Taune weiname lo peri teꞌesiya.
5
Ne yaꞌariyei lu taune werese maꞌe ai peri erasi owe ape teꞌe tiyatite. Ahowa! Ne yo seni lowe lo au fareraiyeyei ne toteyei su, ne yo seni lowe lo peri eresene aꞌi se au fareraiyete. Apou wou aꞌi ne tai no au noweinoweinamiye. Ne yoꞌorei lu yo seni lowe lo au fareraiyeyei su, ne yo seni lowe lo au fareraiyete. Paꞌise no aiwawe aꞌi. 2 Yaꞌariyei taune naihe werese marepi waraꞌi aꞌi se au teꞌe erese fareraiyete. Mai no aiwawe aꞌi. Sosu aiwawe taune watiꞌare werese ne lai yo seni luwaru werese aꞌi lowe lo au fareraiyete. Aiwawe aꞌi eine no yo seni luwaru aꞌi irowei su, ne einei no au teꞌe eresiye fareraiyeyei.3 Sosu aꞌi pe taune weiname au noweinoweite. Taune weiname tamo mi mi werese le taꞌi aꞌi irosiya. Taune weiname tamo, eimane tamo irosiya. 4 Sosu menitani weiname ta, eimane tamo, sosu eimane tape tamo irosiya su, eimane, eimane tape ape mo lowe Owane Sitewi lo marepi tote umasite. Sosu tai no temeniyeyei su, eiwerai mai no au noweinoweiyei awere? Menitani weiname lo eimane, lowe lai mai lowe lo fa au noweinoweite. Lowe mai au noweinoweiyei su, lowe lai tai mai itiyaꞌu au noweinoweiyei. Owane Sitewi lai yo seni lowe lo ne au wisereyeyei. 5 Sosu menitani weiname ta taꞌi aꞌi irosiya su, menitani ape Owane Sitewi lo ereti maꞌe marepi lo au fuwe. Serai mi mi pasi pasi menitani weiname ape Owane Sitewi maꞌe au teꞌesiya. Le Owane Sitewi maꞌe pati aniyei ne ei towerisiya. Owane Sitewi lo wesi lu owane lowe lai taune weiname apou ape au noweinoweite. 6 Sosu aꞌi pe menitani weiname ta yo seni luwaru aꞌi irowei su, le marepi hepene lo apou aꞌi temeniyeye. Le irosiya su, hepene lo apou aꞌi temeniyeye. 7 Serai ane ne maꞌe teꞌesiya. Ne peri ano ape lu taune maꞌe au teꞌere. Serai lu taune werese peri ape wanuwei su, lowe taune weiname ape mo au noweinoweiyei. Sosu lu taune tereꞌe yo seni lowe lo owe ape teꞌe luwaruweyei. 8 Sosu aiwawe aꞌi meni ta, menitani ta lu feni lo au noweinowei taꞌame su, sosu nohuweripi awaripi au noweinowei taꞌame su, le aꞌi lai meni, menitani luwaru aꞌi tene! Wiyeme! Meni ape Owane Sitewi lo marepi aweraꞌiyenati.
9 Sosu aꞌi pe Owane Sitewi lo wesi lu owane lai taune weiname tamo au noweinoweiyei su, lowe iyape lowe lo one towe sahe lesere. Ahowa! Ne taune weiname lo iyape leseyei su, weiname ape iyu menei, lu hesi heta werese (60) iroteye, iyape lowe lo one towe sahe faraꞌu lesere. Sosu aiwawe meni tereꞌe weiname ape naitu taꞌame. 10 Menitani weiname ape lu taune werese lai marepi lowe lo wisere aꞌi toteye. Weiname ape lai eimane lo wisere aꞌi au noweinoweiye. Le aiwawe lu taune werese sewiyeyei ne fai ape, ayei au ene aye. Lu taune, Owane Sitewi lo marepi tote umasiye ape, le lowe maꞌe au noweinoweiteye. Lu taune tamo etiri orese aꞌi teriteye su, weiname ape marepi wisere aꞌi lowe maꞌe au teꞌe ferafereiteye. Mi mi werese weiname ape etiri wisere aꞌi au ironamiteye. Serai weiname apou ape ne faraꞌu Owane Sitewi lo wesi lo one towe sahe iyape lo lesere. Taune watiꞌare weiname Owane Sitewi maꞌe teꞌe naneiteye. Lowe apou au teꞌeyei, “Ane Owane Sitewi lo wiyawi taꞌanenamiyei. Ane meni ta si tame naiturowata.” Serai lowe iyape ano Owane Sitewi lo wesi lo one towe sahe au leseyei.
11 Sosu aiwawe ane watiꞌare weiname maꞌe au teꞌesiya. Taune watiꞌare weiname Owane Sitewi maꞌe teꞌe naneiteye. Lowe apou au teꞌeyei, ane Owane Sitewi lo wiyawi taꞌanenamiyei. Ane meni ta si tame naiturowata. Serai lowe iyape ano Owane Sitewi lo wesi lo one towe sahe au leseyei. Ne Owane Sitewi lo wesi one towe iyape lowe lo owe ape lesete. Sosu lowe naituwei lo marepi erasi aꞌi toteyei su, lowe Krais lo wiyawi aweraꞌiyenatiyei. Serai lowe meni ta naituwei ne totesiya. 12 Apou aꞌi watiꞌare weiname lo iyape leseye su, sosu meni ta le naituwe su, Owane Sitewi le maꞌe ai marepi toteyei. Piyene awere? Serai le Owane Sitewi maꞌe peri teꞌe naneiyei tutawe lo arisiye. 13 Sosu aiwawe lowe onotaꞌano aꞌi iroteye. Lowe wesi tereꞌe tereꞌe yahowaꞌi onutiteye. Lowe yo seni onotaꞌano aꞌi irowe. Sosu lowe peri luwaru aꞌi ta taune tereꞌe maꞌe au teꞌe fiyariye. Lowe yo seni luwaru aꞌi tote umasititeye. Lowe yo seni luwaru aꞌi iroteye su, lowe peri luwaru au teꞌe fiyariye. Peri apou ape amou aꞌi tene!a 14 Serai ane menitani watiꞌare weiname maꞌe au teꞌesiya. Fene werese meni ta lai si tame naiture. Fenesi meni eime auteire. Fene nohuweripi awaripi fene lo au noweinoweite. Fene nohuweripi awaripi wisere aꞌi au noweinoweiyei su, serai lu taune tereꞌe fene ne owe au teꞌe narurowata.b 15 Wanure! Taune watiꞌare weiname tamo lowe Owane Sitewi lo marepi arunatiyei su, lowe Satan lo marepi umasinamirowa. 16 Serai menitani ta, Owane Sitewi lo marepi umasiteye ape, menitani weiname lu feni lo sahe irosiya su, menitani ape weiname werese au noweinoweite. Sosu menitani weiname ape au noweinoweiyei su, serai lowe marepi orese aꞌi Owane Sitewi lo wesi lu owane maꞌe owe ape auwei. Sosu lu feni ta weiname werese lo au noweinoweiyei su, serai Owane Sitewi lo wesi lu owane weiname ape mo, lu feni lo iro taꞌame ape, faraꞌu au noweinoweiyei.
17 Sosu ane Owane Sitewi lo wesi lu owane maꞌe au teꞌesiya. Sosu meni owane ape Owane Sitewi lo wesi lo etiri au noweinoweiyei su, marepi ano apou aꞌi totesiya. Ne lu ape mo maꞌe maꞌaru tomu neꞌese aꞌi pei luwaru aꞌi fu aute. Serai lowe mi mi werese Owane Sitewi lo peri au teꞌe fiyarisiya, sosu aiwawe lowe lu taune werese maꞌe Owane Sitewi lo marepi au teꞌe atuatusiya. 18 Wanure! Tu naifa Owane Sitewi lo peri apou teꞌeye,
“Ne fe bulmakau lo ahi owe ape tawesite. Fe bulmakau wiyawi no taꞌaneyei su, fe bulmakau faraꞌu kewi so tewi tamo tomu tou ayei.” Lo 25:4
Sosu Owane Sitewi lo peri tereꞌe apou teꞌeye, “Wiyawi taꞌane meni wiyawi ta taꞌaneyei su, meni ape maꞌaru wisere aꞌi pei anite.”c 19 Sosu meni taꞌi aꞌi Owane Sitewi lo wesi meni owane ne apou eiye, “Meni owane ape yo seni luwaru aꞌi irowe.” Ne peri lo ape owe ape wanute. Ahowa! Lu hesi, lu hesi heta le ne peri apou ape ahi taꞌi aꞌi se au teꞌeyei su, ne peri lowe lo ape wanure.d 20 Serai Owane Sitewi lo wesi meni owane yo seni luwaru irowei su, ne aꞌi lai yo seni ape ne lu taune werese lo nihe se au teꞌere. Sosu lu taune werese yo seni luwaru siyeyei su, lowe atoweiye irorowa. Serai lowe werese yo seni waraꞌi aꞌi irorowa.e
21 Sosu ane Owane Sitewi lo nihe se sosu aiwawe Krais Jisas lo nihe se, sosu Owane Sitewi ipari wisere aꞌi tamo, le lai ariariyeye ape, ane nihe lowe lo se ne maꞌe peri erasi au teꞌesiya. Ne aꞌi lai peri ano umasi noweinoweite. Ne yereme no tewi erasi aꞌi owe ape nonetire. Ahowa ne lu taune werese tewi aꞌi tewi aꞌi au nonetire. 22 Ne meni ta Owane Sitewi lo wesi meni owane ariariyeyei su, ne yo seni werese lo siye eti areiyere. Ne yo seni werese lo siye eti ereiyei su, ne faraꞌu meni ape ereti se mato hire maꞌe isawe hetesiye. Ereti isawe hetesiye su, ne meni ape ne Owane Sitewi maꞌe au teꞌere. Sosu ne meni ta ereti hire maꞌe isawe hetesiyei su, sosu meni ape yo seni luwaru aꞌi irowei su, ne lai yo seni luwaru aꞌi lo tewi aiwawe aꞌi irowei.
23 Ne nowe mi mi tomu neꞌese lire no u se. Serai mi mi werese saꞌi waraꞌi aꞌi owe ape are. Ahowa ne wain saꞌi oso aꞌi faraꞌu are. Ne wain saꞌi ayei su, wain saꞌi ape lai lire no au fareraiyeyei.
24 Lu taune tamo lo yo seni luwaru aꞌi irowei su, lu taune tomu neꞌese yo seni lowe lo amerame aꞌi siyeyei. Owane Sitewi lai pereye aꞌi yo seni luwaru aꞌi lowe lo au hese ereiyei. Ahowa, lu taune tereꞌe yo seni luwaru aꞌi irowei su, lowe yo seni luwaru aꞌi fareyare aꞌi ne. Nowe yeꞌewi su, Owane Sitewi lai yo seni luwaru aꞌi lowe lo au hese ereirowa. 25 Sosu aiwawe aꞌi, lu taune yo seni aseyaro aꞌi irowei su, lu taune werese lai yo seni aseyaro aꞌi lowe lo amerame aꞌi siyeyei. Aiwawe aꞌi yo seni aseyaro aꞌi irowei su, lowe yo seni aseyaro aꞌi lowe lo fareyare aꞌi ne. Serai Owane Sitewi lai yo seni aseyaro aꞌi lowe lo amerame aꞌi atuatu areiyeyei.