Mîtap ukput me lek ikwaan̄ ikpọkpọk inama Uwu Mbuban
4
Ebi ochicha ebi Juda mè ebi Benjamin eneninọ ibe ke ebi ìnan̄a me usun̄ akọn̄ ika mêkinama Uwu Mbuban inyi Okumugwem, Awaji ebi Ijeren, 2 mè inije inu me lek kè Jerubaben mè otutuuk ebi ibot owot iman cha, mè inibe ema, “Eji mêgọọk enyi igbaan̄ inama uwu yi, mije, Awaji yaage si ke eji ekitọbọ ebum inyi, kubọk enyi ekirọ. Ọmọ si ke eji ekigwa ngwugwa inyi karake ukot kè Esaradọn ogwu ubọọn̄ Asiria, ogwu òsa eji inigwook me ere yi.”3 Jerubaben mè Jesuwa mè ebi ibot owot iman Ijeren kechilọ cha efọfọọk ema ibe, “Ìkare enyi ebenama Uwu Mbuban inyi Awaji kiji, îre eji ebenama. Îre eji gaalek ebenama Uwu Mbuban inyi Okumugwem, Awaji ebi Ijeren, ike Sarọs ogwu ubọọn̄ Pesia onyibe eji ida.”
4 Ebi ife cha ìluluk ikana me inyọn̄ ijọn̄ ya enenibene ikitap ebi Juda uwọ-lek me emen, mè ikitap ema ukpook me lek, inyi ema ekayaka ìkọt ìnama uwu ya ìnyi isi. 5 Ebi ife cha ekpekpe ebi ene ibe enewuwọlọ otitọt geelek ebi Juda mè Benjamin ekaan̄be, inyi ekayaka ìkọt ìrọ ikwaan̄ ya. Ikeyi ke erọ me otutuuk ukot mkpulu kè Sarọs ogwu ubọọn̄ Pesia, mè ukot mkpulu kè Dariọs ogwu ubọọn̄ Pesia.
Ukput etapbe me ukot kè Jakisis mè Atejakisis
6 Me mgbọ ogwu ubọọn̄ Jakisis (òrere si Ayaserọs) obenebe ikikpulu ido Pesia, ebi ochicha chi enenige ikpa iria ijet Jakisis ikeme ebi usun̄ akọn̄ cha ìluk me Juda mè Jeruselem.
7 Me ukot kè Atejakisis ogwu ubọọn̄ Pesia si, Bisilam, mè Miteredat, mè Tabeli, mè usini ebi melek kiban̄ enenigbaan̄ ige chieen̄ ikpa yaage ijet Atejakisis. Ema ege ikpa ya me usem Aram, mè ikana si itap me ofifi usem.
8 Reyum ogwu ibot mkpulu, mè Simisayi ogwu uti ikpa mîge si ikpa ikeme Jeruselem, mè isa iria ijet Atejakisis ogwu ubọọn̄ Pesia. Inu egebe me ikpa ya ìre ikeyi:
9 Ikpa yi ìnan̄a me ubọk kè Reyum ogwu ibot mkpulu mè Simisayi ogwu uti ikpa mè ebi melek kiban̄ kechilọ, òrere ebi ibot oyerebet, mè ebi ibot mkpulu ìnan̄a me Tiripọlis, mè Pesia, mè ebi ibot mkpulu, mè ebi ibot ikwaan̄, mè ebi oyerebet ebi ìnan̄a me Erek, mè Babilọn, mè ebi Elam ìnan̄a me Susa, 10 mè otutuuk ebi geelek ebi Asubanipan ogwu ubọọn̄ Asiria, ogwu òtaan̄ etip mè ikaan̄ umin, okpulube isa inigwook me ama Sameria mè ofifi ere me agan̄ usaba okwaan̄ Yuferetis.
11 Ikpa ema eriabe ìre ikeyi:
“Eji ebi usun̄ kwun̄ ebi ìluk me usaba okwaan̄ Yuferetis ege ikpa yi ijet owu, ogwu ubọọn̄ Atejakisis:
12 “Eji ekiweek irọrọ inyi owu ogwu ubọọn̄ òriọọn̄ ibe ke ebi Ju, ebi ìnan̄a me ubọk kwun̄ inu me lek kiji me ere keyi mîsi Jeruselem, mè ikikpọk inama ijo ama unye-ibot ya. Ema ba mêkikpọk inama mgban ama ya, mè ikikpọk itọbọ ọdọ ama ya.
13 “Ofifi kan̄, eji ekiweek irọrọ inyi owu ogwu ubọọn̄ òriọọn̄ ibe, ire ife chi inama ama yi isan̄a, mè ikpọk inama otutuuk mgban ama ibene ikeke, ke kpebeyaka ikikpe otitip ido, kpebeyaka ikikpe otitip mkpulu, mè ikpoko ikwaan̄ geelek ebe ema ekpe. Sa me ikeya, ikpoko òkinu inyi ogwu ubọọn̄ ìkpoyaka ire lek inu geege. 14 Mgbọ yi, mije eji ekupbe me irak ubọk kwun̄, ìkanwọn ibe eji esa chieen̄ emun̄ ebi ene ekijit inyinyi owu ogwu ubọọn̄ umin ògbegbe, mè eriaan̄ ere. Eya orọ eji ekige ikpa keyi ijet owu ogwu ubọọn̄, inyi owu òriọọn̄ inu chi òkimọnọ irek, 15 inyi owu òwọlọ emen ikpa ebi ìdadasi ikpulu me isi kwun̄ òkpọ. Ire owọlọ emen ikpa cha, owu mômun̄ ibe ke ama yi ìre ama ebi òkpaka, ebi ìkito ufialek inyi ebi ubọọn̄ geelek, mè agan̄ mkpulu geelek ema ekupbe. Karake ukot ikaan̄, eriọọn̄ ama ya kubọk ama mkpaka-ibot, ọmọ orọ ejijakabe ama ya igwook. 16 Eji ekirọ inyi owu ogwu ubọọn̄ òriọọn̄ ibe, ire ife chi inama ama yi, mè inama si mgban kan̄, ke owu òkpoyaka ikaan̄ otu geege me usaba okwaan̄ Yuferetis.”
17 Ogwu ubọọn̄ onenifọọk ibe:
“Ǹge ikpa yi ijet Reyum ogwu ibot mkpulu, mè Simisayi ogwu uti ikpa melek ebi melek kiban̄ ìluk me Sameria mè ofifi ere geelek me usaba okwaan̄ Yuferetis:
“Nnyi enyi amọn.
18 “Ikpa etip enyi eriabe ijet emi, mîfuk, mè ikana inyi emi. 19 Nneninyi ida ibe esi eweek inu ofolek ife chi. Mîweek imun̄ ibe ke ama ya îkikpaka ibot inyi ebi ubọọn̄ bene me akarake akat, mè ire si ebi unye-ibot mè ebi ìkitap ufialek me ido. 20 Jeruselem îwuuk lek ikikaan̄ unye unye ebi ubọọn̄ ebi ìkikpulu ama kiban̄ mege isi igwook me usaba okwaan̄ Yuferetis, otutuuk ebi ere cha ekekikpe otitip ido, mè otitip mkpulu, mè ikpoko ikwaan̄, inyi ema. 21 Eya orọ, ìge ikpa ìjet ife cha ibe etele ikwaan̄ ya. Ekayaka ìkpọk ìnama ama ya, itata ǹnyinyi ida ibe enama. 22 Ìmun̄ ibe ke enyi kpetele ubọk me lek inu yi. Ikatele ibe nriki yi ije inyi isi, inyi ufialek ikanin̄ me emen mkpulu.”
23 Mgbọ yaage ikpa etip ya ònan̄a me ubọk ogwu ubọọn̄ Atejakisis orebe ubọk kè Reyum ogwu ibot mkpulu mè Simisayi ogwu uti ikpa mè ebi melek kiban̄, ema egwagwat lek ije isi lek ebi Ju me Jeruselem, mè isa me unye irọ inyi ema etele ikwaan̄ ya.
24 Ikeyi ke ikwaan̄ Uwu Awaji me Jeruselem osa ikeke, mè ibia ikeya mege ire òso acha iba me lek mkpulu kè Dariọs ogwu ubọọn̄ Pesia.