ironamirowa.
Fene werese kairefi aꞌi teinamite.
13 Sosu aꞌi pe nomo fene ne Owane Sitewi maꞌe au teꞌe wisereyete. Kaiyemo mo werese, Owane Sitewi lai fene marepi erasi aꞌi tote wawesiyenamisiya. Tu naifa weriyei Owane Sitewi lai fene werese ariariyeye. Fene Owane Sitewi lo peri wiyeme aꞌi umasiteye su, Owane Sitewi lo Hepene Waraꞌi aꞌi fene maꞌe marepi hepene waraꞌi aurowa.e 14 Fene Owane Sitewi lo peri heneruwe wanuwe su, le lai fene ei aniye. Fene Owane Sitewi lo peri wanu umasinamisiya su, le fene maꞌe Meni Owane Jisas Krais lo marepi, sosu mi erasi aiwawe auwei ne totesiya. 15 Serai kaiyemo mo, fene kairefi aꞌi teinamite. Fene Owane Sitewi lo peri nomo fene maꞌe au teꞌe areiyeye ape, tote anite tawesire. Nomo fene maꞌe Owane Sitewi lo peri ahi nomo lo se au teꞌe areiyeye. Etiri werese one towe sahe lese ausawi ape, tote anite tawesire. 16 Meni Owane Jisas Krais topo le aꞌi, Owane Sitewi Tai nomo lo wiyeme aꞌi, lowesi nomo werese marepi erasi aꞌi tote wawesiyenamisiya. Sosu le nowe weriyei weriyei nomo maꞌe marepi fetane aꞌi aurowa. Sosu marepi wisere aꞌi aurowa. 17 Lowesi fene maꞌe au noweinoweisiya. Sosu fene yo seni wisere aꞌi irowei su, sosu peri au teꞌe areiyeye su, lowesi marepi fene lo ne maꞌe kairefi aꞌi au irowei.