Ne Owane Sitewi lo peri au teꞌe fiyarite.
4
Sosu aꞌi pe Krais Jisas si tame aiyerowa, le lu taune werese aꞌi au noweinoweirowa su, le aꞌi lai lu taune werese hepene norohu irosiya ape, au hese ereiyei. Sosu aiwawe aꞌi le lu taune tu temeniyeye ape, au hese ereirowa. Owane Sitewi, Krais Jisas aiwawe aꞌi lowesi lo nihe se, ane ne maꞌe peri kairefi aꞌi au teꞌesiya. 2 Ne Owane Sitewi lo peri au teꞌe fiyarite. Lu taune tamo Owane Sitewi lo peri wanu umasiyei ne totesiya su, ne lowe maꞌe faraꞌu au teꞌere. Sosu aiwawe lu taune Owane Sitewi lo peri wanu umasi taꞌame su, ne apou aꞌi lowe maꞌe au teꞌere. Ne lu taune werese lo peri au teꞌe fareraiyere. Aiwawe ne lowe lo yo seni luwaru aꞌi peri morose teꞌere. Sosu lu taune werese maꞌe marepi wisere aꞌi totere. Ne lu taune maꞌe au teꞌe fiyariyei su, ne marepi lowe lo farere aꞌi au irote. Sosu ne Owane Sitewi lo peri lowe maꞌe au teꞌe atuatu noweinoweite. 3 Wanure! Nowe ta su lu taune tomu neꞌese Owane Sitewi lo peri wiyeme aꞌi wanu umasi taꞌame. Ahowa, lowe marepi towafi lowe lo umasirowa. Lowe atuatu siye lu tomu neꞌese ei taꞌuweraiyewe, sosu lowe lai marepi towafi lowe lo wanu umasirowa.a 4 Ahowa, lowe Owane Sitewi lo peri meꞌiyeni maꞌe atati aruwei. Sosu lowe yaꞌariyei peri yahowaꞌi umasinamiyei. 5 Ahowa ne mi mi werese etiri werese se marepi tote eti peratite. Etiri luwaru aꞌi ne maꞌe heneraiyei su, ne kairefi aꞌi teite. Ne lu taune werese maꞌe Owane Sitewi lo peri au teꞌe fiyarite. Owane Sitewi lo wiyawi werese ne taꞌaneye ape, ne au noweinoweite. 6 Nowe ano henerai. Nowe iꞌero aꞌi lu tamo ane aine teraꞌeyei ne totesiya. Apou aꞌi lowe ane aine teraꞌeyei su, ane lai tahe paꞌare ano Owane Sitewi maꞌe au heseyei. Ane atahe temeniyeye ne ataheyewa.b 7 Ane Owane Sitewi lo wiyawi taꞌane tepaꞌasiye. Ane neritase aꞌi terite taꞌame. Apou aꞌi ane itero aweraꞌiyenatinamiye. Ane Owane Sitewi lo marepi werese tote tawesiye.c 8 Serai ane temeniyeyei su, Owane Sitewi lai ane maꞌe marepi hepene norohu neri aꞌi aurowa. Marepi hepene norohu heꞌi aꞌi apou aꞌi yo seni waraꞌi aꞌi auwei. Meni Owane Pefine aꞌi au heseyei siye meni nomo lo, le lu taune werese marepi waraꞌi aꞌi au hese ereirowa. Serai nowe yeꞌewi se Owane Sitewi lai ane maꞌe yo seni waraꞌi aꞌi aurowa.dPol lai Timoti maꞌe eiye, “Ne witane aꞌi fa aiyere.”
9 Ne ane maꞌe witane aꞌi aiya. 10 Meni ta iyape Demas, le awei lo etiri werese ape mo ne marepi erasi toteteye. Sosu le ane ne meꞌiyeni maꞌe atati arunatiyewe, omo Tesalonaika maꞌe fi. Meni tereꞌe iyape Kresens omo pani Galesia maꞌe fi. Sosu Taitus pani Dalmesia maꞌe fi. 11 Meni Luk taꞌi aꞌi ane mase irosiya. Ne meni Mak hene aiseri, sosu fenesi ane maꞌe aiya. Mak meni wisere aꞌi tene! Tu le ane Owane Sitewi lo wiyawi ano au pati taꞌaneteye.e 12 Ane meni Tikikus omo Efesus maꞌe eimawesawi. 13 Fenesi aiyeyei su, ne ipari tahe erasi pite aꞌi ano aita. Ane ipari tahe ano ape omo Troas arunati. Meni Karpus lo wesi sahe anitesiya. Sosu aiwawe fenesi aiyeyei su, fenesi one towe werese ano ne aita. Ne witu hamau, ane lese tepaꞌasiye ape, aita.f
14 Wanure! Meni ta iyape Aleksander, wiyawi lo kapa taꞌanesiya. Le ane maꞌe erasi aꞌi au luwaruweteye. Serai Meni Owane Pefine aꞌi nomo lo le maꞌe etiri luwaru aꞌi itiyaꞌu au irorowa.g 15 Weiyai! Ne meni ape siye etire! Le Owane Sitewi lo peri, ne nomo au teꞌe fiyariye ape, ai marepi erasi aꞌi totesiya.
16 Sosu aꞌi pe lu tamo tu ane maꞌe etiye su, lu taune werese ane au pati feraferei taꞌame. Lu taune werese ane arunati iteroti. Ane lowe maꞌe marepi luwaru aꞌi tote taꞌame. Sosu Owane Sitewi aiwawe lowe maꞌe marepi luwaru aꞌi tote taꞌame. 17 Ahowa! Meni Owane nomo lo ane mase teiteyewe, sosu marepi ano au kairefiyeye. Owane Sitewi lai ane maꞌe au ani pati ferafereiye. Serai ane faraꞌu Owane Sitewi lo peri lu tewi tereꞌe maꞌe au teꞌe fiyari areiyeteye. 18 Sosu lu taune etiri luwaru aꞌi ane maꞌe au luwaruweyei su, Meni Owane Pefine aꞌi nomo lo ane maꞌe au pati ferafereiyei. Sosu le ane omo waraꞌi aꞌi lo maꞌe hene ani wirowa. Sosu ane mi mi pasi pasi le mase irotorowa. Serai ane mi mi weriyei iyape lo ei ani arowenamisiya. Wiyeme aꞌi.
Peri pihatu ane lu taune tamo eritesiya.
19 Sosu ane peri yeꞌewi au teꞌesiya. Ne nohuweripi Akwila, tani lo Prisila lowesi maꞌe eritere. Sosu lu taune werese Onesiforus lo wesi sahe iroteye ape, ne lowe maꞌe eritere.h 20 Meni Erastus omo Korin sahe irosiya. Sosu meni Trofimus u erasi se ane omo Miletus arunati.i 21 Ne witane aꞌi ane maꞌe aiya. Nowe naretei aꞌi ataheyeraiwa. Sosu meni Yubulus, sosu meni Pudens, sosu Linus aiwawe Klodia, lowe ne maꞌe eritesawisiya. Sosu aiwawe lu taune werese, Krais Jisas lo marepi umasiye ape, ne maꞌe aiwawe eritesawisiya.
22 Sosu aꞌi pe Meni Owane Pefine aꞌi nomo lo hepene no aiwawe aꞌi iroteyei. Owane Sitewi lo marepi ferafereiye ne mase ironamiteyei. One towe eite tepaꞌasiye. Papera.