Ne Owane Sitewi lo wesi lu owane tamo ariariyere.
3
Sosu aꞌi pe ane peri wiyeme aꞌi au teꞌesiya. Meni ta Owane Sitewi lo wesi meni owane erasi heneraiyei ne totesiya su, etiri wisere aꞌi ne.a 2 Sosu Owane Sitewi lo wesi meni owane, le yo seni werese aseyaro aꞌi irote. Le tani taꞌi naiture. Le saꞌi meremereye aꞌi owe ape ate, ai peri werese owe ape teꞌete. Lu taune werese meni ape ne erasi aꞌi toteyei. Lu taune wesi lo sewiyeyei ne aiyeyei su, le lowe maꞌe ayei tamo au ene are. Meni ape lu taune werese faraꞌu au teꞌe atuatute.b 3 Meni ape saꞌi meremereye aꞌi owe ape ate. Le aꞌi lai owe ape ai atu tiyatite. Ahowa, le lu taune werese ne marepi eresene aꞌi pei irote. Sosu aiwawe aꞌi lu taune maꞌe ai peri owe ape teꞌe tiyatite. Le maꞌaru werese topo lo erasi aꞌi owe ape totenamite. 4 Le nohuweripi awaripi lo wisere aꞌi au noweinoweite. Eimane werese lo peri lo fa umasinamite. Le tai mai topo lo au wisereyete. 5 Sosu meni ta nohuweripi awaripi lo luwaruwe noweinoweiyei su, le Owane Sitewi lo wesi etiri aiwawe aꞌi au luwaruwe noweinoweirowa. 6 Meni ape heꞌi aꞌi Owane Sitewi lo marepi tote tawesi taꞌame. Tu naifa le Owane Sitewi lo marepi tote tawesiye. Meni ape heꞌi aꞌi tote tawesiyei su, le marepi tote kuseriyei henerairowa. Serai Owane Sitewi lai meni ape ani fu arosawiyei, apou aiwawe aꞌi tu naifa le sepei Satan omo hire maꞌe ani fu arosai. 7 Sosu lu tewi tereꞌe, Owane Sitewi ne tote umasi taꞌame ape, lowe meni ape marepi wisere aꞌi pei totete. Lowe marepi luwaru aꞌi le ne au toteyei su, le aꞌi lai Owane Sitewi lo wiyawi au luwaruwe taꞌanerowa. Meni ape etiri apou ape irowei su, le Satan lo mino se ti tawesirowa.c8 Sosu aꞌi pe ane Owane Sitewi lo wesi lu owane tereꞌe ne au teꞌesiya. Lowe Owane Sitewi lo wesi au noweinoweiyei. Lu ape mo lu tewi tereꞌe lai, lowe ne marepi wisere aꞌi totete. Lowe Owane Sitewi lo wesi sahe wiyawi ani tohotete. Lowe saꞌi meremereye aꞌi owe ape ene ate. Sosu lowe lu tereꞌe lo maꞌaru taꞌarei aniyei ne owe ape totete. 9 Lowe marepi waraꞌi aꞌi pei irote. Sosu lowe Owane Sitewi lo marepi wiyeme kairefi aꞌi se tote anite tawesite. 10 Ne lu ape mo yo seni lowe lo siye etite. Yo seni lowe lo aseyaro wisere aꞌi siyeyei su, marepi lowe lo, lowe faraꞌu Owane Sitewi lo wesi au noweinoweirowa.
11 Sosu aiwawe aꞌi tani lowe lo ne, lu taune tereꞌe lowe ne marepi wisere aꞌi totenamite. Lowe lu taune werese maꞌe peri luwaru aꞌi owe ape teꞌe narute. Yo seni werese lowe lo, lowe irosiya ape, apou aꞌi pei ironamite. Lowe etiri werese, lowe irowei ape, lowe marepi momotei aꞌi au taꞌanerowa.d 12 Owane Sitewi lo wesi au noweinowei siye lu, lowe tani taꞌi aꞌi naiture. Lowe nohuweripi awaripi au wisereye noweinoweite. 13 Lu ape mo Owane Sitewi lo wesi au noweinoweiteyei su, lowe Jisas Krais ne tote tawesi umasinamiyei. Lu taune iyape towafi lowe lo au teꞌe wisereyerowa. Lowe Jisas Krais lo marepi tote tawesiyei su, lowe Owane Sitewi lo peri kairefi aꞌi se au teꞌe fiyarirowa.
14-15 Sosu aꞌi pe marepi ano apou aꞌi totesiya. Nowe ataheyeyei su, Timoti, ane ne maꞌe sewiyeyei ne totesiya. Ahowa, ane aiye taꞌame su, ane peri eite ne maꞌe lese ausawisiya. Ne peri ano wanu umasiyei su, ne yo seni waraꞌi aꞌi lu taune lo nihe se ironamite. Lu taune werese, Owane Sitewi lo marepi umasiye ape, lowe werese apou aꞌi Owane Sitewi lo wesi tene! Owane Sitewi lai mi mi pasi pasi weriyei ironamitorowa. Lu taune ape mo lowe apou aꞌi wesi me tou wou aꞌi opo teinamirowa. Lowe werese Owane Sitewi lo marepi sitewi wiyeme aꞌi henerai tepaꞌasiye. 16 Wiyeme aꞌi! Peri fareyare aꞌi henerai.
Yo seni waraꞌi aꞌi lo sitewi nomo maꞌe amerame aꞌi henerai. Owane Sitewi lo marepi Jisas ne apou aꞌi toteteye ape, meni ape hi awei maꞌe tahe paꞌare mase itorai. Sosu lu taune werese le siyeye. Owane Sitewi lo ipari wisere aꞌi meni ape siyeye. Serai lu taune tamo omo omo werese meni ape lo peri au teꞌe fiyariye. Lu taune tamo omo omo werese sahe meni ape lo peri wanu umasiye. Sosu wiyawi lo tepaꞌasiye su, Owane Sitewi lai meni ape kairefi aꞌi se omo hire maꞌe hene ani wiye.”e