5 “ ‘Owu okaan̄ ochicha me lek ebi Ijeren akarake ukot ikaan̄, mè isa me ikeya ida bọn ebi Ijeren itap me otu oge akọn̄ mgbọ ùrioon̄ otoon̄be ema, mgbọ osusut ijo inu kiban̄ orebe okputut. 6 Eya orọ, kè lek ugwem n̄a, emi Ogwukaan̄-ene Okumugwem ntumu, mâyaka owu inyi ibe efiat eje kwun̄, ifiat eje môlilaba owu. Eyi owu òkacha ifiat eje, ifiat eje obolilaba owu. 7 Mârọ ogoon̄ Seya iyat ikana ukpọk ukpọk. Mârọ inyi ene geege ikaje ìraka me ere ya, mè irọ si ibe ene geege ikayaka ìka ìnu me ere ya. 8 Ebi ìkwakwaan̄ mêtutọmọ ijot inyọn̄ ogoon̄ kwun̄, ebi ìkwaan̄ me otu oge akọn̄ mêrurọn̄ọ ijot inyọn̄ orioon̄ kwun̄ mè emen iteke ijọn̄ kwun̄ mè otutuuk òkpuku mun̄ kwun̄ geelek. 9 Mârọ inyi owu òyat òre mgbọ geelek; ama kwun̄, ene kpebeluk. Owu môneniriọọn̄ ibe ke emi nre Okumugwem.

10 “ ‘Owu òtumu ibe, “Ido iba kechi mè lek ijọn̄ iba kechi môkana echi n̄a, eji mêtet ibọkọ isak,” ubọk geelek ibe ke emi Okumugwem òwa me ere ya nkupbe. 11 Eya orọ, kè lek ugwem n̄a, emi Ogwukaan̄-ene Okumugwem ntumu, mâsulu owu osusut ikpọ me lek unaan̄-ejit mè mba-ejit osabe icha ebi n̄a. Mgbọ nsisulu owu osusut, mâsa me ikeya irọ inyi ebi ene eriọọn̄ emi me etete kiban̄. 12 Mgbọ ya, owu môneniriọọn̄ ibe ke emi Okumugwem nnọ otutuuk ikọ unye chieen̄ cha otumube ibak ogoon̄ Ijeren. Owu òtumu ibe: “Mîjijaka ema isan̄a, mè ikana inyi eji ibe eji echep esan̄a.” 13 Ikeya ke enyi esa otu kinyi ikigugo lek inyi emi, mè ikitumu ogbogbo ikọ ikeme emi. Emi nnọnọ. 14 Ogwukaan̄-ene Okumugwem ìtumu ibe ikeyi: Nsijijaka owu igwook, otutuuk ebi linyọn̄ mênwọọn̄ unwọọn̄. 15 Ike owu onwọọn̄be unwọọn̄ mgbọ ìrot uwu kè Ijeren ojijakabe, ikeya si ke mbarọ owu. Jei ogoon̄ Seya, ebejijijaka owu mè otutuuk Edọm isan̄a kpai. Otutuuk ene mêneniriọọn̄ ibe ke emi nre Okumugwem.’ ”