2 Ane lai meni Timoti maꞌe, meni eime wisere aꞌi ano, one towe eite ausawiyei. Owane Sitewi lai ne maꞌe marepi wisere aꞌi, sosu ferafereiyei erasi aꞌi, sosu marepi fetane aꞌi auwei. Etiri ape mo Owane Sitewi, Tai nomo lo maꞌe sosu Krais Jisas Meni Owane nomo lo aiwawe lowesi maꞌe fai.^a

3 Ane Owane Sitewi maꞌe au teꞌe tiyatiyei su, ane ne ne le maꞌe ei towerinamisiya. Mi mi pasi pasi ane ne ne Owane Sitewi maꞌe au teꞌenamisiya. Ane ne ne Owane Sitewi maꞌe au teꞌe wisereyenamisiya. Yaꞌariyei lu feni ano le maꞌe au teꞌe wisereye nineꞌinamiteye. Ane aiwawe aꞌi le maꞌe wiyawi lo taꞌanenamisiya. Ane le maꞌe wiyawi lo taꞌanesiya su, ane yo seni farere aꞌi ironamisiya.^b 4 Ne lai ane ne luwei erasi irowe su, ane luwei no tote tawesinamiteye. Marepi ano aiwawe aꞌi luwei erasi irosiya. Ane nihari no siyereme. Ane ne maꞌe sewiyeyei ne aiyerowa su, marepi ano erasi aꞌi tote wisereye nineꞌirowa. 5 Ne Owane Sitewi ne tote tawesi umasinamiteye. Tote tawesiyei no wiyeme pefine aꞌi ne. Tu naifa mai tape no, iyape Lois, tu Owane Sitewi ne tote tawesi umasiteye. Sosu nowe moꞌo mai no, iyape Yunis, aiwawe aꞌi Owane Sitewi ne tote tawesiteye. Lowesi le ne erasi pefine aꞌi tote tawesiteye. Sosu ane etiri ta soꞌoruwesiya. Ne aiwawe tote tawesiyei lowesi lo aiwawe aꞌi ironamisiya.^c 6 Serai ane ne maꞌe au teꞌesiya. Owane Sitewi lai Hepene Waraꞌi aꞌi lo ne maꞌe neri aꞌi auwe. Ne lai Owane Sitewi lo Hepene Waraꞌi aꞌi marepi no erasi aꞌi heneraire. Ane ereti ano ne maꞌe isawe hetesiye su, Owane Sitewi lai Hepene Waraꞌi aꞌi lo ne maꞌe auwe.^d 7 Sosu Owane Sitewi lai marepi taweiru aꞌi au taꞌame. Ahowa, le marepi kairefi aꞌi auwe. Le aꞌi lai ne maꞌe ferafereiyei ewiteyei lo marepi auwe. Sosu aiwawe le aꞌi lai ne maꞌe marepi waraꞌi aꞌi auwe.^e

8 Serai ne lu taune maꞌe Meni Owane nomo lo ne au teꞌe fiyariyei su, ne marepi neritase aꞌi owe ape teritete. Ane Krais lo peri au teꞌeteye su, lu taune lai ane kalabus wesi sahe ani fu arosawi. Serai ne ane ne owe ape neritaseyere. Ahowa! Sosu notosi Krais Jisas lo peri heneruwe au teꞌeyei su, lu tamo notosi maꞌe au luwaruwerowa, sosu notosi fofowei erasi teriterowa. Owane Sitewi lo kairefi se notosi kairefi aꞌi ironamiyei. Serai ne etiri ape ne owe ape neritaseyete. 9 Sosu Owane Sitewi nomo lo aꞌi lai yo seni luwaru aꞌi towafi nomo lo au sasari ani pamoweyewe, sosu le nomo yo seni aseyaro se irowei ne ariariyeye. Nomo werese lai yo seni luwaru aꞌi towafi nomo lo au ani sasari pamowerowata. Ahowa! Owane Sitewi lai nomo ne tote ferafereiyewe, sosu marepi lo nomo maꞌe yo seni luwaru aꞌi au ani sasari pamoweye. Tu naifa weriyei Owane Sitewi lo ferafereiyei ape, le aꞌi lai Krais Jisas lo kairefi se nomo maꞌe auwe.^f 10 Serai Krais Jisas yo seni luwaru werese aꞌi nomo lo au ani sasari pamoweye ape, hi awei maꞌe itorai su, le aꞌi lai Owane Sitewi lo ferafereiyei erasi nomo maꞌe au atuatuwe. Le aꞌi lai temeniyeyei lo kairefi hi ani ararosawi. Le aꞌi lai marepi hepene heꞌi aꞌi peri heneruwe lo se au teꞌe atuatuwewe, sosu nomo mi mi pasi pasi weriyei ironamitorowa.^g

11 Peri heneruwe wisere aꞌi ne Owane Sitewi lai ane au teꞌe siye meni ariariyeye. Sosu le aꞌi lai ane Owane Sitewi lo peri lu taune maꞌe au teꞌe fiyariyei ne eimawesawi. Aiwawe aꞌi le lai ane Owane Sitewi lo peri au teꞌe atuatu siye meni ariariyeye.^h 12 Sosu Owane Sitewi lai ane ariariyeye su, serai lu tamo ane maꞌe au luwaruwesiya. Ahowa! Ane neritaseyeyei se taꞌama. Wiyeme, ane le ne soꞌoruwesiya! Ane marepi lo umasinamisiya. Nowe weriyei weriyei se, Owane Sitewi lai peri farere aꞌi lo le ane maꞌe auwe ape, le etiri ape au noweinoweinamiyei. 13 Peri ano wanure! Owane Sitewi lo peri farere aꞌi ape, ane ne maꞌe au teꞌeye ape, ne marepi no papu tote tawesire. Peri wisere aꞌi apou ape ne peri ape umasite, sosu lu taune maꞌe au teꞌe atuatute. Ne lu taune maꞌe Owane Sitewi lo peri au teꞌeyei su, Krais Jisas lo kairefi se, lu taune werese ne marepi erasi aꞌi tote wawesiyete. Sosu aiwawe ne Krais Jisas lo marepi tote tawesire. Sosu lu taune maꞌe au teꞌe fiyarite. 14 Owane Sitewi lo peri wiyeme aꞌi ape, le lai ne maꞌe auwe ape, ne etiri ape mo au noweinoweinamite. Owane Sitewi lo Hepene Waraꞌi aꞌi nomo werese lo marepi papu irosiya ape, ne Owane Sitewi lo peri wiyeme aꞌi au noweinoweinamite.ⁱ

15 Ne etiri ape soꞌoruwesiya awere? Lu taune werese omo pani Esia sahe lowe ane ne meꞌiyeni maꞌe arunatiyewe fi. Meni Figelus, sosu Hermogenes, lowesi aiwawe ane ne meꞌiyeni maꞌe arunatiyewe fi. 16 Ahowa, meni tereꞌe ane ne au noweinoweisiya. Meni iyape Onesiforus, ane Owane Sitewi maꞌe le ne apou ei towerisiya, “Owane Sitewi, ne meni ape, awaripi lo aiwawe, ferafereiyei erasi no lowe maꞌe ironamite.” Ane kalabus wesi sahe irosiya su, le ane ne neritaseye taꞌame. Sosu le marepi ano au kairefiyeteye. 17 Sosu le omo Rom iroteye su, le ane ne siye nehi tohoteteye. Sosu moꞌo le nihari ano siyeye. 18 Meni ape omo Efesus sahe ane maꞌe etiri tomu neꞌese ani pati aniye. Nowe yeꞌewi se, Meni Owane nomo lo le maꞌe ferafereiyei erasi au irorowa. Ne etiri apou aꞌi soꞌoruwesiya.