Igwugwu ikom môsa ugbana inu
14
Jei ebi Ijeren, ijo inu kinyi îda enyi ito,eya orọ, ìgwu ìkom ìna me lek Okumugwem.
2 Ìkaan̄ ikọ enyi mêtumube,
mè ìgwu ìkom ìna me lek Okumugwem.
Ìtumu ìnyi ọmọ ibe:
“Tele otutuuk ijo inu kiji,
mè bọkọ eji tap me ata ejit,
inyi eji esa otu kiji etọn̄ owu.
3 Asiria ìkpokọt inyan̄a eji;
eji kpebekọp me inyọn̄ inyinya.
Inu eji esabe ubọk irom,
eji kpebeyaka ikpọk igwen ‘awaji kiji,’ ofifi;
mije, îre owu Okumugwem okito ebi kpà-nte njijin.”
4 Okumugwem onenibe,
“Mâgwa ema me itetele ema etelebe emi,
mè ikaan̄ imumechieen̄ eyi
kpunube okputut me lek kiban̄,
mije, unaan̄-ejit n̄a me lek kiban̄ îta.
5 Emi mâkana mbat ewelegwe ireke ijọn̄ inyi ebi Ijeren;
ema mêtitibi kubọk ajakajak lili.
Ugwun̄-ijọn̄ kiban̄ mônin̄ ijọn̄ ijọn̄ọ ere,
kubọk ugwun̄-ijọn̄ uti olik Lebanọn;
6 ayaya otu agọọk kiban̄ môwele isan.
Uja kiban̄ môbet lek uja eyi uti olifu;
môtop olu kubọk olu uti olik Lebanọn.
7 Ebi ene mênu iniluk me irak okwukwek kan̄;
ema mêjaan̄ lek kubọk akpa,
mè itibi ijaan̄ kubọk olik gerep,
mè itaan̄ etip kubọk miin̄ ònan̄a me Lebanọn.
8 Jei ebi Iferem,
keke ke emi nyaka ikpọk ikaan̄ melek mkpọmfaka?
Emi mânọ uriaak kinyi, mè igbala chieen̄ ikpọ enyi;
ǹkikup njijoon̄ njijoon̄ kubọk uti siperes;
emi nkirọ enyi ebi Iferem egwook mfut.”
9 Ogwu òriọọn̄ inu, igobo inu chi itet;
ogwu òriọọn̄ lek, iriọọn̄ inu chi.
Oniin̄ Okumugwem ìre oniin̄ echi òtatat;
ebi ata irọrọ ekije me lek oniin̄ cha.
Ire, ebi ijo irọrọ ekitọtọbọ
ukot irurọn̄ọ me lek oniin̄ cha.