1
00:00:05,000 --> 00:00:14,880
Ne hamoh mo, rõhm jõhm jõnxii toh pẽhnꞌhã jõhm toproo pym ẽhntaa taxmy pinny jỹh, rõhm Sesohx jõhm wyr cator.

2
00:00:14,880 --> 00:00:37,740
Rõhm Sesohx cut mecte amjõhjẽhpix cati jiꞌ te cohmy: —Mejto Aahimpex Cati, ẽhmpoo ny my jõhm reht toproo? Tem cohte ẽhmpoo quin ny amjõhjẽhpix my Me Pajẽhpixxỳꞌ te jõhm toꞌ to hãjỹhr? Py hop, tem hõnxõoh me hõnxii te ẽhmpoo quin ny amjõhjẽhpix my Me Pajẽhpixxỳꞌ te jõhm toꞌ to hãjỹhr?

3
00:00:37,740 --> 00:00:55,060
Rõhm Sesohx te mecmy: —Hop, aapoh nee jõhm toproo ẽhntaa jõnxõoh me, hõnxii me, meꞌnoꞌ te ẽhmpoo quin ny amjõhjẽhpix noore. Ne ẽhjte jõhm tỳt my jõhm rẽht ca me Me Pajẽhpixxỳ my ẽhmpex jãarẽn xỳꞌny jõhm toproo.

4
00:00:55,060 --> 00:01:25,660
Jõnxõoh te ẽhjcohjahic ẽhntaa my ẽhmpoo ny ẽhꞌprỹm ne cohte awcaꞌtehꞌ cwy jẽhrin wa ẽhjte ẽhmpoo to japux xỳꞌny. Cwyrjapii wa ca to ryꞌmy ẽhmpoo jaahyh ne nee cohte ẽhjmy awcaꞌteh ẽhntaa ji jẽhrin cỳjꞌny to ẽhmpoo jaahyhr noore ca. Pom ca qui meajatox cỹm amcroꞌ ny amcwaa, my awcapỳt ca nee meajỳmcwyr noore. Ẽhntaa jẽehcjiꞌ cwyꞌ to, wa to rymy ẽhmpoo jaahyh, Jõnxõoh te ẽhjmy awcaꞌteh jẽhrin ẽhntaa jiꞌ cỹm.

5
00:01:25,660 --> 00:01:31,220
Wa pjiꞌ cỹm ẽhjpa reereh ẽhjpi amcro, meacohnehꞌtehꞌ caxohw.

6
00:01:31,220 --> 00:01:42,200
Ne cohte mecmy hãjỹhr, ne cohte ẽhꞌprõtpi pjiꞌ cỹm harcu men, ne cohte to pji jahuc, ne cohte pji jahuc ẽhntaa to jõhm toꞌ coohquin.

7
00:01:42,200 --> 00:02:07,600
Ne cohte jõhm my: —Cỹh, hamoh cuꞌ ny tãnc japryꞌ to Sehrowee (max, me pajarcwaa cut: “cohte ẽhꞌcohjahic”) ẽhntaa wyr tẽ, ne cuꞌ cỹm amjõhcohc cohꞌhõ! Ne Sesohx te jõhm toproo my hãjỹhr, my hamoh jõhm tẽ, ne jõhm te amjõhcohc cohꞌhõn, ne ẽhꞌprõtpi jõhm rẽht pex, ne hamoh jõhm jatohj ne jõhm acpỹyhmy tẽ.

8
00:02:07,600 --> 00:02:22,060
Rõhm ẽhꞌprõtpi meꞌcwyꞌ te hõmpohn, ne meajpẽn my jõhm jãarẽ. Pom mecte jõhm pohpohn pex ne mecte jõhm toproo ny haꞌcree pex ẽhntaa ji me, meajpẽn my: —Tem crẽ taꞌhã me taꞌny hỳꞌwyr to ẽhꞌcrẽh?

9
00:02:22,060 --> 00:02:36,140
Ne meajpẽn my: —Hỹh, taꞌmy! Max, meꞌcwy ajpẽn my: —Hop, ajteeꞌmy! Ne meajpẽn prỹy pex, rõhm jõhm toproo ẽhntaa te mecmy: —Pom wa paꞌ wa!

10
00:02:36,140 --> 00:02:42,640
Rõhm me jõhm coohquehj, ne me jõhm my: —Ẽhmpoo te my aatoꞌ to jõhmy my aarẽht pex ẽhntaa?

11
00:02:42,640 --> 00:03:05,620
Rõhm jõhm te mecmy: —Nee ẽhmpoo te ẽhjtoꞌ to jõhmy noore, ne me jõhm to Sesohx ẽhntaa te harcuꞌ to pji jahuc, ne cohte to ẽhjtoꞌ coohquin, ne cohte ẽhjmy: “Cỹh, hamoh cuꞌ ny tãnc japryꞌ to Sehrowee ẽhntaa wyr tẽ ne cuꞌ to amjõhcohc cohꞌhõ.” Ne cohte ẽhjmy hãjỹhr, wa hamoh tẽ, ne ẽhjte to amjõhcohc cohꞌhõn, ne ẽhꞌprõtpi ẽhjrẽht pex!

12
00:03:05,620 --> 00:03:18,260
Ne jõhm te mecmy amjõhjãarẽn to hãjỹhr, rõhm me jõhm my: —Mrẽ Sesohx ẽhntaa? Rõhm jõhm te mecmy: —Quiꞌjẽhhop, taxmy hamoh tẽ!

13
00:03:18,260 --> 00:03:26,000
Ne jõhm toproo ẽhntaa te mecmy amjõhjãarẽn to hãjỹhr, rõhm hamoh me Farehzew cati jiꞌ wyr jõhm to mo.

14
00:03:26,000 --> 00:03:37,320
Rõhm pinny me hỳmcwyr noo jõꞌawcaꞌtehꞌ cỹm Sesohx te to pji jahuc ne cohte pji jahuc ẽhntaa to jõhm toproo ẽhntaa toꞌ coohquin my jõhm rẽht pex.

15
00:03:37,320 --> 00:03:52,020
Rõhm Farehzew cati ji xwyyreꞌ te jõhm rẽht ny jõhm coohcjir. Rõhm jõhm te mecmy: —Cohte harcuꞌ to pji jahuc ne cohte to ẽhjtoꞌ coohquin wa ẽhjte amjõhtoꞌ cohꞌhõn ne ẽhjrẽht pex.

16
00:03:52,020 --> 00:04:13,700
Rõhm Farehzew cati jiꞌ cwyꞌ te jõhm my: —Aapoh nee Sesohxpi Me Pajẽhpixxỳ jõꞌteecjij noore, xỳm ẽhꞌtyx me pajỳmcwyr noo jõꞌawcaꞌtehꞌ cỹm hỳmcwyr to ẽhjpa! Max, meꞌcwy mecmy: —Jõhꞌreh qui ca jõhm ẽhmpoo quin to hapux to ẽhjpaꞌ to ẽhmpoo jaahyhr catehꞌ to ẽhjpaꞌ to hãne? Ne meajpẽn prỹy pex.

17
00:04:13,700 --> 00:04:33,780
Ne mecte hẽhpiireh jõhm coohcjir, ne mecte jõhm my: —Cỹh, pom jõhm te aatoꞌ tỳt ca aarẽht pex ẽhntaa, jõhꞌny ca amjõhmy jõhm cãmjẽhx to? Ne mecte jõhm coohcjir to hãjỹhr, rõhm jõhm te mecmy: —Wa ẽhjtyx amjõhmy jõhmpi profet ny jõhm cãmjẽhx.

18
00:04:33,780 --> 00:04:53,440
Rõhm Zohdew cati ji jõopaꞌheeh ẽhntaa ji jỳyprỹy pex. Ne meamjõhmy nee jõhm ẽhntaa toproo noore, tỹmne. Ne me jõhm my: —Wa xyh me aajõnxõoh me, aajõnxii cỹm paꞌ myyny! Ne mecte me taꞌny hỳꞌwyr, rõhm amne meajhohreh tẽ.

19
00:04:53,440 --> 00:05:05,920
Rõhm me mecmy: —Pom ca mejmy meacra ẽhntoproo pym ny hãarẽ ẽhntaa, tem taꞌhã xa? Pom mrẽ ẽhntaaꞌcỹm ẽhjrẽht pexteh ẽhntaa?

20
00:05:05,920 --> 00:05:15,440
Ne mecte meꞌcoohcjir to hãjỹhr, rõhm mecte mecmy: —Ẽhncryhꞌcỹm mejcraꞌmy, ne ẽhncryhꞌcỹm ẽhꞌpym piimy ẽhntoproo.

21
00:05:15,440 --> 00:05:35,260
Max, taxmy ẽhmpoo te to jõhmy my ẽhjrẽht pexteh ẽhntaa ny wa me tee pji jaꞌcree quit. Pehja jõhm te ẽhꞌtỳt my ẽhjrẽht pexteh, wa me tee pji jaꞌcree quit. Haner me taꞌ coohquehj, xỳm ryꞌmy ẽhꞌcỳ ne ẽhjpẽr pex, qui ca amjõhꞌcut meamy amjõhjãarẽ.

22
00:05:35,260 --> 00:06:00,380
Ne jõhm jõnxõoh me hõnxii te mecmy amjõhny hỳyprỹy to hãjỹhr xỳm mecmy Zohdew cati ji jõopaꞌheeh ẽhntaa jiꞌ cohpa. Xỳm me hõopaꞌheeh ẽhntaa jiꞌ te ryꞌmy meꞌcohneh my: —Cỹh, ca ca meano Sesohxpi Me Pajẽhpixxỳꞌ te Crehx cohjahic xỳꞌny amjõhto hõhjaꞌcree ẽhntaa ny hãarẽ, wa ca me paate coohprõnxỳ ẽhntiitee meanoꞌ cohri!

23
00:06:00,380 --> 00:06:15,280
Ne mecte meꞌcohneh my hãjỹhr, rõhm me hõhpaatee jõhm jõnxõoh me hõnxii te mecmy amjõhny hỳyprỹy ne me mecmy: “Haner me taꞌ coohquehj, xỳm ryꞌmy ẽhꞌcỳ ne ẽhjpẽr pex” hãne.

24
00:06:15,280 --> 00:06:46,820
Rõhm Zohdew cati ji jõopaꞌheeh ẽhntaa jiꞌ te acpỹyhmy jõhm toproo ẽhntaa ny hỳꞌwyr, ẽhꞌcoohcjir xỳꞌny, my amne tẽ. Rõhm mecte jõhm my: —Cỹh, aajatox cỹm mejmy amjõhjãarẽ! Me Pajẽhpixxỳ ẽhnto myyreh aacryhꞌcỹm mejmy amjõhjãarẽ, ne nee mejmy aahix noo cỹm! Xỳm wa mejte ẽhjtyx jõhm to Sesohx ẽhntaa jaꞌcree pex, my ẽhmpoo quin to peht hapux to ẽhjpa! Ne mecte jõhm myn to hãjỹhr, rõhm jõhm te mecmy:

25
00:06:46,820 --> 00:07:01,380
—Quiꞌjẽhhop, aapoh nee ẽhjte meaquẽhntee ẽhꞌquin ny haꞌcree pex noore. Max, paꞌ wa quit ẽhjtoproo ny ẽhjcrẽh rõhm cohte ẽhjtoꞌ tỳt wa ẽhjrẽht pexteh—ẽhntaa wa ẽhjte haꞌcree pexteh!

26
00:07:01,380 --> 00:07:09,580
Rõhm mecte hẽhpiireh jõhm coohcjir ne me cohmy: —Jõhꞌnyymy cohte aatoꞌ to ca aarẽht pexteh ẽhntaa?

27
00:07:09,580 --> 00:07:23,380
Rõhm jõhm te mecmy: —Aapoh ryꞌmy ẽhjte meamy amjõhjãarẽn, ca nee meate ẽhjcỹm aajapac noore. Ẽhmpoo caxohw wa ca hẽhpiireh meamy amjõhjãarẽ ẽhntaa? Py hop, tem meamy me cohxỳ ẽhꞌcut amjõhjẽhpix prỹm?

28
00:07:23,380 --> 00:07:40,080
Ne jõhm te mecmy hãjỹhr, rõhm ẽhꞌprõtpi mencryhc! Ne me jõhm to xwy aapoh, ne mecte jõhm myn, ne me jõhm my: —Ca ca quit caꞌhã ẽhꞌcut amjõhjẽhpix to aapa, ne me pa, wa ca me Mozez cut peht amjõhjẽhpix to ẽhjpa!

29
00:07:40,080 --> 00:07:50,840
Xỳm ẽhncryhꞌcỹm Me Pajẽhpixxỳꞌ te Mozez to ẽhꞌhimpex to ẽhjpa, max, pom me jõhm to Sesohx ẽhntaa, wa nee mejte haꞌcree pex noore! Rõhm ẽhꞌprõtpi jõhm te mecmy:

30
00:07:50,840 --> 00:08:02,060
—Py! Tem crẽ nee meate haꞌcree pex noore?! Pom mrẽ cohte ẽhjtoꞌ tỳt my ẽhjrẽht pex reꞌcỹm nee meate Me Pajẽhpixxỳꞌ te to ẽhꞌhimpex to ẽhjpaꞌ ny haꞌcree pex noore?

31
00:08:02,060 --> 00:08:23,880
Capxyh qui Sesohx ẽhꞌquinre, qui ca nee Me Pajẽhpixxỳꞌ to ẽhꞌhimpex to ẽhjpaj noore. Xỳm nee Me Pajẽhpixxỳ meꞌquin cati jiꞌ cỹm hapac nooreꞌ ny me paate haꞌcree pex. Max, qui ca jõhm Me Pajẽhpixxỳꞌ cỹm ẽhꞌpahỳm pex to ẽhjpa, ne ca jõhm ẽhmpoo to hapux to ẽhjpaꞌ to hãneꞌ pom qui cohmy ẽhmpoo quẽhn ẽhntaa ji, qui ca ẽhꞌtyx jõhm cỹm pa.

32
00:08:23,880 --> 00:08:33,340
Nee ry tỹmne pji ẽhntaa cator piimy jõhm te Sesohx cohxỳ mejpehxxwyr piiꞌmy mejtoproo ẽhntaa jiꞌ noꞌ tỳt wa mejno rẽht pex noore my.

33
00:08:33,340 --> 00:08:41,580
Capxyh qui Me Pajẽhpixxỳ Sesohx to ẽhꞌhimpex to ẽhjpaj nooreꞌ nyymy, qui ca nee to ẽhmpoo jaahyhr catehꞌ to ẽhjpaj noore.

34
00:08:41,580 --> 00:08:58,260
Ne jõhm te mecmy hãjỹhr, rõhm mecte jõhm my: —Aapoh aaquin ny aapym caacru ca mejto aahimpex prỹm! Ca ca nee mejto aahimpex noore! Ne mecte jõhm to xwyꞌ to hãjỹhr, ne mecte ẽhꞌprõtpi mecte coohprõnxỳ ẽhntiitee jõhm cohri!

35
00:08:58,260 --> 00:09:10,500
Ne mecte coohprõnxỳ ẽhntiitee jõhm cohriꞌ ny Sesohx te jõhm jãarẽn par, ne mo, ne cohte jõhm ny hãm, ne jõhm my: —Tem ryꞌmy aate Meatõꞌ Cỳ ẽhntaa cut amjõhjẽhpix?

36
00:09:10,500 --> 00:09:19,720
Rõhm jõhm cohmy: —Hop, jõhm my mrẽ Mejtõꞌ Cỳ ẽhntaa? Cỹh, me ẽhjmy jõhm jãarẽ, wa jõhm cut amjõhjẽhpix!

37
00:09:19,720 --> 00:09:28,540
Rõhm Sesohx te jõhm my: —Ryꞌmy aate hõmpohn. Pom Aatõꞌ Cỳ ẽhntaa paꞌ wa aamy ẽhjcaacuc!

38
00:09:28,540 --> 00:09:41,460
Ne Sesohx te jõhm my hãjỹhr, rõhm jõhm te cohmy: —Cỹh, wa ca ẽhjtyx aacut amjõhjẽhpix, Paꞌheeh! Ne jõhm te ẽhꞌprõtpi Sesohx my ẽhmpex jãarẽn.

39
00:09:41,460 --> 00:09:57,760
Rõhm Sesohx te meꞌcohneh my: —Meate amjõhquin ny amjõhjaꞌcree pex xỳꞌny wa amne pji ẽhntaa wyr ẽhjcator. Car meatoproo, ne mearẽht pex. Nỹm ca mearẽht pex, ne meatoproo.

40
00:09:57,760 --> 00:10:07,660
Ne Sesohx te mecmy hãjỹhr, rõhm Farehzew cati jiꞌ cwy ẽhꞌcohꞌhi ne me cohmy: —Tem ca crẽ mejtoproo ny mejcãmjẽhx?

41
00:10:07,660 --> 00:10:23,380
Rõhm Sesohx te mecmy: —Capxyhꞌmy ca meatoprooꞌ nyymy, ne ca nee meaquin noore. Max, ca mearẽht pex ny amjõhjãarẽ, cwyrjapii ca ca meaquin ny aapaꞌ to aapa!