3 Ga dzekna uneꞌ Dios:

“Ikë xni.”

Ga lëꞌ ukëla xniga.

4 Konde uwiy Dios zaꞌksa nak or xkë xni,

ga lëꞌ Dios uyuꞌnn uyu tib tiemb ukë xni lëꞌ stib tiemb nkëw una.

5 Loxna uyuslë Dios or xkë xni “dze”,

lëꞌ or nkëw uyuslë Dios “kwxin”.

Gunu uyak lëꞌ dze ganeꞌc̲h̲ udzel.

6 Ga dzekna uneꞌ Dios:

“Tsu tib guꞌn tsu lëw,

dzekna tsëtda nis guꞌn yu lad gia giab lo nis guꞌn yu lad gët.”

7 Ga dzekna lëꞌwu xkaꞌpa uyak,

uzaꞌ Dios tib guꞌn uyu lëw,

ic̲h̲ol nis uyaꞌn lad gia lëꞌ siyc̲h̲ol nis uyaꞌn lad gët.

8 Ga dzekna uyuslë Dios gunu guꞌn yu lëw “ibaꞌ”.

Gunu uyak lëꞌ mbidz uc̲h̲op udzel.

9 Gana uneꞌ Dios:

“Gaktipsa ic̲h̲ë nis guꞌn nax x̱an ibaꞌ,

dzekna xka gien diꞌt mbidz.”

Ga dzekna lëꞌwu xkaꞌpa uyak.

10 Ga dzekna diꞌt mbidz uyuslë Dios “lyu”,

lëꞌ diꞌt udopgiy nis tipsa uyuslë Dios “nisdoꞌ”.

Ga lëꞌ Dios uwiy zaꞌksa nak guꞌn uzaꞌ.

11 Ga dzekna uneꞌ Dios:

“Ilan ic̲h̲ë lo gix ngë lo gitslyu,

gana gix guꞌn xkë midz lo,

gana ilan yag guꞌn xkë nex lo,

nex guꞌn yu midz ldoꞌ.”

Ga dzekna lëꞌwu xkaꞌpa uyak.

12 Ga lëꞌ lo gitslyu uyuslo ulan gix ngë,

gana ndal lo gix guꞌn xkë midz lo,

gana ndal lo yag guꞌn xkë nex lo.

Ga lëꞌ Dios uwiy zaꞌksa nak guꞌn uzaꞌ.

13 Gunu uyak lëꞌ mbidz uyon udzel.

14-15 Ga dzekna uneꞌ Dios:

“Ibaꞌ sob guꞌn ikëꞌ xni,

dzekna xka gunu ikëꞌ xni lo gitslyu.

Gana xka x̱aꞌ gak dze gana x̱aꞌga gak kwxin,

gana gunu iluw ba or guslo x̱an gana iloꞌx tib dze,

gana x̱an gana iloꞌx tib is,

gana bok nak tiemb gia gana tiemb bidz.”

Ga lëꞌwu xkaꞌpa uyak.

16-17 Ga uzaꞌ Dios chop guꞌn nc̲h̲oꞌb sob ibaꞌ ikëꞌ xni lo gitslyu.

Uzaꞌ Dios mbidz,

guꞌn nc̲h̲oꞌbc̲h̲a,

guꞌn ikëꞌ xni or dze,

gana uzaꞌ Dios mëꞌ,

guꞌn win nup guꞌn ikëꞌ xni or giaꞌl.

Gana uzaꞌ Dios ic̲h̲ësa mel.

18 Ic̲h̲op gunu uzaꞌ Dios,

dzekna tibu ikëꞌ xni or dze gana stibu giaꞌl,

xka lëꞌ Dios uyuꞌnn uyu tib tiemb ukë xni lëꞌ stib tiemb nkëw una.

Ga lëꞌ Dios uwiy zaꞌksa nak guꞌn uzaꞌ.

19 Gunu uyak lëꞌ mbidz tap udzel.

20 Ga dzekna uneꞌ Dios:

“Tsuzë ndal man lo nis gana tsuzë ndal man xc̲h̲oꞌbnis lo me.”

21 Ga lëꞌ Dios uzaꞌ ic̲h̲ë man nisdoꞌ man nc̲h̲oꞌb,

gana uzaꞌ Dios ic̲h̲ësa lo man xiu lën nis gana uzaꞌ Dios ic̲h̲ësa lo man xc̲h̲oꞌbnis.

Ga lëꞌ Dios uwiy zaꞌksa nak guꞌn uzaꞌ.

22 Ga dzekna lëꞌ Dios uyuꞌnnlay ic̲h̲ë man knu c̲h̲ëp:

“Gatszë man yeꞌn gana idaꞌl ic̲h̲ë man ki,

dzekna idzë nisdoꞌ gana xkakga idaꞌl ic̲h̲ë man xc̲h̲oꞌbnis lo gitslyu.”

23 Gunu uyuꞌnn Dios lëꞌ mbidz gaꞌy udzel.

24 Ga dzekna uneꞌ Dios:

“Tsuzë ndal lo man lo gitslyu,

man zak ix̱eꞌn,

gana ic̲h̲ësa man së las lyu gana ic̲h̲ësa lo man dën.”

Ga dzekna lëꞌwu xkaꞌpa uyak.

25 Xka uzaꞌ Dios ic̲h̲ësa lo man zak ix̱eꞌn,

ic̲h̲ësa lo man së las lyu gana ic̲h̲ësa lo man yu dën.

Ga lëꞌ Dios uwiy zaꞌksa nak guꞌn uzaꞌ.

26 Ga dzekna c̲h̲ëp Dios:

“Ix̱ixkwaꞌna tib mnech x̱iꞌk nakna,

dzekna xka minn knu guꞌnnbéy lo ic̲h̲ë man,

lo man nisdoꞌ,

man xc̲h̲oꞌbnis,

man dën,

man zak ix̱eꞌn,

gana man së las lyu.”

27 Ga dzekna lëꞌ Dios uzaꞌ mnech x̱iꞌk nak Dios.

Uzaꞌ Dios mgiy gana unaꞌ.

28 Ga dzekna uyuꞌnnlay Dios minn knu c̲h̲ëp:

“Luꞌtá gap ndal minndoꞌ,

dzekna xka idzë lo gitslyu,

gana luꞌtá gak minn guꞌnnbéy lo gitslyu.

Luꞌtá guꞌnnbéy ic̲h̲ë lo man nisdoꞌ gana ic̲h̲ë lo man xc̲h̲oꞌbnis gana ic̲h̲ë lo man së las lyu.”

29 Gana c̲h̲ëp Dios:

“Gol kwiy,

inedzná ic̲h̲ësa lo gix xkë midz lo gana ic̲h̲ësa lo yag nex.

Gunu gak guꞌn gowdá.

30 Lëꞌ ic̲h̲ë man,

naku man dën,

man xc̲h̲oꞌbnis gana ic̲h̲ë man së las lyu,

gix nak guꞌn gow ic̲h̲ë man knu.”

Ga dzekna lëꞌwu xkaꞌpa uyak.

31 Ga lëꞌ Dios uwiy zaꞌksadoꞌ nak guꞌn uzaꞌ.

Gunu uyak lëꞌ mbidz xop udzel.