1
00:00:05,000 --> 00:00:40,320
—Max, ca ca nee meacohneh ẽhjcỹm aajapac noore. Xỳm wa ẽhjte amjõhmy meajẽhrin ẽhntaa ji, wa ẽhjte meajaꞌcree pex par, ca ca meano ẽhjpeehcãmtar cati ji my jaꞌcree. Max, qui ca ẽhmpoo ẽhjny amjõhto hõhtỳy to hãneꞌ pom qui mam mecte Me Pajẽhpixxỳ jarcwaa ny to ẽhꞌhuc. Pinny mecte to ẽhꞌhuc to: “Pom mejcwyꞌ no ẽhjcapeꞌny hỳypỳn to jỹh ẽhntaaꞌ my ẽhjcohri ne cohte ẽhjcỹm ẽhncryhc.” —Ne ẽhꞌhuc te hãjỹhr.

2
00:00:40,320 --> 00:00:56,940
Hõ, ne cormy ẽhmpoo te ẽhjny amjõhto hõhtỳy xwyjreh wa ẽhjte ẽhmpoo ny meamy amjõhjãarẽn, quir ẽhmpoo ẽhjny amjõhto hõhtỳy, ca me pjiꞌ pohpoh, ne me jaꞌcree pex, xỳm Me Pajẽhpixxỳꞌ te ẽhjcohjahic ẽhntaa paꞌ wa.

3
00:00:56,940 --> 00:01:17,520
Ne Sesohx te hẽhpiireh mecmy: —Wa ẽhjcryhꞌcỹm meamy awjãarẽ, ca ca meano jarcwaaꞌ cut mecmy jãarẽn to aapa, qui ca mohtreh me meanoꞌ ny amjõhcry, ne ca me paxwyyreꞌ ny amjõhcry. Ne ca me Jõnxõoh te ẽhjcohjahic ẽhntaa xwyyreꞌ ny amjõhcry.

4
00:01:17,520 --> 00:01:31,600
Ne Sesohx te mecmy hãjỹhr, ne ẽhꞌprõtpi amjõhcỹm pa, ne caprẽhre jỹh, ne cohte mecmy: —Wa ẽhjcryhꞌcỹm meamy, ca ca meano aatyx me paapeehcãmtar cati ji my jaꞌcree.

5
00:01:31,600 --> 00:01:42,780
Rõhm ẽhꞌprõtpi ẽhꞌcut mecte amjõhjẽhpix cati jiꞌ te ajpẽn cut hacop to ẽhꞌcrẽh, ne me tee amjõhjaꞌcree quit, ne nee mecte Zoht jaꞌcree pex noore.

6
00:01:42,780 --> 00:01:48,900
Rõhm Sesohx my ẽhꞌcut mecte amjõhjẽhpix cati jiꞌ no japii ẽhntaa Sesohx capeꞌny jỹh.

7
00:01:48,900 --> 00:01:57,320
Rõhm Sehmãw Pit te ẽhꞌprõtpi cohmy hõhꞌcraꞌ to hỳypir, ne cohte cỳjpi ẽhꞌcoohcjir, cohte cohmy jõhm jãarẽn xỳꞌny.

8
00:01:57,320 --> 00:02:06,000
Rõhm ẽhꞌprõtpi Sesohx wyr aapyhmy nor ne cohte cohmy: —Jõhm qui ca aato hãne, Paꞌheeh?

9
00:02:06,000 --> 00:02:26,140
Rõhm cohmy: —Cỹh, wa ca cuꞌ cacroꞌ to pãw cwy ẽhncoo ne ca jõhm ẽhntaa my cohhõ, ca ca jõhm jaꞌcree pex! Ne cohte cohmy hãjỹhr, ne cohte ẽhꞌprõtpi pãw japot ẽhntaa pyhr, ne cohte cuꞌ cacroꞌ to ẽhncoo, ne cohte Sehmãw cra Zoht Ẽhxcarehjot ẽhntaa my hõr.

10
00:02:26,140 --> 00:02:43,040
Rõhm Zoht te ẽhꞌprõtpi pãw pyhr ne cohte ẽhꞌcrẽe. Rõhm ẽhꞌprõtpi pinny Zoht my Satanax xỳr ne cohte to ẽhꞌhimpex cỹm ẽhncryhc! Rõhm Sesohx te Zoht my: —Pom aamy to ẽhmpoo jaahyhr prỹm ẽhntaa, rymy to hẽhpix!

11
00:02:43,040 --> 00:02:49,400
Ne Sesohx te Zoht my hãjỹhr, rõhm nee meꞌcrẽh ẽhntaa jiꞌ noꞌ te harcwaa ẽhntaa catỳt noore.

12
00:02:49,400 --> 00:03:14,640
Xỳm Zoht ẽhꞌtyx me hõꞌpooreꞌ ny paptooh to ẽhjpa, cwyrjapii my Sesohx te Zoht my hãjỹhr, my meꞌcwy amjõhmy: “Tanny Zoht te me paamy ẽhmpoo japruuu xỳꞌny Sesohx te cohmyn, amjõhquẽhn caxohw. Ow, pehja, Zoht te mecpi ammrẽereꞌ cati ji my ẽhꞌpooreꞌ no jõr xỳꞌny cohte cohmyn.” Ne mecte amjõhmy hãjỹhr.

13
00:03:14,640 --> 00:03:22,700
Rõhm Zoht te pãw crẽ, ne hãm, ne hamoh ẽhjcreepi cator ne hamoh tẽ. Pinny ryꞌmy awcapỳt.

14
00:03:22,700 --> 00:03:38,480
Hamoh Zoht tẽ, rõhm Sesohx te meꞌcwy my: —Cỹh, ẽhjpi Meatõꞌ Cỳ, ca ca me ẽhntaaꞌcym ẽhjpex ny jõmpoh ne me jaꞌcree pex. Ne ca me ẽhjpohroꞌ cut Me Pajẽhpixxỳ xwyyre ẽhmpex ny haꞌcree pex.

15
00:03:38,480 --> 00:03:51,360
Xỳm qui ca Me Pajẽhpixxỳ meamy ẽhjpex ny jaꞌcree, ca ca me jaꞌcree pex, xỳm ẽhjpextehꞌ te hãjỹhrꞌ pom qui ẽhmpex. Xỳm qui ca hỹhꞌne Me Pajẽhpixxỳ meamy jaꞌcree to hãne.

16
00:03:51,360 --> 00:04:15,460
—Cỹh, mejcji ji, wa ca meamy amjõhjãarẽ, ne meamy amjõhto ẽhjhimpex. Wa ca meacapeꞌny ẽhjpaꞌ pỹc, ne ca hamoh ryꞌmy ẽhjcohto. Wa meamy ẽhmpoo ẽhntaa jãarẽ, pom wa qui ẽhjte ryꞌmy Zohdew cati ji my jõhjãarẽn: “Wa ca ẽhjcohto, ca ca me japi, max, ca ca nee me ẽhjny aaxãm noore.”

17
00:04:15,460 --> 00:04:25,260
—Cỹh, wa ca meamy ẽhjhimpexxỳ ẽhntohw to ẽhjcaacuc: ca meajpẽn japii. Ca meajpẽn japii to hãneꞌ pom qui ẽhjmy meajapii.

18
00:04:25,260 --> 00:04:33,840
Ca ca meajpẽn japii to hãne, qui ca meꞌcohnehꞌteh meajaꞌcree pex, meate ẽhjcut amjõhjẽhpix to meapaꞌ ny.

19
00:04:33,840 --> 00:04:53,800
Ne Sesohx te me to ẽhꞌhimpex to hãjỹhr, rõhm Sehmãw Pit cohmy: —Paꞌheeh, jõhꞌcỹm ca hamoh aacohto? Rõhm Sesohx te cohmy: —Wa ca hamoh ẽhjcohto, ca ca nee ryꞌmy ẽhjcut aatẽm noore. Max, qui ca aꞌtõhmryyh, ca ca ẽhjcut tẽ.

20
00:04:53,800 --> 00:05:05,460
Rõhm Pit te cohmy: —Wa rymy aacut tẽ! Nee ẽhjmy jõhm cohpaj noore! Qui ca me aacut ẽhjcoohran prỹm ne me ẽhjcoohra, max, wa ca taꞌnyꞌhã aacut tẽ!

21
00:05:05,460 --> 00:05:36,660
Ne Pit te Sesohx prỹy pex to hãjỹhr, rõhm cohte cohmy: —Tem nee aamy jõhm cohpaj noore? Tem qui ca crẽ me ẽhjcut aacoohran prỹm, ca ca taꞌnyꞌhã tẽ? Hop, nee cohte taꞌny hãjỹhr noore. Wa ẽhjcryhꞌcỹm aamy aajãarẽ, ca ca ẽhntaaꞌcỳm xãꞌxãc cỳr xwyjrehꞌhã aate ẽhjpohnpohn pex nooreꞌ ny amjõhny aajỳyprỹy crii! Pe ne Sesohx te Pit my hãjỹhr.