3-4 Sosu ane peri tereꞌe ne maꞌe au teꞌesiya. Meni ta peri wawero au teꞌe atuatusiya su, le Owane Jisas Krais lo peri wiyeme marepi taꞌi aꞌi tote taꞌame. Sosu aiwawe le Owane Sitewi lo yo seni aseyaro taꞌi aꞌi tote taꞌame su, marepi lo yahowaꞌi aꞌi irosiya. Sosu aiwawe le Owane Sitewi lo marepi wanu soꞌoru taꞌama. Awei meni ape lo marepi apou aꞌi irosiya. Le mi mi werese ai peri aꞌi teꞌe tiyatiyei ne totesiya. Sosu ai marepi erasi tote tiyatisiya. Sosu ai peri teꞌe tiyatinamisiya su, serai le lu taune lo etiri tamo siye wisereyesiya. Sosu ai peri erasi irosiya. Sosu le lu taune maꞌe teꞌe narusiya, lu taune maꞌe peri luwaru aꞌi teꞌesiya.^c 5 Sosu lu tamo, marepi luwaru aꞌi ironamisiya ape, lowe mi mi werese ai peri teꞌe tiyatinamisiya. Lu feni ape Owane Sitewi lo peri wiyeme aꞌi aweraꞌiyenati su, lowe marepi lowe lo apou totesiya, “Owane Sitewi lo marepi waraꞌi apou aꞌi teꞌesiya. Nomo maꞌaru tomu neꞌese taꞌuwe anisiya.” Owane Sitewi lo marepi ne lowe lai apou aꞌi totesiya.^d 6 Wiyeme aꞌi, ne Owane Sitewi lo marepi waraꞌi aꞌi umasiyei su, ne etiri tomu neꞌese anirowa. Ahowa, ne marepi fetane aꞌi irowei su, marepi no temeꞌeriyeyei. Marepi fetane aꞌi, marepi wisere aꞌi, marepi momotei aꞌi ne.^e

7 Apou aꞌi mai no auteiye su, ne etiri werese aiwawe autei taꞌame. Sosu aiwawe, ne temeniyeyei su, hepene no etiri werese aiwawe aitirowata.^f 8 Serai nomo ayei tamo, sosu ipari tahe tamo irosiya su, nomo marepi wisere aꞌi pei ironamite. 9 Wiyeme aꞌi, lu taune etiri maꞌaru aiwawe taꞌuwe aniyei ne totesiya su, lowe marepi luwaru aꞌi toteyei. Fe fisiye yo apou wou maꞌe wiyeinerowa. Lowe marepi luwaru aꞌi toteteye su, lowe yo seni meremereye aꞌi iroreme, sosu marepi towafi lowe lo au luwaruweyei. Serai lu taune ape mo apou aꞌi irowei su, lowe tahe paꞌare, sosu hepene lowe lo aiwawe aꞌi au luwaruweyei. Sosu lowe temeniyerowa. 10 Sosu wanure! Lu taune ta maꞌaru tomu neꞌese taꞌuwe aniyei ne totesiya su, yo seni apou ape etiri luwaru aꞌi werese lo sitewi ne. Lu taune tamo maꞌaru tomu neꞌese aniyei ne totesiya su, lowe Owane Sitewi lo marepi aweraꞌiyenati. Sosu lowe Owane Sitewi lo marepi aweraꞌiyenatiye su, lowe etiri luwaru aꞌi tahe paꞌare lowe lo sahe fofowei erasi teriteye.^g

11 Sosu aꞌi pe ane peri ta ne maꞌe au teꞌesiya. Ne Owane Sitewi lo meni eime ne. Yo seni luwaru werese aꞌi ane tu au teꞌeye ape, ne etiri werese ape mo meꞌiyeni maꞌe atati arunatire. Sosu yo seni wisere aꞌi umasi anire. Sosu aiwawe aꞌi ne Owane Sitewi lo marepi umasire. Ne Owane Sitewi lo yo seni tote anite tawesite. Lu taune werese maꞌe marepi erasi aꞌi tote wawesiyenamite. Ne yo seni wisere aꞌi ani tohotete. Sosu lu taune werese maꞌe marepi eresene aꞌi au irore.^h 12 Owane Sitewi lo yo seni werese ne lai kairefi aꞌi se anite tawesire. Ne kairefi aꞌi se tote anite tawesiyei su, ne faraꞌu marepi hepene heꞌi aꞌi mi mi pasi pasi ironamirowa. Lu taune tomu neꞌese lo nihe se yo seni aseyaro aꞌi no au atuatu areiyeye.ⁱ 13 Owane Sitewi lai hepene norohu aꞌi, ayei etiri werese maꞌe auwe ape, Owane Sitewi lo nihe se, sosu Krais Jisas lo nihe se, ane ne maꞌe peri kairefi aꞌi au teꞌesiya. Krais Jisas le meni Pontius Pailat maꞌe teiye su, le meni ape maꞌe peri farere aꞌi au teꞌeye. Peri ape ne apou aꞌi teꞌeye, Krais Jisas, Owane Sitewi lo meni eime. Sosu moꞌo le lu taune werese ne au temeniyeye.^j 14 Krais Jisas si tame itorairowa su, ne mi mi weriyei Owane Sitewi lo peri werese umasinamirowa. Ne peri ape owe ape afofowere. Sosu ne yo seni wisere aꞌi lu taune werese maꞌe au iro areiyere. 15 Owane Sitewi lai, Krais Jisas si tame itorairowa ape, nowe ape au ariariyeye. Owane Sitewi lai wisereyeyei lo sitewi. Le aꞌi lai kairefi aꞌi wiyeme taꞌi aꞌi irosiya. Le aꞌi lai lu owane erasi werese lo Meni Owane. Sosu aiwawe le aꞌi lai meni owane tutawe werese lo Meni Owane tutawe pefine aꞌi ne.^k 16 Owane Sitewi, Meni Owane nomo lo le aꞌi lai mi mi pasi pasi ironamitorowa. Mitaiyeyei erasi pefine aꞌi sahe le sato ironamisiya. Serai lu taune werese le maꞌe aiyerowata. Lu taune werese Owane Sitewi lo nihari siye taꞌame. Ahowa! Lowe werese nihari lo siyerowata. Nomo werese marepi wisere aꞌi sosu kairefi aꞌi le maꞌe au teꞌesiya.

17 Sosu ne maꞌe lu taune maꞌaru tomu neꞌese irosiya ape, ne lowe maꞌe au teꞌesiya, “Lu taune werese fene maꞌaru fene lo ne marepi erasi aꞌi owe ape totere. Fene maꞌaru fene lo ne marepi erasi aꞌi toteyei su, fene Owane Sitewi lo peri arisiyei. Maꞌaru werese kairefi se taꞌama. Fene maꞌaru owe ape anite tawesite.” Ahowa! Fene werese Owane Sitewi lo marepi tote anite tawesite. Owane Sitewi lai etiri werese wisere aꞌi nomo maꞌe ausai. Serai nomo werese faraꞌu marepi wisere aꞌi ironamisiya.^l 18 Ne lu feni ape maꞌe au teꞌere. “Lowe yo seni aseyaro aꞌi irote. Lowe wiyawi wisere aꞌi tomu neꞌese taꞌanere. Lowe maꞌaru lowe lo, lu taune maꞌe ariye aꞌi irosiya ape, nonetire. Sosu aiwawe lowe marepi wisere aꞌi se etiri lowe lo nonetire.” 19 Lowe etiri lowe lo, lu taune werese ariye aꞌi ape maꞌe nonetiyei su, Owane Sitewi lai lowe ne etiri wisere aꞌi tomu neꞌese taꞌuwe ani fuwei. Etiri ape mo Owane Sitewi lai, taꞌuweyei ape, etiri ape Owane Sitewi lo marepi lo sitewi aꞌi ne. Nowe yeꞌewi etiri werese ape mo henerairowa. Serai lowe etiri lowe lo nonetiyei su, lowe marepi hepene heꞌi aꞌi tote anite tawesiyei. Marepi hepene ape wiyeme aꞌi tene!^m

20 Sosu ane ne maꞌe teꞌesiya. Timoti, ne peri wisere aꞌi, Owane Sitewi lai ne maꞌe auwe ape, ne au noweinoweite. Ne peri yahowaꞌi werese aꞌi meꞌiyeni maꞌe atati arunatire. Sosu aiwawe ne ai marepi werese owe ape tote tiyatite. Ai peri tiyati ape ne lu tamo areareye aꞌi apou eiye, peri ape yo seni wanu soꞌoruwesiya. 21 Lu feni ape lai apou eiye, “Nomo etiri werese soꞌoruwe tene!” Lowe peri wawero aꞌi tene! Lowe peri wawero aꞌi umasiyei su, lowe Owane Sitewi lo marepi aweraꞌiyenatiyei. Sosu ane Owane Sitewi lo marepi wisere aꞌi ne maꞌe auwei ne totesiya. One towe eite lese tepaꞌasiye.ⁿ