Ebereyam mè Abimelek
20
Ebereyam oneninan̄a me Mamire ije ifo èwê agan̄ osiki isi iluk me etete Kades mè Suru. Îgọọk iluk si sọnja mgbọ me Gera. 2 Me Gera, Ebereyam okekitumu inyi ebi ene ibe ke Sera ogwu nwa ìre ngwan̄ kan̄. Eya orọ, Abimelek ogwu ubọọn̄ ama ya oraria ebi ikwaan̄ kan̄ inu, mè inimọnọ Sera inyi lek kan̄ me lek nwa.3 Ire, me eririeen̄ usen ge, Awaji onenitumu inyi Abimelek me emen ilaak ibe, “Owu mônikwu, mije, owu obọkọ nwa ene. Kpọ, ogwu enenwaan̄ ya îkaan̄ olom.”
4 Otutuuk mgbọ ya, Abimelek ìkagọọk-nu Sera ìlaak. Eya orọ, Abimelek ododo Okumugwem ibe, “Okaan̄-ene, ìre owu môfat ichep ido ikarọge ijo inu geege ni? 5 Ìre ìkare Ebereyam gaalek osa otu kan̄ itumu inyi emi ibe ke Sera ìre ngwan̄ kan̄. Sera me lek kan̄ si îtumu ibe ke Ebereyam ìre ngwan̄ kan̄. Eya orọ, ejit n̄a ìkafieek emi ikọ kubọk ge. Ubọk n̄a si ìtatana. Ǹkarọ ijo inu geege.”
6 Awaji onenifọọk Abimelek me emen ilaak ya ibe, “Iin̄, emi si nriọọn̄ ibe ke ubọk kwun̄ îtana me lek inu yi. Îre eya orọ mgbanbe owu, inyi owu okachak ubọk me lek ogwu enenwaan̄ ya, mè ìsa me ikeya ìrọ emi ìlọ. 7 Ire, mgbọ keyi, yaka ogwu enenwaan̄ ya sa jet ogwu olom, mije, ogwu olom ìre ogwu nriran. Môriaak uriaak inyi owu, inyi owu okakwu. Ire, ire òkayaka ogwu enenwaan̄ ya ìjet ogwu olom, riọọn̄ ibe ke owu melek ebi kwun̄ kpelọlọ ikwakwaan̄ ìsan̄a.”
8 Egwe iwewele, Abimelek oraria ikwaan̄ igwen otutuuk ebi ibot ikwaan̄ kan̄ ititiin̄, mè iben otutuuk inu cha ikpa inyi ema. Ukpook otetet otutuuk kiban̄ enenen. 9 Abimelek oneniria ikwaan̄ igwen Ebereyam mè ido ibe, “Ìre keke ke owu orọ eji ikeyi? Sà ìre keke ke emi nrọ owu ilọ, eyi owu orọbe inyi ikpele awọ keyi initoon̄ emi melek otutuuk mkpulu n̄a me ibot? Owu orọ emi inu ikagbege ibe erọ ene.” 10 Inenido Ebereyam ibe, “Tumu-nu inu òrọrọ inyi owu òrọ emi inu òkup ikeyi.”
11 Ebereyam ofọfọọk ibe, “Emi ǹkikeek ibe ke kpunu ebi ìkitet ukpook Awaji me ere keyi. Eya orọ, ke ebi ama yi mêkpan̄ emi mije nwa n̄a. 12 Ofifi si, me atikọ, Sera ìre gwun̄ nte n̄a. Ire, eji kpere uga ge. Eji ebat olom uwu uwu. 13 Îre mgbọ Awaji ogwenbe emi ibe emi ǹnan̄a ǹsibi ǹtele uwu nte n̄a, mè ǹkenjijen̄e ǹkana, ke ntumu inyi Sera ibe itap ubọk inyi emi, mè ikitumu inyi ebi ene, me ere geelek eji mêsibe, ibe ke emi ìre ngwan̄ kan̄, inyi ekakpan̄ emi.”
14 Abimelek oneniyaka Sera inyi Ebereyam ogwu olom, mè ikpulu owuwa arọọn̄, mè eriembuuk, mè ebi usun̄ ebirieen̄ mè ebibaan̄ igbaalek inyi Ebereyam, 15 mè initumu inyi Ebereyam ibe, “Kpọ, otutuuk ijọn̄ ido n̄a ire eya, ere geelek òneme owu iluluk, luk.”
16 Abimelek onenitumu inyi Sera ibe, “Mgbọ keyi, nra ikpe obop ikpoko alata okuket inyi ngwan̄ kwun̄ enerieen̄, isasa ijeen̄ otutuuk ebi melek kinyi ibe ke ubọk kwun̄ îtana, ke owu òkafiat lek kwun̄.”