1
00:00:05,000 --> 00:00:30,340
Rõhm awcaꞌteh. My me hỳꞌtuu ne mecte cu jẽehcjiꞌ ny cajrẽhn ẽhntaa ji, amne me Sesohx japin to praa. Ne mecte pỳrcree cut hacop, xỳm ẽhꞌcree criire pehtxeht pejꞌhã my Sesohx cut mecte amjõhjẽhpix cati ji peht ẽhꞌcree my ẽhncjix my me to tẽ. My nee ẽhꞌcree my Sesohx xỳr nooreꞌ ny mecte haꞌcree pex.

2
00:00:30,340 --> 00:00:45,780
Rõhm crẽhꞌ to Tehbehrehj pẽhn pỳrcree cwy praa, ne tapiireh ẽhꞌcree harehj. Myyreh Sesohx te me hõꞌ ny Me Pajẽhpixxỳ my ẽhmpex jãarẽn ne cohte mecmy hõr my mecte ẽhꞌcohr ẽhntaa nyhnreh.

3
00:00:45,780 --> 00:01:00,700
Rõhm mecte cajrẽhn ẽhntaa jiꞌ te Sesohx me, ẽhꞌcut mecte amjõhjẽhpix cati ji japi hỳyprỹy, ne me pỳrcree ẽhntaa ji my ẽhncjix, ne hamoh me crẽhꞌ to Cafáhna-õoh ẽhntaa wyr praa, Sesohx cut.

4
00:01:00,700 --> 00:01:10,860
Ne me cuꞌ ny ẽhjrii, ne me hapux, ne mecte Sesohx ny hãm, ne me cohmy: —Mejto Aahimpex Cati, jõhꞌreh my pyht jỹh my ẽhntaareh aapux?

5
00:01:10,860 --> 00:01:30,500
Ne mecte Sesohx coohcjir to hãjỹhr, my cohte mecmy: —Wa ẽhjcryhꞌcỹm meamy, nee ẽhjte to ẽhmpoo jaahyhr catehꞌ ny meate ẽhjpohpohn xỳꞌny ca me japin noore my, ne cymy ẽhjte meamy ẽhmpoo jõr my meate ẽhmpoo to aajarte ẽhncwyrjapii ca me japi.

6
00:01:30,500 --> 00:02:11,320
Cwyrjapii wa meamy, ca nee meajỳypỳn xỳꞌny peht ẽhmpoo japin to aapaj noo cỹm. Pom me pajõ, coh me cohcoh my me paꞌtohꞌ cỹm ẽhꞌcaacooh ne ammrẽ ẽhntaa jẽhruuꞌpi wa ẽhjpi Meatõꞌ Cỳꞌ te meamy meajõ jõr xỳꞌny ẽhntaa, qui ca nee ẽhꞌcaacooh noore, qui ca meajõ ẽhntaa meato ẽhꞌhimpex ca ca meatẽhr tõhm to meatẽhr. Meajõ ẽhntaa ny ca quit meamjõhpa ne meamjõhjaꞌcree. Xỳm Jõnxõoh, Me Pajẽhpixxỳ, te ẽhncryhꞌcỹm amjõhmy ẽhjpehtxeht hyhr, ne nee ẽhjrỳyny meammrẽere.

7
00:02:11,320 --> 00:02:27,420
Rõhm jõhm jiꞌ te Sesohx jarcwaa ẽhntaa ny cỹm hapac, ne jõhm ji cohmy: —Ẽhmpoo my Me Pajẽhpixxỳ my ẽhmpoo quẽhn, war me tỹmꞌne ẽhmpoo jaahyhr to hãneꞌ pom qui cohmy ẽhmpoo ny ẽhꞌprỹm ẽhntaa?

8
00:02:27,420 --> 00:02:39,020
Ne mecte Sesohx my hãjỹhr, my cohte mecmy: —Ca nee me to ẽhmpoo jaahyhr noore, ne cymy Me Pajẽhpixxỳꞌ te meawyr ẽhjcohjahic ẽhntaa cut amjõhjaahyhr to aapa.

9
00:02:39,020 --> 00:02:53,020
Ne cohte mecmy hãjỹhr, rõhm me cohmy: —Ẽhmpoo ca ca quit to ẽhmpoo jaahyhr cateh, war me ẽhmpoo ny aapohpoh, ne me tỹmꞌne aacryhꞌcỹm aacaacuc to aapaꞌ ny aajaꞌcree pex?

10
00:02:53,020 --> 00:03:05,100
Xỳm me panquit jiꞌ te pji ẽhncreecree cỹm manaa ẽhntaa cohr to ẽhjpa, pom qui ẽhꞌhuc cỹm cohte harcwaa to hãjỹhr: “Me Pajẽhpixxỳꞌ te cujcwaa pẽhn mecmy me hõ jõr to ẽhjpa.”

11
00:03:05,100 --> 00:03:26,000
Ne mecte Sesohx my ẽhꞌhuc jãarẽn to hãjỹhr, rõhm cohte mecmy: —Wa ẽhjcryhꞌcỹm meamy awjãarẽ, pom cujcwaa pẽhn meaquit jiꞌ wyr me hõ axxwy ẽhntaa, nee Mozez te mecmy me hõ ẽhntaa jõr noore my. Max, Me Pajẽhpixxỳ ẽhꞌtyx meamy meajõ ẽhmpex ẽhntaa hõ.

12
00:03:26,000 --> 00:03:39,360
Xỳm Me Pajẽhpixxỳꞌ te meamy meajõ ẽhmpex jõr ẽhntaa paꞌ wa, wa amne cujcwaa pẽhn tẽ, ne ca pjiꞌ cỹm meapa ẽhntaa jiꞌ to ẽhjhimpex, meatẽhr tõhm to meatẽhr xỳꞌny.

13
00:03:39,360 --> 00:03:47,840
Ne Sesohx te mecmy amjõhjãarẽn to hãjỹhr, rõhm me cỹm pa, ne me cohmy: —Cỹh, mejmy me jõ ẽhntaa jõr to aapa!

14
00:03:47,840 --> 00:04:04,860
Rõhm Sesohx te mecmy: —Paꞌ wa ẽhjpi meajõ ẽhntaa, wa ca meato ẽhjhimpex ca ca meatẽhr tõhm to meatẽhr! Ca ca meano ẽhjcut amjõhjẽhpix, qui ca nee myꞌreh meano my prỹm noore, ne ca nee myꞌreh meano my cur noore.

15
00:04:04,860 --> 00:04:28,240
Caacru ca meahixny! Pom wa ẽhjte ryꞌmy meamy amjõhjãarẽn, my meate ẽhjpohpohn, caacru my nee meate ẽhjcut amjõhjẽhpix noore! Pe ne Sesohx te mecmy hãjỹhr xỳm qui ca jõhm ẽhꞌcut amjõhjẽhpix qui ca Carõo Pex jõhm my ẽhꞌhehꞌtyx jõr to ẽhjpaꞌ to hãneꞌ pom coh qui me pajõꞌ coh ne meamjõhtohꞌ tyx to paapa.

16
00:04:28,240 --> 00:04:39,300
—Pom Jõnxõoh te ẽhjmy me hõr ẽhntaa ji, qui ca meꞌtyx ẽhjcut amjõhjẽhpix. Ne pom mecte ẽhjcut amjõhjẽhpix ẽhntaa ji, wa ca nee amjõhtiitee mecrij noore.

17
00:04:39,300 --> 00:04:51,580
Xỳm wa nee ẽhjte to amjõhꞌmy ẽhmpoo jaahyhr xỳꞌny cujcwaa pẽhn ẽhjtẽm noore, ne pom cohte ẽhjcohjahic ẽhntaaꞌ my ẽhmpoo ny ẽhꞌprỹm ẽhntaa ji, wa ẽhjte ẽhmpoo to japux xỳꞌny, cohte cohjahic.

18
00:04:51,580 --> 00:05:08,920
Ẽhmpoo myymy Me Pajẽhpixxỳ my ẽhꞌprỹm? Pom cohte ẽhjmy me hõr ẽhntaa ji, wa ẽhjte hõhꞌcuꞌny awcaꞌteh ẽhntaa cỹm to acpỹyhmy meꞌtẽhr par, qui nee jõhm ẽhjpehctor noore xỳꞌny my cohmy taꞌny ẽhꞌprỹm.

19
00:05:08,920 --> 00:05:26,120
Hõ, ne cohte ẽhjcohjahic ẽhntaa my taꞌny ẽhꞌprỹm, qui mecte ẽhjpi ẽhꞌcra pohpohn ne mecte ẽhjcut amjõhjẽhpix ẽhntaa ji, qui meꞌtẽhr tõhm to meꞌtẽhr. Pe qui ca hõhꞌcuꞌny awcaꞌtehꞌ noꞌ cỹm wa ca to acpỹyhmy meꞌtẽhr pa.

20
00:05:26,120 --> 00:05:46,140
Pe ne Sesohx te me to ẽhꞌhimpex to hãjỹhr, rõhm ẽhꞌprõtpi Zohdew cati ji ẽhꞌprỹy pex. Pom pinny cohte harcwaa to: “Me Pajẽhpixxỳꞌ te meamy meajõ ẽhmpex ẽhntaa paꞌ wa, wa amne cujcwaa pẽhn tẽ.” My me harcwaa ẽhntaa ny ẽhꞌprỹy pex, pinny.

21
00:05:46,140 --> 00:05:58,720
Ne meajpẽn my: —Tem crẽ Sesohx ẽhntaa nee Zohzee craj noore? Me paate hõhm me ẽhnxeeh pohpohn pexteh. Ẽhmpoo ny my amne cujcwaa pẽhn ẽhꞌtẽm ny amjõhjãarẽn to hãne?

22
00:05:58,720 --> 00:06:05,080
Rõhm Sesohx te ẽhꞌprõtpi mecmy: —Nee me jarcwaa prỹy pex noo cỹm!

23
00:06:05,080 --> 00:06:19,760
Qui ca Jõnxõoh te ẽhjcohjahic ẽhntaa jõhm to ẽhꞌhimpex, qui ca jõhm ẽhjcut amjõhjẽhpix. Pe qui ca hõhꞌcuꞌny awcaꞌteh ẽhntaa cỹm to jõhm tẽhr, qui ca jõhm acpỹyhmy ẽhjpa.

24
00:06:19,760 --> 00:06:37,180
Mam profet cati jiꞌ te to ẽhꞌhuc to hãjỹhr, ne mecte to ẽhꞌhuc to: “Qui ca Me Pajẽhpixxỳ meꞌcohnehꞌtehꞌ to ẽhꞌhimpex to ẽhjpa.” Hõ, cwyrjapii, ca ca me Jõnxõoh cỹm pa, qui ca Jõnxõoh meato ẽhꞌhimpex, ca ca me ẽhjcut amjõhjẽhpix.

25
00:06:37,180 --> 00:06:46,180
Max, nee tỹmne meanoꞌ te Jõnxõoh pohpohn noore. Wa ẽhjpehtxeht te hõmpohn, xỳm wa amne Me Pajẽhpixxỳꞌ pẽhn tẽ.

26
00:06:46,180 --> 00:06:54,740
Wa ẽhjcryhꞌcỹm meamy, ca ca meano ẽhjcut amjõhjẽhpix, wa ca meanoꞌ to ẽhjhimpex ca ca meano aatẽhr tõhm to aatẽhr.

27
00:06:54,740 --> 00:06:59,980
—Ẽhjpi meajõ ẽhmpex ẽhntaa, meatẽhr tõhm to meatẽhr xỳꞌny.

28
00:06:59,980 --> 00:07:05,700
Meaquit jiꞌ te pji ẽhncreecree cỹm manaa ẽhntaa cohr to ẽhjpa, ne meꞌtyhc par.

29
00:07:05,700 --> 00:07:12,380
Max, pom cujcwaa pẽhn ẽhjpi meajõ ẽhmpex tẽ ẽhntaa, ca ca me ẽhjcoh ne nee meatyhc noore.

30
00:07:12,380 --> 00:07:35,720
Hỹh, ẽhjpi meajõ ẽhmpex ẽhntaa, cujcwaa pẽhn, meatẽhr tõhm to meatẽhr xỳꞌny. Ca ca ẽhjpi meajõ ẽhntaa coh, ne ca meatẽhr tõhm to meatẽhr. Pom wa meamy meajõ jõr prỹm ẽhntaa jẽehꞌ mahã, wa ca pjiꞌ cỹm meapa ẽhntaa ji my amjõhhõ, ca ca meatẽhr ny aapa.

31
00:07:35,720 --> 00:07:51,080
Rõhm Zohdew cati jiꞌ te Sesohx jarcwaa ẽhntaa ny cỹm hapac, ne meꞌprõtpi harcwaa ẽhntaa prỹy pex, ne meajpẽn my: —Jõhꞌny qui ca Sesohx me paamy amjõhcỳ jẽeh hõ coh me ẽhꞌcohr ẽhntaa to?

32
00:07:51,080 --> 00:08:09,380
Ne mecte harcwaa ny xwyꞌ to hãjỹhr, rõhm Sesohx te mecmy: —Wa ẽhjcryhꞌcỹm meamy, ca ca nee me ẽhjpi Meatõꞌ Cỳ ẽhntaa jẽeh cohr noore, ne nee me ẽhjcapruu to aacõm noore, ne ca nee meatẽhr tõhm to meatẽhr noore.

33
00:08:09,380 --> 00:08:24,780
Max, ca ca me jẽeh coh, ne me ẽhjcapruu to ẽhjcõ, ne ca meatẽhr tõhm to meatẽhr. Pe qui ca hõhꞌcuꞌny awcaꞌtehꞌ noꞌ ny, wa ca to acpỹyhmy meatẽhr.

34
00:08:24,780 --> 00:08:33,540
Xỳm ẽhncryhꞌcỹm jẽeh ẽhntaaꞌ mahã meajõ, meate ẽhꞌcohr xỳꞌny, ne ẽhncryhꞌcỹm ẽhjcapruu ẽhntaa, meate to aacõm xỳꞌny.

35
00:08:33,540 --> 00:08:41,840
Pom me jẽeh coh ne me ẽhjcapruu to ẽhjcõ ẽhntaa ji, meꞌtyx ẽhjcỹm ẽhꞌcohꞌhi, wa tapanny me cỹm ẽhjcohꞌhi.

36
00:08:41,840 --> 00:08:53,440
Pom Jõnxõoh te ẽhjcohjahic ẽhntaa ẽhjpa, cwyrjapii wa paxwyyre ẽhjpa. Ne ẽhjpa ẽhncwyrjapii mecte ẽhjcohr cati ji ẽhꞌtyx ẽhjpa.

37
00:08:53,440 --> 00:09:14,360
Cwyrjapii my cujcwaa pẽhn meajõ ẽhntaa paꞌ wa! Xỳm pom meaquit jiꞌ te cujcwaa pẽhn me hõꞌ cohr to ẽhjpa ẽhntaa ajteeꞌmy. Xỳm mecte ẽhꞌcohr to ẽhjpa ne meꞌtyhc par. Max, ca ca meano ẽhjpi meajõ ẽhntaa coh, wa ca meanoꞌ to ẽhjhimpex ca ca meano aatẽhr tõhm ny aapa.

38
00:09:14,360 --> 00:09:24,580
Hõ, ne Sesohx te mecmy amjõhjãarẽn to hãjỹhr, Zohdew cati jiꞌ te coohprõnxỳꞌ cỹm, crẽhꞌ to Cafáhna-õoh cỹm.

39
00:09:24,580 --> 00:09:38,440
Rõhm Sesohx cut mecte amjõhjẽhpix cati jiꞌ cwyꞌ te harcwaa ẽhntaa ny cỹm hapac, ne mecte ajpẽn my: —Aapoh Sesohx jarcwaa ẽhntaa jaꞌcree quitre! Jõhm qui ca harcwaa ẽhntaa ny cỹm pa?

40
00:09:38,440 --> 00:09:52,860
Ne me hỳyprỹy pex ne mecte ajpẽn my hãjỹhr ẽhntaa ny Sesohx te me haꞌcree pex, ne cohte mecmy: —Tem crẽ jarcwaa ẽhntaa jaꞌcree quitre ẽhntaaꞌ cut ca me ẽhjcapeh xỳꞌny?

41
00:09:52,860 --> 00:09:59,340
Ca ca me ẽhjpi Meatõꞌ Cỳ ẽhntaa acpỹyhmy cujcwaa wyr jỳypehr ny ẽhjpohpoh, ne jõhꞌny ca ca meamjõhcỹm aajapac to?

42
00:09:59,340 --> 00:10:20,040
Xỳm Carõo Pex pehtxeht qui ca meato ẽhꞌhimpex ca ca meatẽhr tõhm to meatẽhr. Xỳm meacỳꞌ cỹm meajẽeh ẽhntaa nee meato ẽhꞌhimpex noore. Pom wa ẽhjte meamy jarcwaa jãarẽn ẽhntaa, ca ca me jarcwaa ny ẽhjcỹm pa, qui ca Carõo Pex meato ẽhꞌhimpex ca ca meatẽhr tõhm ny aapa.

43
00:10:20,040 --> 00:10:38,100
—Max, pom ca mejcapeꞌny aacohꞌhi ẽhntaa jiꞌ cwy nee ẽhjcut amjõhjẽhpix noore. Ne Sesohx te mecmy hãjỹhr, xỳm ryꞌmy catorpiꞌmy cohte me hỳyprỹy pex cati ji jaꞌcree pex par, ne cohte mamꞌhã jõhm te cohmy ẽhꞌhixxeeh ẽhntaa jaꞌcree pex.

44
00:10:38,100 --> 00:10:48,260
Ne cohte mecmy: —Cohte hãjỹhr ẽhntaaꞌny wa ẽhjte meamy: “Qui ca Jõnxõoh meanoꞌ to jõhmy noore, ca ca nee meano ẽhjcut amjõhjẽhpix noore.”

45
00:10:48,260 --> 00:10:59,560
Ne Sesohx te mecmy harcwaa to hãjỹhr, my ẽhꞌprõtpi meꞌcwyꞌ te Sesohx cut amjõhjẽhpix to ẽhjpaꞌ to hẽhtep, ne nee me myꞌreh ẽhꞌcut ẽhjpaj noore.

46
00:10:59,560 --> 00:11:06,520
Rõhm Sesohx te mecte doze ẽhntaa ji my: —Tem me caxwyyre my ẽhjcapehꞌ prỹm?

47
00:11:06,520 --> 00:11:19,660
Rõhm Sehmãw Pit te cohmy: —Paꞌheeh, jõhm wyr wa ca meantohw? Xỳm ca aapehtxeht mejmy mejtẽhr tõhm to mejmy aacaacuc to aapa wa me mejtẽhr tõhm ny ẽhjpa.

48
00:11:19,660 --> 00:11:29,500
Ne ẽhncryhꞌcỹm aapi Crehx, Me Pajẽhpixxỳꞌ craꞌ ca! Wa mejte taꞌny aajaꞌcree pex, ne mejte aacut amjõhjẽhpix.

49
00:11:29,500 --> 00:11:42,300
Ne Pit te Sesohx my harcwaa to hãjỹhr, rõhm Sesohx te cỹm hapac ne cohte mecmy: —Pom mrẽ ẽhjte meato doze ne ẽhjte amjõhmy meajẽhrin, caacru my meanopi carõo quin ny!

50
00:11:42,300 --> 00:12:02,620
Ne Sesohx te mecmy hãjỹhr, xỳm cohte me to doze ẽhntaa jiꞌ noꞌ japryꞌ to Zoht, Sehmãw Ẽhxcarehjot teꞌcãmter ẽhntaa. Zoht ẽhntaa te Sesohx my ẽhꞌhixxeeh xỳꞌny, macnyymy Sesohx te mecmy harcwaa to hãjỹhr.