Mosis ìge ikpa keyi isasa ijeen̄ ike ebi Ijeren enan̄abe isibi me usun̄ me Ijipiti, mè inikana ido. Ebi Ijeren ekup me Ijipiti efit acha ini mè akọp ita, sabum enan̄abe isibi. Mgbọ ebi Ijeren esibe Ijipiti, ema ìre akọp ene jaaba gaalek. Ire, mgbọ ema enan̄abe isibi, ema mîwa iraka efie ene iba.

Ikpa keyi okpa ubọk Okumugwem osabe isan̄a ebi Ijeren isibi me irak usun̄ me Ijipiti sa me ubọk kè Mosis. Îkpa si ubọk Okumugwem onyibe ebi Ijeren Ikan eyi òbokikpulu ema, mè isan̄a ema me etete otutuuk ebi ido geelek me linyọn̄ isun̄ esese, kubọk ebi eyi Okumugwem. Okumugwem ìnyi ema Ikan ya me inyọn̄ ogoon̄ Saina sa me ubọk kè Mosis. Îkpa si inu ofolek inanama ere ebi Ijeren ebekitọbọ ebum inyi Awaji, mè inu ebetap me ere ya, mè ikan òbokikpulu ebi ngwugwa, melek ubọk ebekitọbọ ebum inyi Awaji.