Ne Owane Sitewi maꞌe au teꞌe wisereye nineꞌite.
2
Sosu aꞌi pe ane peri erasi ne maꞌe au teꞌesiya. Tutawe ne Owane Sitewi maꞌe teꞌe tiyatire. Sosu le maꞌe ei towerire, sosu ne au teꞌe wisereye nineꞌiyei su, ne lu taune werese ne Owane Sitewi maꞌe au teꞌe tiyatiyei. 2 Ne Owane Sitewi maꞌe au teꞌeyei su, ne awei lo lu owane tutawe nomo lo ne, sosu lu owane werese nomo lo ne, Owane Sitewi maꞌe au teꞌere. Serai nomo werese marepi fetane aꞌi ironamiteyei. Serai nomo werese Owane Sitewi lo Marepi umasiyei. Sosu marepi hepene nomo lo waraꞌi aꞌi ironamiteyei. 3 Nomo etiri ape mo umasiyei su, Owane Sitewi lai marepi hepene heꞌi aꞌi, nomo maꞌe auwei ape, nihe lo se nomo ne au teꞌe wisereyesiya. Etiri ape wisere aꞌi ne. 4 Owane Sitewi nomo lo lu taune werese yo seni luwaru aꞌi lowe lo au sasariyei ne totesiya. Sosu marepi hepene heꞌi aꞌi lowe maꞌe aureme. Sosu aiwawe le nomo werese maꞌe apou au teꞌeyei, “Ane peri wiyeme aꞌi ne. Serai fene ane siye soꞌoruwete.” 5 Meni ta, menitani ta Owane Sitewi maꞌe aiyeyei ne totesiya su, le meni taꞌi aꞌi se Owane Sitewi maꞌe aiyerowa. Meni ape iyape Krais Jisas. 6 Meni ape lai Owane Sitewi maꞌe tahe paꞌare lo au hese ereiye. Serai le tahe paꞌare lo au hese ereiye su, Owane Sitewi lai yo seni luwaru werese aꞌi nomo lo le maꞌe fu arosawi. Nowe ape wiyeme aꞌi henerai. Apou aꞌi nowe wiyeme ape se Owane Sitewi lai lu taune werese marepi hepene heꞌi aꞌi auwei ne totesiya.a 7 Serene Owane Sitewi lai ane peri heneruwe wisere aꞌi lo au teꞌe fiyariyei ne ariariyeye. Le ane meni Aposel ta ariariyeye. Ane ne maꞌe peri wiyeme aꞌi au teꞌesiya. Ane peri wawero au teꞌe taꞌame. Lu taune tereꞌe Juda lo marepi umasi taꞌame ape ne, ane lowe maꞌe Meni Owane Jisas ne tote tawesiyei ne au teꞌe atuatusiya. Lowe Jisas ne tote tawesiyei su, lowe peri pefine aꞌi wanu soꞌoruwerowa.b8 Sosu ane lu werese omo omo werese sahe Owane Sitewi maꞌe au teꞌe tiyatiyei ne totesiya. Sosu lu taune ape mo, Owane Sitewi maꞌe au teꞌe tiyatiyei ape, lowe marepi waraꞌi umasinamirowa. Lowe ai marepi owe ape totete. Sosu lowe lu taune tereꞌe maꞌe ai peri owe ape teꞌe tiyatinamite.
Pol taune werese maꞌe au teꞌeteye.
9 Ane taune werese maꞌe, Owane Sitewi ne tote tawesiye ape, au teꞌesiya. Fene Owane Sitewi ipari tahe ani asiyei su, fene marepi eresene aꞌi tote etite. Fene mato towe asiyei su, fene etiri erasi aꞌi mato towe sahe leserowata. Fene tahe fene lo leseyei su, fene tahe erasi aꞌi owe ape lesete. Fene Owane Sitewi tahe maꞌaru tomu neꞌese se owe ape etete. Fene nihari fene lo owe ape lese wisereyete.c 10 Taune werese Owane Sitewi lo marepi umasiye ape, lowe taune lo wiyawi wisere aꞌi au taꞌanete. Lowe wiyawi wisere aꞌi taꞌaneyei su, lu taune werese lowe ne au teꞌe wisereyeyeid 11 Taune ape mo Owane Sitewi lo peri wanuwei su, lowe peri erasi owe ape teꞌete. Lowe marepi towafi fene lo hi ani ararote. Sosu lowe lu owane lowe lo unahi irote. 12 Taune werese ape mo lu werese owe ape au teꞌe atuatute. Sosu lowe lu tamo maꞌe owe ape au teꞌe kairefiyete. Ahowa, lu taune taꞌuweyei su, taune werese owe ape teꞌete.e 13 Wiyeme aꞌi. Tu naifa weriyei Owane Sitewi lai meni ta, iyape Adam, tu taꞌaneye. Sosu moꞌo tani lo, iyape Iv, taꞌaneye. Serai taune werese lai lu werese lowe lo unahi ironamite.f 14 Sosu lowesi Owane Sitewi lo awei pani tewi wisere aꞌi irowe su, Adam peri wawero ape wanu taꞌame. Ahowa, tani lo Satan lo peri wawero wanu umasiye. Sosu tani lo peri wawero wanuwe su, le yo seni luwaru aꞌi irowe.g 15 Serai taune werese Jisas Krais ne tote tawesiyei su, lowe faraꞌu eimane lowe lo auteirowa. Lowe yo seni werese aseyaro aꞌi irowei su, lowe lu taune werese ne marepi erasi aꞌi tote wawesiyeyei, sosu lowe etiri werese ape ne marepi momotei aꞌi irowei su, lowe marepi hepene heꞌi aꞌi anirowa.