Osia ìben nriran me ido Ijeren, òrere ido agan̄ inyọn̄, me udun̄ ogwu nriran Emọs. Mgbọ ya ìre mgbọ ufialek okikeme ido ya, sabum enibọkọ Sameria, ama ibot kiban̄. Osia ìben nriran kan̄ me ukot mkpulu kè Jerobuwam, adasi ogwu ubọọn̄ ido Ijeren. Ibot ibot ikọ îtumube ikeme ido ya ìre ikọ ofolek eyi ebi Ijeren ekitọbọ ebum inyi mkpọmfaka, mè ijit Awaji kiban̄ itele.

Osia ìsa ototun̄ ukan̄ kan̄ ijeen̄ ijejeen̄ eyi nriran ya. Awaji ìbe Osia isi ido enenwaan̄ òje oyet, isasa ijeen̄ ibe ke ebi Ijeren mîtele ọmọ, mè ikibubat ikana isi lek owuwa ofifi awaji. Îtumu si ibe Osia ima ogwu nwa òje oyet ya, isasa ijeen̄ ubọk Awaji okpọkpọ ikima ebi Ijeren, ubọk geelek ejitbe ọmọ itele. Awaji îtumu si ibe Osia inyi nsabọn kan̄ erieen̄ echi òkijeen̄ ibe ke ọmọ ìbosusulu ebi Ijeren osusut.

Ikpa yi si îtumu ikọ ofolek mgbaan̄-nchieek eyi Awaji melek ebi Ijeren ekaan̄be, eyi òkido ibe ema agan̄ iba egbe utoon̄-ejit me lek kiban̄. Okumugwem îsun̄ agan̄ eyi kan̄. Ire, ebi Ijeren ekpọkpọ ikichichaka agan̄ eyi kiban̄. Eya orọ, Awaji ìbosusulu ema osusut. Ire, Awaji okpọkpọ ikima si ebi kan̄, mè ichieek use ibe ke ọmọ môtele ijo kiban̄ inyi ema, mè ikpọk igbana ema mgbọ ema isigwu ikom inu me lek kan̄.