Uti olik òbebene ichit
31
Me adasi usen, me òso onyan̄ ita, me òso akọp mè acha ge me lek usun̄ akọn̄, Okumugwem onenitumu inyi emi ibe: 2 “Gwun̄ ebilene, tumu nyi ogwu Fero, ogwu ubọọn̄ Ijipiti mè ebi urum akọn̄ kan̄ ibe:“ ‘Ìre ekene ke ebesa umin kwun̄ itọ me lek?
3 Keek-nu Asiria, òbet lek uti olik Lebanọn,
òkaan̄ ujuja agọọk òsasan ichit oron,
mè ijọn̄ọ ichep me inyọn̄;
ibot kan̄ obebene iraka otutuuk uti geelek
ògwogwook inwan̄ ijot lek.
4 Mun̄ orọ inyi itibi ijaan̄,
ogbuuruk orọrọ ibe itibi ijọn̄ọ;
ibot mun̄ ònan̄a me ogbuuruk cha okekigbuk
ikana ere ewopbe ọmọ,
mè ibak okolo kan̄
ire lek otutuuk uti me oron.
5 Eya orọ îtibibe ijọn̄ọ
igak otutuuk uti me oron;
otu agọọk ile kan̄ si owawa,
asasa otu agọọk kan̄ cha otitibi ijijọn̄,
mè ikpọk isan bak me lek owuwa mun̄ ya.
6 Otutuuk unọn òwulu me inyọn̄
enenikinama uwu me lek otu agọọk ile kan̄ cha;
otutuuk anam oron
enenikimaan̄ bọn me irak asasa otu agọọk kan̄;
otutuuk ikpele ido geelek
ekekinu iniluk me irak ogugo kan̄.
7 Ọmọ onenijaan̄ uja me umin kan̄,
mè ike agọọk kan̄ cha ojijọn̄be,
mije, ugwun̄-ijọn̄ kan̄ onin̄be idọk
ire lek owuwa mun̄.
8 Uti olik echi emen uko Awaji
ìkagbegbet me lek kan̄;
agọọk uti alaga inwan̄ ìkare ìkike
me lek agọọk ile kan̄;
kpebesasa si agọọk uti pelen
itọ me lek asasa otu agọọk kan̄;
kpunu uti emen uko Awaji geege
òjaan̄ uja kubọk kan̄.
9 Emi nrọ uti ya ijaan̄,
mè inyi ọmọ owuwa agọọk kan̄ cha;
otutuuk uti òkup me Iden me emen uko Awaji
ekekikaan̄ ejit mba me lek kan̄.
10 “ ‘Eya orọ, Ogwukaan̄-ene Okumugwem ìtumu ibe ikeyi: Mije îjọn̄ọbe ichep me inyọn̄, ibot kan̄ obebene iraka otutuuk uti geelek ògwogwook inwan̄ ijot lek, ọmọ obebene ikigumu lek bak me lek ujọn̄ọ kan̄ ya, 11 eya orọ, nkakana ọmọ itap me ubọk ogwu unye ebi ofifi ido, inyi irọ ọmọ inu ikpọ me lek inu ikpak ọmọ orọbe. Nrieen̄ ọmọ isibi. 12 Ebi ichen, ido ebi ìmimin ikpak me lek igak otutuuk ido geelek, mêcho ọmọ ito, mè ijuuk ọmọ itele. Ilile agọọk kan̄ cha môrurọn̄ọ me inyọn̄ ogoon̄ mè emen iteke; asasa agọọk kan̄ môfafaan̄ igwook me òkpuku mun̄ geelek me lek ijọn̄ ya. Otutuuk ido geelek me linyọn̄ mêsisibi inan̄a me ogugo kan̄, mè iyat itele ọmọ. 13 Otutuuk unọn òwulu me inyọn̄ mênu inisisọn me lek uti ya òrọrọn̄; otutuuk anam oron mênenikiluk me irak agọọk kan̄ cha. 14 Eya orọ, kpunu ofifi uti geege me agba mun̄ òboyaka ikitibi ijọn̄ọ ikeya isa ikigugo lek. Kpunu si geege ibot kan̄ oboyaka ikitibi ibene iraka otutuuk uti geelek ògwogwook inwan̄ ijot lek. Kpunu si ofifi uti geege òkakaan̄ mun̄ me ebon òboyaka ikitibi ijọn̄ọ ikeya, mije, mkpa okup inyi otutuuk kiban̄. Ema otutuuk mêkwaan̄ ifo ejit ijọn̄, ema melek ebilene ebi ìkwakwaan̄ inin̄ udọn̄.
15 “ ‘Ogwukaan̄-ene Okumugwem ìtumu ibe ikeyi: Usen uti ya môkwube ifo ama ekwukwu, mârọ ibe ugwuuk okwaan̄ isa me ufieejit ikana ọmọ ichit. Mâtet mun̄ okolo kan̄ cha ikaan̄, mè irọ ibe owuwa mun̄ kan̄ cha ikeke, mè ikayaka ìgbuk. Mije kan̄, mâtap ugwuuk me otutuuk ogoon̄ Lebanọn, mè irọ ibe otutuuk uti oron ichiaak ita kpai. 16 Mgbọ nsisiki ọmọ itap me ama ekwukwu, me etete ebi ìfofon inin̄ udọn̄, mgbọ ya, ida irọn̄ kan̄ môriki ofifi ido geelek. Otutuuk uti me Iden, mè echi egogobo, òrere echi òjajaan̄ ichit me oron Lebanọn, mè otutuuk echi òkakaan̄ mun̄, ejit kiban̄ mônenisiki me emen ijọn̄. 17 Ema cha ebi ìluluk me irak ogugo kan̄ cha, ebi ìgọgọọk ọmọ ikeke me etete ebi ofifi ido geelek, mêgọgọọk ọmọ ifo ama ekwukwu isi igbaalek ebi ìkwaan̄ me otu oge akọn̄ cha.
18 “ ‘Ìre uti eyi owa me uko Iden ke ebesa uja kwun̄ mè umin kwun̄ itọ me lek? Ire, mêsiki owu si melek uti Iden itap me ejit ijọn̄. Owu môgọgọọk ebi ekafieekge afi mè ebi ìkwakwaan̄ me otu oge akọn̄ igbaan̄ ilaak ibia.
“ ‘Uti ekitumu ikọ chi geelek ibak ìre ogwu Fero, mè otutuuk urum ebi akọn̄ kan̄. Emi Ogwukaan̄-ene Okumugwem ntumu.’ ”