2 Me ekakpọge chieen̄,

ijọn̄ osisisik atalek unye unye,

mije ogwu osat Okumugwem înan̄a me emen inyọn̄ inu me udọn̄-ufuun̄ ya,

mè inikpukpọt ewuuk ya isan̄a,

mè isiki ikweek me inyọn̄.

3 Isi ogwu osat ya ìkimumen kubọk omumen-inyọn̄.

Ikeya si ke ofọnti òkup me lek kan̄ okitana kubọk abalara.

4 Ukpook ogwu osat ya otetet ebi akọn̄ ìkibem ere ya enenen.

Ema ekekiran,

mè ichiaak inye kubọk ebi ìkwakwaan̄.

5 Ogwu osat ya otutumu inyi ebibaan̄ cha ibe,

“Ikafieek owot,

mije,

nriọọn̄ ibe kè enyi ekiweek Jisọs ogwu egonbe ikpan̄ me inyọn̄ uti nkwurieen̄.

6 Ìkakup me ere keyi.

Îjomo me mkpa ike îtumube.

Ìna ìnikpọ ere emaan̄be nkwukwu kan̄,

7 mè ìgwat lek ìje ìsi ìlook ebi udun̄ kan̄ ibe ke îjomo me mkpa;

ke òkije me isi kiban̄ ifo Galili;

ke ere ya ke ema ebesi imun̄ ọmọ.

Mgbọ yi,

emi nra itumu inyi enyi,

inyi enyi eriọọn̄.”

8 Ukpook otetet ebibaan̄ cha.

Ire,

unwọọn̄ ojojot ema ejit.

Ema esasa ekot ekot inan̄a me udọn̄-ufuun̄ ya ilibi ibesa etip ya isi ilook ebi udun̄ kè Jisọs.

9 Mgbọ yaage,

Jisọs okakana isibi me isi kiban̄,

mè itọp ema amọn ibe,

“Esuuk ikup inyi enyi!”

Ema ejeje inin̄ ọmọ lek,

mè igele igwook me ijọn̄,

mè itet ọmọ ebek ukot,

mè itọbọ ebum inyi ọmọ.

10 Jisọs otutumu inyi ema ibe,

“Ikatet ukpook!

Ìsi ìlook ebi ngwan̄ n̄a ibe eje esi Galili,

ke ebibi mêmun̄ emi me ere ya.”

11 Mgbọ ebibaan̄ cha ekilibi me oniin̄,

ebi akọn̄ ìbebem udọn̄ ya eninin̄ emen ama Jeruselem,

mè isi ikpa otutuuk inu cha òrọrọ me ere ya inyi ebi ibot ngwugwa.

12 Ebi ibot ngwugwa cha melek ebi ugane ama etititiin̄,

mè itọt inu ema eberọ,

mè inyi ebi akọn̄ cha owuwa ikpoko,

13 mè itumu inyi ebi akọn̄ cha ibe,

“Ìtumu ìnyi ebi ene ibe ke ebi udun̄ kan̄ enu me eririeen̄ mgbọ ilaak onwọnọbe enyi inichiin̄ nkwukwu kè Jisọs isan̄a me emen udọn̄ ya.

14 Ire ukpatu yi ire utọn̄ ogwu ibot mkpulu,

eji mêchit enyi,

mè itumu ikọ òbosiki ọmọ ejit,

inyi ufialek geege ikakeme enyi.”

15 Ebi akọn̄ cha ebọbọkọ ikpoko ya,

mè irọ ike ife cha etemebe ema.

Mfufuk keyi ònan̄a me otu kiban̄ cha ore eyi òkije ikana me etete ebi Ju mege inire cherekeyi.

16 Akọp mè ebi udun̄ ge kè Jisọs cha enenije isi inyọn̄ ogoon̄ ge òkup me Galili,

ere Jisọs otumube ibe ema esi.

17 Mgbọ ema emun̄be Jisọs,

ema etọtọbọ ebum inyi ọmọ me ere ya.

Ire,

usini kiban̄ kpechieek ibe ke îre ọmọ.

18 Jisọs onenije inu me lek kiban̄,

mè itumu inyi ema ibe,

“Awaji înyi emi unye me lek otutuuk inu geelek òkup me emen inyọn̄,

mè echi òkup me linyọn̄ keyi.

19 Eya orọ,

ìje ìsi ìrọ inyi otutuuk ebi ido geelek me linyọn̄ ekana ebi ìkigọọk emi me udun̄,

mè ìgwook ema mun̄ me erieen̄ eyi Ute,

mè erieen̄ eyi Gwun̄,

mè erieen̄ eyi Ekwukwu Mbuban,

20 mè ìjeen̄ ema inu,

inyi ema ekerọ otutuuk inu geelek ntumube ibe enyi ekerọ.

Me atikọ,

emi mâkup melek kinyi mgbọ geelek,

ire mgbọ linyọn̄ keyi môtabe.”