Nriran ebenbe ikeme Taya
26
Me adasi usen me onyan̄, me òso akọp mè acha ge me lek usun̄ akọn̄ ebi Ijeren, Okumugwem onenitumu inyi emi ibe: 2 “Gwun̄ ebilene, ebi ama Taya ekibele ejit ibe Jeruselem înan̄a irọn̄, mè ikitumu ibe, ‘Chei, Jeruselem, òrere otunchit ebi mbit ido geelek, îgbugbọ igwook, isotu mbit kan̄ îra ichili ibook inyi eji. Ama kiji oboyaka inikinin̄ ijot. Jeruselem îgwak ita.’ 3 Eya orọ, Ogwukaan̄-ene Okumugwem ìtumu ibe ikeyi: Jei Taya, emi melek kwun̄ kpetat. Mâsa owuwa ido inu, inyi enefan̄a echit owu kubọk ekoon̄ okinan̄a me okwaan̄ inifaan̄ igwook me ijọn̄. 4 Ema mêjijaka mgban Taya, mè igbugbọ uwu-oket kan̄. Emi mâchan achiaan̄ isan̄a me lek kan̄, inyi ikana ewuuk ukpọk lek. 5 Ama Taya môkana ere iwele njin me eden̄ okwaan̄, mije, nra itumu isan̄a. Emi Ogwukaan̄-ene Okumugwem ntumu. Ọmọ môkana ere ebi ido geelek ebekinu mfum. 6 Oge akọn̄ môjijaka asabọn ama kan̄ geelek òkup me inyọn̄ ijọn̄. Ema mêneniriọọn̄ ibe ke emi nre Okumugwem.7 “Mije, Ogwukaan̄-ene Okumugwem ìtumu ibe ikeyi: Mânisa Nebukadineja, ogwu ubọọn̄ Babilọn, ubọọn̄ ògak ubọọn̄, inan̄a me agan̄ inyọn̄ inu me lek ama Taya. Ìboje melek inyinya mè uji akọn̄, mè ebi akọn̄ inyọn̄ inyinya melek urum ebi akọn̄ òwawa inu. 8 Môsa oge akọn̄ ijijaka ama kinyi cha geelek òkup me lek ijọn̄. Môkpa mbin akọn̄ ikwek owu, mè inama obubot itoon̄ me lek mgban kwun̄, mè ibene agbọ kan̄ ikaan̄ ikinu owu lek. 9 Môben nroon̄ akọn̄ ekisa igwak mgban itoon̄ me lek mgban kwun̄, mè isa otuban akọn̄ kan̄ igbugbọ uwu-oket kwun̄ cha igwook. 10 Inyinya kan̄ môwa enenen, ire lek mfuun̄ òkibumu igọọk ema môchitbe owu bùk. Mgbọ ọmọ mônin̄be otunchit kwun̄ kubọk ebi ene ekigbuku inin̄ ama ebumbe mgban itibi, okput inyinya kan̄, mè okput uji ekpirikpo kan̄ mè uji akọn̄ kan̄ môsisik mgban kwun̄. 11 Môsa ukot inyinya kan̄ cha ikijak ikana lek oniin̄ kwun̄, mè isa oge akọn̄ ikpan̄ ebi kwun̄, mè ida atà kwun̄ cha ònyenye iyaka imaan̄ me ijọn̄. 12 Ema mêfum inu ubọọn̄ kwun̄, mè ichichim inu mbit kwun̄. Ema mêkpukpuku mgban kwun̄ igwook, mè igbugbọ ujuja uwu kwun̄ cha, mè itọọn̄ ewuuk lek uwu cha mè uti melek achiaan̄ ifiin̄ igwook me okwaan̄. 13 Mârọ ibe okput okwa cha òkitaan̄ me emen kwun̄ ita, kpebeyaka ikinọ si ida uneen̄ me emen kwun̄. 14 Mârọ inyi owu òkana ewuuk ukpọk lek; owu môkana ere iwele njin. Kpebeyaka ikpọk inama owu ofifi, mije, emi Okumugwem nra itumu isan̄a. Emi Ogwukaan̄-ene Okumugwem ntumu.
15 “Ogwukaan̄-ene Okumugwem ìtumu inyi Taya ibe ikeyi: Mgbọ ebi agba awaji mênọbe okput irọn̄ kwun̄, mè mfi ebi unan osabe me lek ekito, mè inọ etip ogbogbo ene ekpan̄be me emen kwun̄, ema mêririin̄. 16 Otutuuk ebi ubọọn̄ me agba awaji mênan̄a me ogboon̄ ubọọn̄ kiban̄ isibi ijọn̄, mè iyaka ofọnti inyọn̄ kiban̄ igwook, mè iwọọk ofọnti ekpakpa kiban̄ isan̄a. Ukpook ke ema ebetap ichit lek kubọk ofọnti, mè inisiki ikweek me ijọn̄, mè ikiran mgbọ geelek, mè igwook mbiribọ me lek, mije inu òrọrọ owu. 17 Ema mênenisan̄a okwa ito ikikọt ibak owu ibe:
“ ‘Jei, kpọ ubọk ojijakabe isan̄a kpai,
owu ogwu ebi agba okwaan̄ elukbe me emen!
Jei ama òtaan̄ etip,
ogwu òrere ogwu unye me okwaan̄,
owu mè ebi ìluk me emen kwun̄;
ogwu ukpook kan̄ okitet
otutuuk ebi ìluk me emen!
18 Mgbọ yi, otutuuk ebi agba awaji ekiraran,
me usen owu onan̄abe irọn̄,
ukpook ìtetet achọ geelek òkup me okwaan̄,
mije irọn̄ kwun̄.’
19 “Ogwukaan̄-ene Okumugwem ìtumu ibe ikeyi: Mgbọ nsirọ owu òkana ama òyayat, kubọk ama kecha echi ekalukge me emen; mgbọ nsisa ugwuuk okwaan̄ inimeen̄ owu, mè mun̄ ile isibaak ichit owu, 20 mânenigele owu isiki itap me ama ekwukwu, me etete ebi ìgegele inin̄ udọn̄-ufuun̄, ebi ukot oka mgbọ cha. Mânenirọ inyi owu òluk me irak linyọn̄, me ere òkup kubọk ǹrioon̄ karake akat, owu melek ebi ìwuwuuk lek ikwaan̄ inin̄ udọn̄, inyi ekayaka ìkpọk ìluk me emen kwun̄ ofifi. Mânenirọ inyi linyọn̄ ebi ìkup me ugwem ikaan̄ umin. 21 Mâsa owu irọ inu ukpook, owu òkpoyaka ikup. Mêkiweek owu, ire, kpebeyaka imun̄ owu ofifi. Emi Ogwukaan̄-ene Okumugwem ntumu.”