3 Lu taune ne maꞌe au luwaruweyei su, ne kairefi aꞌi teinamite. Apou aꞌi Krais Jisas lo ai lu kairefi aiwawe aꞌi kairefi aꞌi teinamisiya.^a 4 Wiyeme aꞌi. Ai lu tamo ai atu tiyatiyei su, lowe omo sitewi lo etiri tote etirowata. Ahowa! Lowe meni owane lowe lo ne au tote wisereyeyei. 5 Lu tamo yaru maꞌe iteroti. Meni taꞌi tutawe yaru maꞌe itero heneriyei ne totesiya su, le iterowei lo yo seni fu umasire. Sosu meni ape iterowei lo yo seni arisiyei su, le etiri tutawe anirowata.^b 6 Sosu aiwawe aꞌi meni ta taꞌaneyei awei lo taꞌane tohoteyei su, le aꞌi lai tu taꞌaneyei awei one, sawi me so taꞌuwe ani lototorowa. Meni ape one, sawi, me so, ani tepaꞌasiyei su, lu taune tereꞌe tamo faraꞌu tewi aꞌi aniyei.^c 7 Sosu ne peri ano ne tote etire. Ne peri ano ne toteyei su, Meni Owane Pefine aꞌi nomo lo etiri werese ape mo, le ne maꞌe au teꞌe atuatu areiyeyei.

8 Sosu aꞌi pe ne Jisas Krais ne tote tawesire. Le aꞌi lai meni owane Devit lo eime auwe kaukau weriyei. Sosu Jisas henerai su, lu tamo le me tapeꞌi sahe aine teraꞌeye. Sosu Owane Sitewi lai Jisas si tame taꞌane norohuwe sineye. Wiyeme aꞌi. Peri ano ape Owane Sitewi lo peri heneruwe wisere aꞌi ne.^d 9 Serai ane lu taune maꞌe Owane Sitewi lo peri heneruwe wisere aꞌi au teꞌe fiyariye su, lu tamo ane maꞌe au luwaruweye. Sosu lowe ane kalabus wesi maꞌe henetiyewe, sosu lowe ane wafei se ti tawesiye. Meni luwaru wou aꞌi ti tawesiye. Ahowa! Lu tamo Owane Sitewi lo peri einamirowata.^e 10 Serai lu taune tamo Owane Sitewi lo peri heneruwe wisere aꞌi wanu umasiyei su, ane faraꞌu fofowei erasi terite wisereye nineꞌirowa. Lowe Owane Sitewi lo peri heneruwe wanu umasiyei su, Owane Sitewi lai lowe maꞌe marepi hepene heꞌi aꞌi aurowa. Marepi hepene heꞌi ape Krais Jisas sahe Owane Sitewi lo mitaiyeyei erasi mase mi mi pasi pasi weriyei irotorowa. 11 Ne peri wiyeme ape wanu etire,

14 Ne peri ape lu taune maꞌe au teꞌete. Lowe peri yahowaꞌi teꞌe teꞌeyei su, ne lowe maꞌe Owane Sitewi lo nihe se peri kairefi aꞌi au teꞌete, “Fene peri yahowaꞌi eite ai peri owe ape teꞌete.” Lu taune tamo peri yahowaꞌi wanuwei su, marepi lowe lo luwaru aꞌi toteyei.ⁱ 15 Ne Owane Sitewi lo peri umasi tohotete, serai ne tahe paꞌare no Owane Sitewi maꞌe au heseyei. Ne tahe paꞌare no Owane Sitewi maꞌe au heseyei su, Owane Sitewi lai ne ne au teꞌe wisereyeyei. Ne wiyawi meni pefine aꞌi heneraiyei. Sosu ne Owane Sitewi lo peri neritase aꞌi owe ape teritete. Sosu ne Owane Sitewi lo peri au teꞌeyei su, ne peri ape wiyeme aꞌi lu taune maꞌe au teꞌe atuatu areiyeyei.^j 16 Ahowa! Ne peri luwaru yahowaꞌi aꞌi owe ape teꞌete. Meni ta peri yahowaꞌi teꞌeyei su, nowe iꞌero aꞌi le Owane Sitewi lo peri wiyeme aꞌi aweraꞌiyenatiyei. Sosu le meni luwaru aꞌi heneraiyei.^k 17 Meni ape lu taune maꞌe peri apou ape teꞌe au atuatuwei su, apou aꞌi wou enite tomu neꞌese tahe lo sahe pereꞌeye tapowe. Lu hesi peri apou ape apou aꞌi au teꞌe atuatuwe. Lowesi lo iyape Himeneus aiwawe Filetus.^l 18 Lowesi Owane Sitewi lo marepi wiyeme aꞌi ne meꞌiyeni maꞌe atati arunati. Lowesi peri ape wawero apou au teꞌeye, “Lu taune temeniye tepaꞌasiye ne, Owane Sitewi lai lowe werese hene ani sine tepaꞌasiye.” Wawero tene! Lowesi peri ape au teꞌeye su, lowesi lu taune tamo lo marepi au luwaruweye. 19 Ahowa! Owane Sitewi lo marepi lo sitewi kairefi aꞌi irosiya. Me tou wou aꞌi opo teinamiteye. Marepi lo sitewi sahe Owane Sitewi lai peri ta apou leseye,

20 Ipari awe tomu neꞌese wesi erasi aꞌi saro irosiya. Ipari awe tamo ipari tapiye wareme aꞌi, gol, se taꞌaneye. Ipari awe tamo ipari tapiye wapo aꞌi se, silva, taꞌaneye. Sosu ipari awe tamo me se taꞌaneye, sosu ipari awe tamo peperi waru se taꞌaneye. Etiri ape mo wiyawi wisere aꞌi se etiri tereꞌe tamo wiyawi luwaru aꞌi se. Owane Sitewi lo wesi sahe lu taune tomu neꞌese apou ape irosiya. 21 Serai aiwawe aꞌi meni ta yo seni luwaru aꞌi lo ani pamoweyei su, le faraꞌu wiyawi wisere aꞌi taꞌaneyei. Sosu Owane Sitewi lai meni ape lo marepi waraꞌi aꞌi au irowei. Sosu meni ape maꞌe Meni Owane Pefine aꞌi lai wiyawi lo auwei. Serai meni ape wiyawi wisere aꞌi apou ape faraꞌu taꞌanerowa. 22 Wanure! Ne marepi luwaru aꞌi, yoꞌorei lu tamo totesiya ape, atati itero arunatite. Sosu ne marepi waraꞌi aꞌi totete. Owane Sitewi lo marepi tote tawesite. Lu taune maꞌe marepi erasi aꞌi tote wawesiyenamite. Sosu Owane Sitewi lo marepi fetane aꞌi umasite. Etiri werese ape mo ne marepi kairefi aꞌi se umasi etite. Ne etiri ape mo umasite. Lu taune aiwawe aꞌi marepi waraꞌi aꞌi se Meni Owane nomo lo maꞌe ei ani arowesiya.ⁿ 23 Sosu aiwawe aꞌi ne ai peri luwaru yahowaꞌi aꞌi atati arunatite. Peri apou ape ai atu tiyatisiya.^o 24 Serai Meni Owane Pefine lo wiyawi ani siye meni ne ai peri owe ape teꞌe tiyatite. Ahowa! Ne lu taune werese maꞌe marepi wisere aꞌi au irote. Ne aiwawe aꞌi Owane Sitewi lo yo seni werese lu taune maꞌe faraꞌu au teꞌe atuatute. Ne Owane Sitewi lo yo seni au siye atuatuwei su, ne ai marepi werese fu arosawite. 25 Sosu aꞌi pe lu taune tamo meni ape maꞌe ai peri teꞌe tiyatiyei su, ne marepi momotei aꞌi se lowe maꞌe au teꞌe atuatute. Ne marepi eresene aꞌi se au teꞌe atuatuwei su, Owane Sitewi faraꞌu marepi lowe lo atati ani aweto irowei. Serai lowe Owane Sitewi lo peri wiyeme aꞌi wanu soꞌoruweyei. 26 Sosu aiwawe aꞌi lowe marepi towafi lowe lo amerame aꞌi heneraiyei. Lowe marepi amerame aꞌi heneraiyei su, sepei Satan lowe maꞌe laꞌinau se owe ape aine tawesi anirowata. Sepei Satan lowe aniyei ne totesiya. Sosu le lowe maꞌe marepi lowe lo tatai aniyei ne totesiya. Le marepi lowe lo tatai aniyei su, lowe yo seni lo umasiyei.