Nowe yeꞌewi su yo seni luwaru henerairowa.
3
Peri eite wanu etire. Nowe yeꞌewi se etiri luwaru wiyeme aꞌi henerairowa.a 2 Lu taune tomu neꞌese marepi erasi aꞌi towafi lowe lo, tote wawesiyenamirowa. Lowe maꞌaru ne erasi aꞌi totenamirowa. Iyape towafi lowe lo ei ani arowerowa. Lowe lu taune werese maꞌe teꞌe naruterowa. Lowe ei ani arowerowa. Lowe tai, mai lowe lo peri arisinamirowa. Lowe lu taune maꞌe au teꞌe wisereyerowata. Lowe yo seni towafi lo aseyaro irorowata. 3 Lu taune maꞌe marepi erasi aꞌi tote wawesiyerowata. Lu taune tamo lowe maꞌe au luwaruwerowa su, lowe yo seni luwaru aꞌi lowe lo anite tawesirowa. Lu taune maꞌe lowe teꞌe narurowa. Lowe peri heneruwe luwaru aꞌi au teꞌe fiyarinamirowa. Lowe lu taune maꞌe au luwaruwerowa. Lowe etiri wisere aꞌi ai marepi totenamirowa. 4 Lowe teꞌe areare irorowa. Lowe marepi onotaꞌano aꞌi ne. Lowe marepi towafi lowe lo erasi aꞌi tote wawesiyerowa. Lowe awei lo yo seni erasi aꞌi toterowa. Ahowa, lowe Owane Sitewi lo marepi toterowata. 5 Lowe yo seni waraꞌi areareye irorowa. Ahowa, lowe Owane Sitewi lo peri arisirowa. Ne lu apou ape mo meꞌiyeni maꞌe atati arute.b 6 Sosu aꞌi pe wanure! Lu feni ape lowe wesi tamo wiyei su, lowe taune, marepi hawihawi aꞌi irosiya ape, arearerowa. Marepi lowe lo tatai anirowa. Taune ape yo seni luwaru aꞌi tomu neꞌese ironamisiya. Sosu marepi lowe lo yo seni luwaru aꞌi apou ape maꞌe tatai anisiya. 7 Taune ape mo etiri werese siye soꞌoruweyei ne. Ahowa, lowe Owane Sitewi lo peri wiyeme aꞌi tote tawesi taꞌame. 8 Apou aꞌi tu naifa lu hesi iyape Janes, sosu Jambres yo seni apou ape iroteye. Lowesi Moses lo peri arisiteye. Serai lu tamo apou ape lowesi peri wiyeme aꞌi arisinamisiya. Marepi lowesi lo luwaruwe poꞌuteye. Serai Owane Sitewi lai lowesi ne meꞌiyeni maꞌe atati aruwe.c 9 Marepi apou ape lowesi lo erasi aꞌi henerairowata. Ahowa, marepi meremereye aꞌi lowesi lo lu taune werese lai marepi lowesi lo siye etirowa. Lu hesi ape, Moses lo yo peri arisiye ape, marepi lowesi lo aiwawe yahowaꞌi henerai. Lu taune werese lai marepi meremereye aꞌi lowe lo siye etiyei.Pol Timoti maꞌe au teꞌesiya.
10 Ahowa, ne lai lu hesi lo yo seni luwaru aꞌi umasi taꞌame. Ne peri werese ano wanu soꞌoruwesiya. Aiwawe ne marepi werese ano siye soꞌoruwesiya. Sosu aiwawe marepi sitewi ano, marepi tote tawesiyei ano, sosu marepi farere aꞌi ano ne siye soꞌoruwesiya. Ane lu taune werese marepi erasi tote wawesiyenamiye. Ne soꞌoruwesiya. Ane etiri luwaru teriteye su, ane kairefi aꞌi teiteye. Ne soꞌoruwesiya. 11 Sosu lu tamo ane maꞌe au luwaruweye su, sosu ane fofowei teriteye su, etiri ape mo ne soꞌoruwesiya. Ane omo Antiok, Aikoniam, sosu Listra saro iroteye su, ane marepi orese aꞌi teriteyewe, sosu kairefi aꞌi teinamiye. Ahowa, Meni Owane ano etiri werese luwaru aꞌi, ane teriteye ape, le ane kairefiye teiyei ne pati ferafereiye.d 12 Wiyeme! Lu taune tomu neꞌese Krais Jisas lo marepi umasiyei ne totesiya. Lu tamo lowe werese maꞌe au luwaruweyei.e 13 Lu luwaru aꞌi, sosu lu areareyei aꞌi, lowe yo seni luwaru aꞌi lowe lo erasi aꞌi heneraiyei su, sosu yo seni luwaru pefine aꞌi henerairowa. Lowe lu taune tamo areareyei, sosu lu tereꞌe tamo lowe maꞌe areareyei. 14 Ahowa! Ne, Timoti, peri ano wanure. Ne etiri werese ne tu wanu soꞌoruweteye ape, umasite. Ne aꞌi lai, lu taune apou ape ane mo, ne maꞌe au teꞌe atuatuwe ape, soꞌoruwesiya. Serai ne etiri werese ape tote anite tawesite. 15 Ne eimane osu iroteye su, ne Owane Sitewi lo peri werese ape wanu soꞌoruweye. Owane Sitewi lo peri ape faraꞌu ne maꞌe marepi wisere aꞌi auwei. Serai ne Krais Jisas ne tote tawesiyei ape, ne tote tawesiyei su, Owane Sitewi lai ne maꞌe marepi hepene heꞌi aꞌi aurowa. 16 Owane Sitewi lo peri werese Owane Sitewi lai ahi lo se au teꞌe areiyeye. Sosu ne faraꞌu Owane Sitewi lo peri se lu taune maꞌe au teꞌe atuatute. Ne Owane Sitewi lo peri ape se lu taune lo yo seni luwaru aꞌi au teꞌe fareraiyete. Ne lu taune maꞌe peri lowe lo au fareraiyeyei. Sosu aiwawe ne faraꞌu lu taune werese maꞌe yo seni waraꞌi aꞌi au atuatuwei.f 17 Serai meni ta Owane Sitewi lo peri werese wanu umasinamiyei su, le Owane Sitewi lo meni heneraiyei. Sosu Owane Sitewi lo meni ape faraꞌu wiyawi wisere werese aꞌi taꞌanerowa.