Mosis, ogwu ikwaan̄ Awaji oge ikpa yi isasa inyi mfufuk ubọk Awaji osabe irom inu geelek, mè ulọk îkaan̄be igogobo ebi ife ge isibi me etete otutuuk ebilene isun̄ esese, inyi eneketọbọ ebum enyi ọmọ.

Ikpa keyi ojeen̄ ubọk inyọn̄ mè ijọn̄ osabe ibene, mè ijeen̄ si ubọk ebilene mè otutuuk ido geelek me linyọn̄ esabe ibene. Îjeen̄ si ubọk ijo inu osabe ibene, mè initap wọlọwọlọ me lek ebilene me otutuuk linyọn̄.

Îjeen̄ si ubọk Okumugwem osabe igobo ene ge, òrere Ebereyam, isibi me emen wọlọwọlọ linyọn̄, mè inisa me lek ene ge ya isan̄a ido ebi Ju isibi inyi lek kan̄. Okumugwem ìtumu ibe ke otutuuk ebi geelek me linyọn̄ ebekaan̄ ugbana inan̄a me lek kè Ebereyam. Sa me lek kè Josefu gwun̄ kè Jekọp, otutuuk ebi Ijeren enenisi iluk me ido Ijipiti mije akan̄, mè ikana usun̄ inyi ebi Ijipiti.