Fene nomo ne Owane Sitewi maꞌe au teꞌe towerite.
3
Kaiyemo mo, peri yeꞌewi fene nomo ne Owane Sitewi maꞌe au teꞌe towerite. Nomo lu taune werese maꞌe Owane Sitewi lo peri au teꞌe areiyeyei su, lu taune tomu neꞌese Owane Sitewi lo peri witane aꞌi wanu umasiyei. Fene aiwawe aꞌi wanu umasiteye. 2 Fene nomo ne Owane Sitewi maꞌe au teꞌe towerite. Lu tamo tereꞌe nomo maꞌe au luwaruweye su, Owane Sitewi lai nomo au pati ferafereite. Piyene awere? Lu taune tomu neꞌese ape mo Jisas lo peri umasi taꞌame.3 Ahowa, Meni Owane Pefine aꞌi lai lu feni lo au noweinoweisiya. Sepei luwaru pefine aꞌi fene aine teraꞌeyei ne totesiya. Owane Sitewi lai marepi fene lo au kairefiyeyei. Sosu le fene maꞌe au noweinoweinamisiya. 4 Nomo etiri ta soꞌoruwesiya. Etiri werese nomo fene maꞌe au teꞌe areiyeye ape, Owane Sitewi lai fene maꞌe au pati ferafereiyei. Etiri werese ape mo fene irosiya ape, sosu etiri werese fene ironamiyei ape, fene peri nomo lo wanu umasinamite.a
5 Nomo Owane Sitewi maꞌe teꞌe towerisiya, “Owane Sitewi, ne marepi no lowe maꞌe au atuature. Sosu Meni Owane Krais lowe maꞌe weriyei weriyei au tei kairefiyete.”
Lu taune owe ape onotaꞌanote.
6 Meni Owane Jisas Krais lo iyape se, nomo fene maꞌe peri ta kairefi aꞌi au teꞌesiya. Kaiyemo mo, lu taune tamo Jisas lo peri umasinamisiya ape, lowe yo seni luwaru aꞌi ironamisiya. Lowe Owane Sitewi lo peri arisinamisiya. Nomo fene maꞌe au teꞌe tepaꞌasiye. Fene lowe mase owe ape ironamite. Fene yo seni lowe lo apou ape owe ape irote.b 7 Fene werese etiri ape wanu soꞌoruwesiya. Fene yo seni nomo lo tomu neꞌese siye umasiye. Serai fene yo seni nomo lo aiwawe aꞌi umasite. Nomo fene mase iroteye su, nomo onotaꞌano aꞌi iro taꞌame.c 8 Sosu nomo lu feni ta mase ene aye su, nomo le maꞌe maꞌaru ta auwe. Ahowa, nomo mi mi pasi pasi ta wiyawi taꞌane tohoteteye. Serai nomo lai fene werese maꞌe ayei tamo ei ani taꞌame. Ahowa, nomo fene maꞌe marepi orese aꞌi au taꞌame.d 9 Owane Sitewi lai nomo maꞌe eiye, “Fene wiyawi ano taꞌaneyei su, fene faraꞌu ayei ta lu feni ano maꞌe ei anire!” Ei! Nomo faraꞌu ayei tamo fene maꞌe teꞌe toweriyei. Ahowa, nomo yo seni nomo lo fene maꞌe au atuatureme. Fene yo seni nomo lo siyeyei su, fene aiwawe yo seni nomo lo fu umasirowa.e 10 Wiyeme aꞌi. Nomo fene mase iroteye su, nomo fene maꞌe peri ta au teꞌeye, “Lu taune ta wiyawi taꞌane taꞌame su, lowe ene ayei arowata.”
11 Wanure! Nomo peri ta apou wanuwe. Lu taune ta fene mase irosiya ape, lowe onotaꞌano aꞌi ne. Lowe wiyawi tamo taꞌane taꞌame. Ahowa, lowe lu tereꞌe tereꞌe lo marepi tatai aniyei ne totesiya. Lowe lai lu taune tereꞌe tahe onotaꞌanowei ne marepi tatai aniyei ne totesiya.f 12 Serai Meni Owane Jisas Krais lo iyape se, nomo lowe maꞌe kairefi aꞌi apou au teꞌesiya. Fene yo seni luwaru aꞌi ape fu arosawire. Fene wiyawi towafi fene lo fu taꞌane tohotete, sosu fene ayei werese etere.g
13 Sosu kaiyemo mo, fene onotaꞌano aꞌi iro taꞌame ape, fene weriyei weriyei wiyawi wisere aꞌi fu taꞌanete.h 14 Meni ta peri eite one towe sahe arisiyei su, fene meni ape ariariyere. Fene meni ape mase owe ape irote. Fene meni ape mase iro taꞌame su, le marepi neritase aꞌi teriterowa. Meni ape neritase teriteyei su, le lai Jisas lo peri tote tawesi umasirowa. 15 Ahowa, fene lai meni ape awei lo meni wou owe ape totete. Ahowa, fene kaiyemo ta wou kairefi aꞌi se yo seni lo ape au fareraiyere.i
Pol lowe maꞌe au teꞌe wisereye eritesawisiya.
16 Sosu aꞌi pe Owane Sitewi le aꞌi lai weriyei weriyei fene maꞌe marepi fetane aꞌi etiri werese fene lo aurowa. Owane Sitewi fene mase aiwawe aꞌi ironamisiya.