Umin kè Mọdikai
10
Ogwu ubọọn̄ Ayaserọs onenisọp otitip mkpulu inyi ebi ido geelek îkikpulu ire lek ebi ìluk me lek achọ echi òkup me emen okwaan̄ ile. 2 Otutuuk inu îsabe unye kan̄ mè efuuk kan̄ irọ, mè mfufuk òfo me lek umin kè Mọdikai kubọk ogwu ubọọn̄ obenebe ọmọ me irek, mîge me emen ikpa mfufuk usen me usen eyi ebi ubọọn̄ Midia me Pesia. 3 Me atikọ, Mọdikai ogwu Ju ore òso ene iba igọọk me udun̄ ogwu ubọọn̄ Ayaserọs me lek kan̄, me otutuuk ama ubọọn̄ kè Ayaserọs. Mọdikai îmin ene me etete ebi Ju, owuwa ebi Ju ebi kiban̄ ebebene ọmọ ifo inyọn̄, mije, ọmọ ìkisi ikwaan̄ iweek nnwọn inyi ebi kiban̄, mè ikitumu ikọ me ibot otutuuk ebi Ju.3a [Mọdikai onenibe, “Îre Awaji orọ inu chi geelek. 3b Mije, nnikeek ilaak mmun̄be ofolek inu chi, kpunu geege eyi ikarọge ìso. 3c Mmun̄ sọntiik gwun̄ ibot mun̄ òkakana okwaan̄, mè utoon̄ òtotoon̄, mè ura, mè ògbugbuk mun̄. Esita, ogwu ogwu ubọọn̄ odobe, ònikana nwa ogwu ubọọn̄, ọmọ ore okwaan̄ ya. 3d Anam ukpook iba cha ìre Aman melek n̄a. 3e Ido cha ore ebi ìgbagbaan̄ lek itọbọ ibekpan̄ ebi Ju isan̄a. 3f Ido kiji ya, ore ido Ijeren, ebi ìtataan̄ ukpo igwen Awaji, Awaji onyanyan̄a ema. Ogwukaan̄-ene înyan̄a ebi kan̄. Ogwukaan̄-ene înyan̄a eji isibi me emen ijo inu chi geelek. Awaji îrọ inu ijejeen̄ mè ikpele uyeke inu eyi ìkararak ìrọ me etete ofifi ido geege.
3g Nriroon̄ iba ke Awaji oroon̄, ge eyi ebi kan̄, ge eyi ebi ofifi ido. 3i Awaji onenisun̄ ike mgbọ mè mbubak mgbọ mè usen eyi ìboroon̄ nriroon̄ iba cha, òrere usen oyerebet Awaji osun̄be inyi otutuuk ido geelek. 3j Awaji okekeek ebi kan̄, mè ifieek oyerebet inwọn ìrot kan̄.
3k “Eya orọ, ema mêsun̄ usen cha, òrere akọp mè usen ini mè akọp mè usen go me onyan̄ Adari, mè isa irọ usen ebekititiin̄ me isi Awaji, mè ikinwọọn̄ unwọọn̄, mè ikibele ejit, me ukot me ukot, isi ire mgbọ geelek, me etete ebi eyi kan̄.”
Ikọ òkup inyi ebi ìkakana ikpa yi itap me usem Giris
3l Me òso acha ini me ukot mkpulu kè Tolemi mè Kilopatira, ke Dositeyọs, ogwu òbe ọmọ ìre ogwu ngwugwa mè ogwu otoko kè Libai, mè Tolemi ogwu gwun̄ esa ikpa yi, eyi ogwu ubọọn̄ ogebe ofolek ijọk Purim inu. Ema ebe ke ìre achubọk ikpa ya ire eya, ke ìre Lisimakọs gwun̄ kè Tolemi òkiluk me Jeruselem okana ikpa yi itap me usem kiban̄.]