2 Ane ne, Timoti, maꞌe lese ausawiyei. Ne Owane Sitewi lo peri wanu tote tawesi umasiye su, ne aꞌi lai meni eime wiyeme ano wou henerai. Owane Sitewi, Tai nomo lo, le aꞌi lai ne maꞌe ferafereiyei lo auwei. Le Meni Owane nomo lo, Jisas Krais, aiwawe aꞌi, ne maꞌe marepi fetane aꞌi auwei. Lowesi ne ne ferafereiyei erasi teritesiya.^a

3 Tu naifa ane ne mase omo Efesus iroteye su, ane ne maꞌe peri kairefi aꞌi se apou teꞌeye, “Ne Omo Efesus saro irote. Ane Pani Masedonia maꞌe iyei ne toteye.” Sosu ane ne maꞌe tame eisiya, ne omo ape saro irote. Lu tamo omo Efesus sahe peri wawero au teꞌe fiyarinamisiya. Ne lai lu ape mo peri wawero lowe lo einamire. 4 Lowe yaꞌariyei peri yahowaꞌi au teꞌe fiyariyei su, ne peri lowe lo einamire. Lowe yaꞌariyei lo iyape ne totenamiye su, peri ape marepi lowe lo au luwaruwesiya. Lu taune tereꞌe peri wawero lowe lo wanuwei su, lowe marepi lowe lo meremereye aꞌi irowei. Peri wawero ape Owane Sitewi lo wiyawi einamisiya. Owane Sitewi lo wiyawi ape apou aꞌi ne, lu taune Owane Sitewi ne tote tawesiyei. Nomo Owane Sitewi lo wiyawi taꞌaneyei su, nomo Owane Sitewi lo wiyawi tote tawesiyei se taꞌaneyei.^b 5 Peri kairefi aꞌi ano ape lo sitewi apou aꞌi teꞌesiya, Lu taune marepi erasi aꞌi tote wawesiyenamiyei su, lowe marepi waraꞌi aꞌi ironamite. Lowe yo seni aseyaro ironamite. Sosu lowe Owane Sitewi ne tote tawesi umasinamite. 6 Lu taune tamo peri wawero ape wanuwe su, lowe etiri werese waraꞌi aꞌi aweraꞌiyenati. Sosu lowe peri meremereye aꞌi umasiteye. Serai lowe Owane Sitewi lo marepi nehi siyerowata. 7 Lu ape mo lowe Owane Sitewi lo marepi au teꞌe atuatu siye lu heneraiyei ne totesiya. Ahowa, lowe peri towafi lowe lo soꞌoru taꞌama. Lowe peri kairefi aꞌi au teꞌe fiyariye su, lowe peri lowe lo sitewi ape soꞌoru taꞌama.

8 Owane Sitewi lo yo peri, Moses maꞌe auwe ape, lu taune tamo yo peri ape umasiyei su, yo peri ape wisere aꞌi tene!^c 9 Sosu aꞌi pe peri ano wanu etire. Owane Sitewi lo yo werese lu taune werese maꞌe au teꞌe atuatuwei su, Owane Sitewi lo yo peri ape lu taune maꞌe, yo seni waraꞌi aꞌi irosiya ape, au teꞌe taꞌame. Ahowa, Owane Sitewi lo yo peri werese lu taune maꞌe au teꞌe atuatuwe su, lu taune yo peri werese meꞌiyeni maꞌe atati aruwe ape, lu taune Owane Sitewi lo peri arisisiya ape, lu taune Owane Sitewi lo yo peri umasi taꞌame ape, lu taune yo seni luwaru aꞌi umasisiya ape, Owane Sitewi lo yo peri lowe maꞌe au teꞌe atuatuwei. Sosu lu taune Owane Sitewi lo marepi tote tawesi taꞌame ape mo, Owane Sitewi lo yo peri werese lowe maꞌe au teꞌe atuatuwei. Lu taune tai mai lowe lo aine teraꞌeye su, Owane Sitewi lo yo peri ape lowe maꞌe au teꞌe atuatuwei. Sosu aiwawe lu taune, lu tereꞌe aine teraꞌeye, yo peri ape lowe maꞌe au teꞌe atuatuwei. 10 Sosu lu tamo lai taune tafaꞌe yo seni luwaru aꞌi irowe su, Owane Sitewi yo peri lowe maꞌe au teꞌe atuatuwei. Meni ta meni tereꞌe se tafaꞌe yo seni irowe su, yo seni lowe lo luwaru aꞌi ne. Sosu lu tamo lai lu tereꞌe maꞌe au teꞌe arearesiya ape, sosu lu tamo Owane Sitewi lo peri maꞌe au teꞌe luwaruwsiya ape, serai Owane Sitewi lai yo peri lowe maꞌe au teꞌe atuatusiya. Sosu peri wawero au teꞌesiya ape, Owane Sitewi lo yo peri lowe maꞌe au teꞌe atuatusiya. 11 Lu taune ape mo, yo seni luwaru aꞌi ironamisiya ape, lowe Owane Sitewi lo peri heneruwe wiyeme aꞌi arisinamisiya. Owane Sitewi yo seni aseyaro waraꞌi aꞌi ironamisiya ape, le peri werese lo ane maꞌe au teꞌe fiyariyei ne auwe.

12 Sosu aꞌi pe ane Jisas Krais Meni Owane nomo lo maꞌe au teꞌe wisereyesiya. Ane wiyawi lo taꞌaneyei su, le aꞌi lai ane maꞌe au kairefiyeyei. Le aꞌi lai ane wiyawi lo ane maꞌe au taꞌaneyei ne ariariyeye. Sosu le ane maꞌe marepi erasi aꞌi toteye. Serai le ane maꞌe eiye, “Ne mi mi werese marepi ano umasinamiteye.”^d 13 Wiyeme aꞌi! Tu naifa ane nowe tomu neꞌese Owane Sitewi maꞌe teꞌe naruwe. Mi mi tomu neꞌese ane Owane Sitewi lo lu feni aine naye, sosu ane lowe kalabus wesi maꞌe heneti. Ane meni ai aꞌi pefine aꞌi ne. Ane etiri luwaru aꞌi ape Owane Sitewi maꞌe irowe su, ahowa, le aꞌi lai marepi erasi aꞌi ane ne tote wawesiyenamiye. Ane Owane Sitewi lo marepi soꞌoru taꞌama. Ane marepi wisere aꞌi umasi taꞌame. Ane Owane Sitewi lo etiri lo sitewi soꞌoru taꞌama.^e 14 Ahowa, Owane Sitewi ferafereiyei lo ane maꞌe erasi pefine aꞌi auwe. Ferafereiyei lo se, ane Krais Jisas ne tote tawesi umasiteye. Ane Krais Jisas tote tawesiye su, ane lu taune werese ne marepi erasi aꞌi tote wawesiyenamisiya.

15 Serai ane ne maꞌe peri wiyeme aꞌi au teꞌeyei. Ne peri ape wanuwei su, ne peri ape tote anite tawesire. Peri ape apou aꞌi teꞌesiya, Krais Jisas hi awei sato itorai. Awei sato itorai su, le lu taune werese lo yo seni luwaru aꞌi au ani sasari pamoweyei ne fai. Etiri luwaru aꞌi werese ane irowe ape, lu taune werese lo yo seni luwaru aꞌi hi ani ararowe. Ane meni luwaru aꞌi pefine aꞌi ne.^f 16 Sosu peri ape lo sitewi apou aꞌi teꞌeye. Ane meni luwaru pefine aꞌi ne. Jisas yo seni luwaru werese aꞌi ano au ani sasari pamoweye su, le ane marepi erasi aꞌi tote wawesiyesiya. Sosu le aꞌi lai ane ne marepi momotei aꞌi toteye. Ane meni luwaru aꞌi pefine aꞌi ne. Lu taune tereꞌe lai Owane Sitewi lo marepi wisere aꞌi siyeyei su, lowe faraꞌu Jisas lo marepi umasiyei. Lowe Jisas lo marepi umasiyei su, Owane Sitewi lai marepi hepene heꞌi aꞌi mi mi pasi pasi weriyei aunamirowa. 17 Sosu ane Owane Sitewi maꞌe au teꞌesiya. Ne aꞌi lai Meni Owane Pefine aꞌi ne. Ne mi mi pasi pasi ironamitorowa. Ne aꞌi lai temeniyerowata. Lu taune werese nihari no siyerowata. Ne woto aꞌi lai Owane Sitewi pefine aꞌi ne. Ane iyape no ei ani arowesiya. Ane mi mi werese ne maꞌe au teꞌe wisereyesiya. Wiyeme aꞌi ne!

18 Sosu aꞌi pe Timoti ne peri ano wanure. Ne meni eime ano wou aꞌi ne. Tu naifa meni ta peri wiyeme aꞌi ne ne au teꞌeye. Ne peri wiyeme ape wanu umasire. Ne peri ape umasiyei su, ne faraꞌu tote tawesiyei no se tei kairefiyeyei. 19 Ne Owane Sitewi lo marepi tote tawesinamite. Sosu ne yo seni aseyaro aꞌi ironamite. Lu taune tamo etiri ape mo aweraꞌiyenati. Lowe etiri ape mo aweraꞌiyenati su, lowe Owane Sitewi ne marepi lowe lo meremereye aꞌi henerai. Marepi lowe lo apou aꞌi wai erasi tapiye se aine perati arauwiye. Sosu aine aporuwe. Aiwawe aꞌi tote tawesiyei lowe lo au luwaruweyei. 20 Lu hesi etiri wisere aꞌi ape aweraꞌiyenati. Lowesi lo iyape Himeneus, sosu aiwawe Aleksander. Ane lowesi sepei Satan lo kairefi maꞌe ani arosawi. Serai lowesi etiri siye soꞌoruweyei su, lowesi Owane Sitewi maꞌe teꞌe narurowata.^g