2 Awaji otutumu inyi ibe, “Mọnọ Ajiki, ibot gwun̄ ge kwun̄, ogwu omun̄be me chieen̄, mè sa je si inyọn̄ ijọn̄ agan̄ Moraya me inyọn̄ ogoon̄ ge mâjeen̄be owu, mè sa gwun̄ ya gwa ngwugwa ewọwọp iriọk me ere ya nyi emi.”

3 Ofit iwele kan̄, me okpa otu ewelegwe, Ebereyam obọbọp inu me inyọn̄ inyinya akpan kan̄, mè ikep iye ìbosa isọk ukan̄ igwa ngwugwa ya, mè inisa Ajiki ogwu gwun̄ mè ebi usun̄ iba igbaalek inan̄a ije isi ere ya Awaji otemebe ọmọ. 4 Me òso usen ita, Ebereyam obebene chieen̄ imun̄ ere ya me ujọn̄ọ ere. 5 Inenitumu inyi ebi usun̄ kan̄ ibe, “Ìkup me ere keyi melek inyinya akpan ìban emi, ke emi melek Ajiki mêje isi ere keyilọ isi itọbọ ebum inyi Awaji, mè iyaka igwu ikom ika inu.”

6 Ebereyam onenibene efit iye ngwugwa ya itoon̄ Ajiki ogwu gwun̄, mè imọnọ ukan̄ mè ubuja ngwugwa ikaan̄ me ubọk. Ema ene iba egbagbaan̄ ije inin̄ oniin̄. 7 Mgbọ ema ekije, Ajiki onenigwen Ebereyam, “Nte n̄a!”

Ogwu ute ochechieek.

Ajiki onenido ọmọ ibe, “Ukan̄ ire eyi, iye ire eyi. Sà arọọn̄ ebesa igwa ngwugwa ye?”

8 Ebereyam ofọfọọk ibe, “Gwun̄ n̄a, Awaji me lek kan̄ môsan̄a arọọn̄ ebesa igwa ngwugwa isibi.” Ema ekekije inyi isi.

9 Mgbọ ema erebe ere Awaji otemebe Ebereyam, Ebereyam oneninama ntook, mè ikpulu iye cha ititiin̄ me inyọn̄ ntook ya, mè initet Ajiki ogwu gwun̄ ibọp, mè iben imaan̄ me inyọn̄ iye òkup me inyọn̄ ntook ya, 10 mè inyana ubọk iwọọk ubuja ngwugwa isibi ibosa igwu ogwu gwun̄.

11 Mgbọ yaage, ogwu osat Okumugwem okukup me emen inyọn̄ ibọn̄ọ ọmọ, “Ebereyam! Ebereyam!”

Ebereyam ochechieek.

12 Itutumu inyi Ebereyam ibe, “Tet kaan̄! Kasak gwun̄ ya unan geege me lek. Mgbọ keyi ke nriọọn̄ ibe ke owu ìre ogwu òkaan̄ ukpook Awaji me emen, mije, owu òkajit inyinyi emi ibot gwun̄ ge gaalek okaan̄be.”

13 Ebereyam onenibene chieen̄, mè imun̄ orie arọọn̄ ge iko kan̄ onwaan̄be inye me emen ekpuk oron ge me ere ya, mè ije isi itet arọọn̄ ya isa inigwa ngwugwa ewọwọp iriọk ya, me useen̄ kè Ajiki ogwu gwun̄. 14 Ebereyam ogwegwen ere ya “Okumugwem môsan̄a isibi.” Eya orọ ebi ene ekitumu inire chereyi ibe, “Me inyọn̄ ogoon̄ Okumugwem, Okumugwem môsan̄a inu geelek ònanan isibi.”

15 Ogwu osat Okumugwem okpọkpọk ikup me emen inyọn̄ igwen Ebereyam òso mgbọ iba, 16 mè itumu inyi ibe ke Okumugwem ìtumu ibe ikeyi, “Emi nsa me erieen̄ n̄a inyan̄a ibot ibe, mije inu yi owu orọbe, eyi owu òkajit inyinyi emi ibot gwun̄ ge gaalek okaan̄be, 17 me atikọ, emi m̀kpalọlọ igbagbana owu, mè irọ inyi owot iman kwun̄ imumana kubọk ntoronyan̄ òkup me akpa isinyọn̄, mè iwa si kubọk okpoon̄ òkup me agba awaji. Bọn owot iman kwun̄ mêkitim ikpan̄ ebi ochicha kiban̄. 18 Nan̄a me lek bọn owot iman kwun̄ ke otutuuk ido geelek me linyọn̄ ebekaan̄ ugbana, mije owu ogban̄be ida n̄a.”

19 Ebereyam onenigwu ikom ika igọọk ebi usun̄ kan̄. Ema otutuuk enenika inu Bieseba. Ebereyam oluluk me Bieseba.

20 Ike mgbọ okije, Ebereyam oneninọ ibe ke Milika nwa kè Nayọ ngwan̄ kan̄ îman owuwa bọn ebirieen̄. 21 Usu ore adasi gwun̄ enerieen̄ kiban̄. Buju ore òso iba. Kemuwen, ogwu òre nte kè Aram, ore òso ita, 22 sabum Kesedi, mè Ajo, me Pilidas, mè Jidilafu, mè Betuwen. 23 Betuwen ore nte kè Ribeka. Milika oman ebirieen̄ jeeta chi inyi Nayọ ngwan̄ kè Ebereyam. 24 Ogwu ugan kè Nayọ, ekigwen Rewuma, oneniman si Teba, mè Gayam, mè Tayas, mè Maaka.