1
00:00:05,000 --> 00:00:10,500
Kateꞌ ne ẕda Jesusenꞌ to latje, bḻeꞌeleꞌ to benneꞌ goljeꞌ ḻo choḻe.

2
00:00:10,500 --> 00:00:20,860
Benneꞌ wsedle chieꞌ kaꞌ wnnábgekleꞌ Ḻeꞌ, naꞌ wnnágakeꞌ: —Benneꞌ Wsedle, ¿noẕ ben doḻaꞌ, danꞌ goljeꞌ ḻo choḻe? ¿Benneꞌ ni, chaꞌ x̱a x̱neꞌe?

3
00:00:20,860 --> 00:00:33,820
Bechebe Jesusenꞌ, naꞌ gožeꞌ ḻégakeꞌ: —Bi naken danꞌ ben benneꞌ ni doḻaꞌ, naꞌ kege danꞌ bengak x̱a x̱neꞌe doḻaꞌ, san naken nich ḻaꞌ ḻaw yeḻaꞌ wak ẕen che Dios niꞌa che benneꞌ ni.

4
00:00:33,820 --> 00:00:44,420
Žon byenen gonžo x̱chin X̱aꞌ, Bennenꞌ bseḻeꞌe nedaꞌ, kateꞌ ne nak ka te ža. Žin ža gak choḻ che yeḻaꞌ got, katenꞌ bi gak nitó benneꞌ goneꞌ žin.

5
00:00:44,420 --> 00:00:49,720
Kateꞌ ne zoaꞌ yežlyó nga, nakaꞌ baníꞌ chegak benách kaꞌ nnítaꞌgakeꞌ yežlyó nga.

6
00:00:49,720 --> 00:00:58,500
Kateꞌ beyóž bchaḻj Jesusenꞌ daꞌ ni, bžiꞌe ẕeneꞌ ḻo yo, naꞌ beneꞌ gónaꞌdoꞌ ḻen ẕeneꞌ naꞌ, naꞌ wdebenꞌ yej ḻaw benneꞌ ḻo choḻenꞌ.

7
00:00:58,500 --> 00:01:14,400
Naž gožeꞌ ḻeꞌ: —Wyéj, naꞌ bejtíb ḻawoꞌ ḻo bej nis daꞌ nzinꞌ Siloé. (Siloé naken to dižaꞌ hebreo daꞌ ẕnnan: nseḻaꞌ.) Naž benneꞌ ḻo choḻenꞌ wyejeꞌ ga naꞌ, naꞌ bejtibeꞌ ḻaweꞌ. Kateꞌ bezéꞌe ga naꞌ, ba ẕḻeꞌeleꞌ.

8
00:01:14,400 --> 00:01:26,820
Naž bebán ḻážeꞌgak benneꞌ ẕjoꞌo ḻiꞌa kaꞌ, ḻen benneꞌ kaꞌ bḻéꞌegekleꞌ ḻeꞌ zgaꞌale katenꞌ gokeꞌ ḻo choḻe, naꞌ wnnágakeꞌ: —¿Kege benneꞌ ni bennenꞌ wžiꞌe, naꞌ wnnableꞌ no benneꞌ bi daꞌ wneẕjweꞌ chieꞌ?

9
00:01:26,820 --> 00:01:36,680
Baḻeꞌ wnnágakeꞌ: —Ḻekzeꞌ. Yebaḻeꞌ wnnágakeꞌ: —Kegenꞌ, san kan ẕnnaꞌ ḻaw bennenꞌ, ḻezkaꞌ ẕnnaꞌ ḻaw benneꞌ ni. Ḻeꞌ wnnéꞌ: —Nedanꞌ.

10
00:01:36,680 --> 00:01:42,040
Naž wnnábgekleꞌ ḻeꞌ, naꞌ wnnágakeꞌ: —¿Nakx̱kze goken, byaljw yej ḻawoꞌ?

11
00:01:42,040 --> 00:01:58,060
Bechebe bennenꞌ, naꞌ gožeꞌ ḻégakeꞌ: —Bennenꞌ lieꞌ Jesús beneꞌ gónaꞌdoꞌ, naꞌ wdebenꞌ yej ḻawaꞌ, naꞌ gožeꞌ nedaꞌ: “Wyéj žoaꞌa bej nis daꞌ nzinꞌ Siloé, naꞌ bejtíb ḻawoꞌ.” Wyáꞌa ga naꞌ, naꞌ bejtibaꞌ ḻawaꞌ, naꞌ ḻaꞌ byáljwte yej ḻawaꞌ.

12
00:01:58,060 --> 00:02:05,160
Naž wnnábgekleꞌ ḻeꞌ, naꞌ wnnágakeꞌ: —¿Gaẕ zoa bennenꞌ? Ḻeꞌ gožeꞌ ḻégakeꞌ: —Bi nnezlaꞌ.

13
00:02:05,160 --> 00:02:11,600
Naž bchéꞌgakeꞌ bennenꞌ gokeꞌ ḻo choḻe, naꞌ bejzégakeꞌ ḻeꞌ ḻawgak benneꞌ yodoꞌ fariseo kaꞌ.

14
00:02:11,600 --> 00:02:17,980
Danꞌ nak ža laꞌy chégakeꞌ kateꞌ ben Jesusenꞌ gónaꞌdonꞌ, naꞌ bsaljweꞌ yej ḻaw bennenꞌ gokeꞌ ḻo choḻe,

15
00:02:17,980 --> 00:02:29,600
che ḻen benneꞌ yodoꞌ fariseo kaꞌ wnnábgekleꞌ ḻeꞌ daꞌ yoble nakx̱ goken byaljw yej ḻaweꞌ. Ḻeꞌ gožeꞌ ḻégakeꞌ: —Bdebeꞌ gónaꞌdoꞌ yej ḻawaꞌ, naꞌ bejtibanꞌ, naꞌ ẕḻeꞌelaꞌ.

16
00:02:29,600 --> 00:02:46,900
Naž bchaḻjgak baḻe benneꞌ yodoꞌ fariseo kaꞌ, naꞌ wnnágakeꞌ: —Bennenꞌ bi nakeꞌ che Dios, danꞌ bi žape chiꞌe ža laꞌy. Yebaḻeꞌ wnnágakeꞌ: —¿Wak to benneꞌ doḻaꞌ goneꞌ yeḻaꞌ wak kaꞌ kan zej nak daꞌ kaꞌ žon bennenꞌ? Kaꞌ goken, bžoj chóplegakeꞌ.

17
00:02:46,900 --> 00:02:57,440
Daꞌ yoble wnnábgekleꞌ bennenꞌ gokeꞌ ḻo choḻe, naꞌ wnnágakeꞌ: —¿Biẕ ẕnnoꞌ leꞌ che bennenꞌ, ẕnnoꞌ bsaljweꞌ yej ḻawoꞌ? Ḻeꞌ wnnéꞌ: —Nakeꞌ benneꞌ ẕchaḻjeꞌ ḻo wláz Dios.

18
00:02:57,440 --> 00:03:07,220
Benneꞌ judío wnná biaꞌ kaꞌ bi bejḻéꞌgakeꞌ chaꞌ gokeꞌ ḻo choḻe katenꞌ goljeꞌ, naꞌ byaljw yej ḻaweꞌ. Che ḻen bḻížgakeꞌ x̱a x̱naꞌ bennenꞌ byaljw yej ḻaweꞌ.

19
00:03:07,220 --> 00:03:15,180
Wnnábgekleꞌ ḻégakeꞌ, naꞌ wnnágakeꞌ: —¿Nak benneꞌ ni ẕiꞌnle, ẕnnale goljeꞌ ḻo choḻe? ¿Nakx̱kze naken ẕḻeꞌeleꞌ naꞌa?

20
00:03:15,180 --> 00:03:22,800
Bechébegak x̱a x̱neꞌe kaꞌ, naꞌ belyiꞌe ḻégakeꞌ: —Nnezltoꞌ benneꞌ ni nakeꞌ ẕiꞌntoꞌ, naꞌ goljeꞌ ḻo choḻe,

21
00:03:22,800 --> 00:03:35,100
san nakx̱ goken, ẕḻeꞌeleꞌ naꞌa, bi nnezltoꞌ, naꞌ noẕ bennenꞌ bsaljweꞌ yej ḻaweꞌ, bi nnezltoꞌ. Le nnableꞌ ḻeꞌ, danꞌ ba nakeꞌ benneꞌ wak. Ḻekzeꞌ nneꞌ.

22
00:03:35,100 --> 00:03:51,920
Ki wnnagak x̱a x̱naꞌ bennenꞌ gokeꞌ ḻo choḻe, danꞌ ẕžébegakeꞌ benneꞌ judío wnná biaꞌ kaꞌ, danꞌ ba ben x̱tížaꞌgakeꞌ chaꞌ nóteꞌteze benneꞌ nneꞌ nak Jesusenꞌ Benneꞌ Cristonꞌ, to chiꞌize kwéjgakeꞌ bennenꞌ ḻo yoꞌo gan ẕdobgak benneꞌ judío kaꞌ nich yéngekleꞌ x̱tižaꞌ Dios.

23
00:03:51,920 --> 00:03:56,720
Che ḻen wnnagak x̱a x̱neꞌe: “Le nnableꞌ ḻeꞌ, danꞌ ba nakeꞌ benneꞌ wak.”

24
00:03:56,720 --> 00:04:07,820
Naž benneꞌ judío wnná biaꞌ kaꞌ daꞌ yoble bḻížgakeꞌ bennenꞌ gokeꞌ ḻo choḻe, naꞌ belyiꞌe ḻeꞌ: —Niꞌa che X̱anžo Dios wnné daꞌ likze. Netoꞌ nnezltoꞌ nak bennenꞌ benneꞌ doḻaꞌ.

25
00:04:07,820 --> 00:04:17,460
Naž bechebe bennenꞌ gokeꞌ ḻo choḻe, naꞌ wnnéꞌ: —Chaꞌ nakeꞌ benneꞌ doḻaꞌ bi nnezlaꞌ. To daꞌ nnezlaꞌ. Zgaꞌale gokaꞌ ḻo choḻe, naꞌ naꞌa ẕḻeꞌelaꞌ.

26
00:04:17,460 --> 00:04:24,540
Wnnábgekleꞌ ḻeꞌ daꞌ yoble, naꞌ wnnágakeꞌ: —¿Biẕ beneꞌ chioꞌ? ¿Nakx̱ beneꞌ nich bsaljweꞌ yej ḻawoꞌ?

27
00:04:24,540 --> 00:04:36,200
Bechebe bennenꞌ, naꞌ gožeꞌ ḻégakeꞌ: —Ba gožkzaꞌ ḻeꞌe, san bi gónelele siꞌ ḻo naꞌle x̱tižaꞌa. ¿Biẕ chenꞌ žénelele yénlele daꞌ yoble? ¿Žénelele gónḻenle Ḻeꞌ tẕen?

28
00:04:36,200 --> 00:04:43,720
Naž bkáꞌngakeꞌ ḻeꞌ kaꞌze, naꞌ wnnágakeꞌ: —Leꞌ žónḻenoꞌ bennenꞌ tẕen, san netoꞌ žónḻentoꞌ Moisés tẕen.

29
00:04:43,720 --> 00:04:51,340
Netoꞌ nnezltoꞌ Dios bcháḻjḻeneꞌ Moisés naꞌ, san kan nak che benneꞌ ni, bi nnezltoꞌ noẕ benneꞌ bseḻeꞌe Ḻeꞌ.

30
00:04:51,340 --> 00:05:01,400
Naž bechebe bennenꞌ, naꞌ gožeꞌ ḻégakeꞌ: —Daꞌ ni žonen ga žebán ḻažaꞌa. Ḻeꞌe bi nnézlele noẕ benneꞌ bseḻeꞌe bennenꞌ, naꞌ Ḻeꞌ bsaljweꞌ yej ḻawaꞌ.

31
00:05:01,400 --> 00:05:09,600
Nnezlžo Dios bi ženleꞌ chegak benneꞌ doḻaꞌ kaꞌ, san ženleꞌ che no benneꞌ ẕkaꞌn ẕeneꞌ Ḻeꞌ, benneꞌ žoneꞌ ka žéneleꞌ Ḻeꞌ.

32
00:05:09,600 --> 00:05:15,980
Ža niꞌte naꞌ zejte naꞌa bi ženle chaꞌ no benneꞌ bsaljweꞌ yej ḻaw to benneꞌ goljeꞌ ḻo choḻe.

33
00:05:15,980 --> 00:05:19,380
Chelaꞌ bi nak bennenꞌ che Dios, bi be gak goneꞌ.

34
00:05:19,380 --> 00:05:29,720
Naž bežiꞌigak benneꞌ yodoꞌ kaꞌ, naꞌ belyiꞌe ḻeꞌ: —Kan goljoꞌ nak bianꞌ nbagoꞌo doḻaꞌ. ¿Žénekzloꞌ leꞌ wsedloꞌ netoꞌ? Naž bebéjgakeꞌ ḻeꞌ naꞌle.

35
00:05:29,720 --> 00:05:40,340
Benle Jesusenꞌ kan bengak benneꞌ judío wnná biaꞌ kaꞌ, bebéjgakeꞌ bennenꞌ gokeꞌ ḻo choḻe. Kateꞌ bežageꞌ ḻeꞌ, gožeꞌ ḻeꞌ: —¿Žejḻiꞌo che Ẕiꞌn Dios?

36
00:05:40,340 --> 00:05:44,460
Bechebeꞌ ḻeꞌ, naꞌ gožeꞌ Jesusenꞌ: —¿Noẕenꞌ, nich chejḻiꞌa chieꞌ?

37
00:05:44,460 --> 00:05:51,200
Jesusenꞌ gožeꞌ ḻeꞌ: —Ba bḻeꞌeloꞌ ḻeꞌ, naꞌ nedaꞌ nga ẕcháḻjḻenaꞌ leꞌ, nakaꞌ Ẕiꞌn Dios.

38
00:05:51,200 --> 00:05:58,240
Naž bennenꞌ byaljw yej ḻaweꞌ, bkaꞌn ẕeneꞌ Jesusenꞌ, naꞌ gožeꞌ Ḻeꞌ: —Yoaꞌa ḻo noꞌo, žejḻiꞌa chioꞌ Leꞌ.

39
00:05:58,240 --> 00:06:11,260
Jesusenꞌ wnnéꞌ: —Nich wchiꞌa ḻažaꞌa benách kaꞌ, bḻaꞌa yežlyó nga, nich ḻéꞌegekle benneꞌ kaꞌ zej nchóḻgekleꞌ, naꞌ gakgak ka benneꞌ ḻo choḻe benneꞌ kaꞌ žékgekleꞌ ẕḻéꞌegekleꞌ.

40
00:06:11,260 --> 00:06:20,540
Kateꞌ benneꞌ yodoꞌ fariseo kaꞌ, benneꞌ nnítaꞌgakeꞌ gan zoa Jesusenꞌ, béngekleꞌ daꞌ ni, naž belyiꞌe Ḻeꞌ: —¿Naktoꞌ benneꞌ nchóḻgekleꞌ?

41
00:06:20,540 --> 00:06:30,640
Bechebe Jesusenꞌ, naꞌ gožeꞌ ḻégakeꞌ: —Chelaꞌ nchoḻze yej ḻawle, bi nbágaꞌle doḻaꞌ. Naꞌa ẕnnale: “Ẕḻéꞌeltoꞌ.” Che ḻen nbágaꞌle doḻaꞌ.