Pol Timoti maꞌe peri ta ausawisiya.
4
Sosu aꞌi pe Owane Sitewi lo Hepene Waraꞌi aꞌi apou teꞌe areiyeye, “Nowe meꞌiye su lu taune tamo Owane Sitewi lo marepi ne tote arosawirowa. Sosu lowe sepei luwaru aꞌi tamo peri wawero teꞌesiya ape, wanurowa. Sosu lowe Satan lo sepei luwaru aꞌi lo marepi umasinamirowa.” 2 Peri ape, lu ape mo lu taune maꞌe au teꞌeyei ape, Satan lo marepi wou aꞌi ne. Lowe peri wawero au teꞌenamisiya. Lowe marepi hesi aꞌi au totenamisiya. Lowe yo seni farere aꞌi siye soꞌoruwe taꞌame. Yo seni lowe lo luwaruwe poꞌutesiya. 3 Lu ape mo lu taune maꞌe apou teꞌesiya. “Fene tani ta owe ape naiture. Sosu fene ayei tamo au siyenamite.” Ahowa, ayei ape mo Owane Sitewi lai taꞌaneye. Sosu le aꞌi lai lu taune werese maꞌe apou au eiye, “Wiyeme aꞌi fene ayei tamo, lowe siyenamisiya ape, faraꞌu ene arowa.” Ayei tamo ne, lowe siyenamisiya ape, fene, Owane Sitewi lo marepi wiyeme aꞌi umasiteye ape, Owane Sitewi maꞌe au teꞌe wisereyete.a 4 Wanure! Etiri werese, Owane Sitewi lai taꞌaneye ape, wisere aꞌi tene! Fene ayei amou tamo aniyei su, sosu Owane Sitewi maꞌe au teꞌe wisereyeyei su, fene faraꞌu ene arowa. 5 Serai fene ayei tamo ne Owane Sitewi maꞌe au teꞌe wisereyeyei su, Owane Sitewi lai peri lo se etiri ape aseyaro au irorowa.6 Sosu aꞌi pe ne Jisas lo lu feni maꞌe etiri ape mo ne au teꞌeyei su, ne Krais Jisas lo wiyawi ani siye lu wisere aꞌi henerairowa. Ne aꞌi lai Owane Sitewi lo peri wiyeme aꞌi wanu tote tawesi umasiye. Sosu aiwawe aꞌi ne aꞌi lai Owane Sitewi lo marepi wiyeme aꞌi umasiteye. 7 Ne yaꞌariyei peri luwaru aꞌi owe ape wanu umasite. Yaꞌariyei peri werese ape ne, yaꞌariyei taune wanu umasinamisiya. Ahowa! Ne lai Owane Sitewi lo yo seni waraꞌi aꞌi irowei ne tohotete.b 8 Apou aꞌi ne tahe paꞌare no kairefiyeyei su, etiri yahowaꞌi aꞌi ne. Ahowa! Ne yo seni waraꞌi aꞌi irowei su, etiri werese ne wisere aꞌi tene! Ne yo seni waraꞌi irowei su, etiri werese pereye aꞌi wisere aꞌi irorowa. Sosu aiwawe, ne temeniyeyei su, sosu si tame sineyei su, etiri werese mi mi pasi pasi wisere aꞌi ironamitorowa.
9-10 Peri ape, ane ne maꞌe au teꞌesiya ape wiyeme aꞌi tene. Ne peri werese ape mo wanu umasite. Peri ape wisere aꞌi ne. Peri ape apou aꞌi teꞌesiya, sosu Owane Sitewi lai mi mi pasi pasi ironamitorowa. Serai nomo werese marepi lo tote tawesi umasisiya. Sosu nomo Jisas si tame itorairowa ape, ninawesiya. Owane Sitewi nomo lo lu taune werese lo yo seni luwaru aꞌi faraꞌu au sasari pamowerowa. Sosu lu taune marepi lo umasirowa ape, Owane Sitewi lai marepi hepene heꞌi aꞌi lowe maꞌe aurowa.c 11 Serai ane ne maꞌe peri ape kairefi aꞌi se au teꞌesiya. Sosu ne peri ape lu taune maꞌe au teꞌe atuatute.
12 Sosu aꞌi pe Timoti, ne yoꞌorei meni ne. Lu tamo ne ne yahowaꞌi meni owe ape teꞌete. Ahowa! Ne aꞌi lai yo seni waraꞌi aꞌi ironamite. Sosu ne yo seni waraꞌi aꞌi irowei su, Jisas lo lu taune yo seni no siyerowa. Sosu lowe yo seni waraꞌi aꞌi no aiwawe aꞌi umasiyei. Yo seni waraꞌi aꞌi no apou aꞌi peri waraꞌi aꞌi au teꞌesiya, ne lu taune maꞌe marepi erasi aꞌi tote wawesiyete. Ne Owane Sitewi ne tote tawesisiya su, ne lu taune maꞌe tote tawesiyei no au teꞌe atuatute. Aiwawe aꞌi ne lowe maꞌe yo seni waraꞌi aꞌi no au atuatute.d 13 Ne ane ne owe ape ninawete. Ahowa, ne Owane Sitewi lo wiyawi erasi aꞌi taꞌane tohotete. Ne lu taune maꞌe Owane Sitewi lo peri siye teꞌete. Ne Owane Sitewi lo marepi au teꞌe fiyarite. Sosu ne Owane Sitewi lo marepi heꞌi aꞌi lu taune maꞌe au teꞌe atuatute. 14 Sosu aiwawe aꞌi ne Owane Sitewi lo kairefi, le ne maꞌe auwe ape, ne meꞌiyeni maꞌe owe ape atati arute. Owane Sitewi lo wesi lu owane tamo lowe ne hire maꞌe ereti se au hetesi fuwe su, Owane Sitewi lai kairefi lo ne maꞌe auwe. Lowe ereti ne maꞌe isawe hetesiyeye su, Owane Sitewi lo Hepene Waraꞌi aꞌi ne maꞌe wiyawi no au kairefiyeye.e
15 Serai ane ne maꞌe au teꞌesiya. Ne wiyawi ape taꞌane tohotete. Mi mi werese ne wiyawi ape au noweinoweite. Serai ne wiyawi ape au noweinoweiyei su, lu taune werese wiyawi no siye wisereyerowa. 16 Owane Sitewi lai ne maꞌe kairefi wisere aꞌi lo auwe. Ne Owane Sitewi lo peri au teꞌe fiyariyei su, ne Owane Sitewi lo kairefi se au teꞌe fiyarite. Ne yo seni werese no siye etite. Ne yo seni aseyaro aꞌi fu irore. Owane Sitewi lo peri, ne au teꞌe fiyariyei ape, ne peri ape siye etite. Peri no ape Owane Sitewi lo marepi fu umasinamite. Mi mi werese ne wiyawi no taꞌane tohotete. Ne marepi owe ape onotaꞌano irote. Ne peri ano umasiyei su, Owane Sitewi lai ne maꞌe marepi hepene heꞌi aꞌi aurowa. Aiwawe aꞌi ne Owane Sitewi lo peri lu taune maꞌe au teꞌe fiyariyei su, lowe peri no wanu umasirowa. Sosu Owane Sitewi lai lowe maꞌe marepi hepene heꞌi aꞌi aurowa.