2 Jisọs onenimun̄ uji iba me atasuk ya ebi mbọm irin̄ esabe ikọp inu,

mè isibi itele isi ikigwọk njin kiban̄ me ere ya.

3 Mije ebi ene ekinwan ọmọ,

isasaba inin̄ emen uji ge me lek uji iba cha,

eyi òrere eyi kè Saimọn,

mè itumu inyi Saimọn ibe ibieen̄ uji ya ida ibọkọ ifo okwaan̄ sọnja inyi ọmọ,

mè isiki ikweek irek me emen uji ya ikitumu ikọ Awaji inyi ebi ife cha ìkekeke me otu inyọn̄.

4 Mgbọ Jisọs otumube ikọ Awaji inyi ife cha isan̄a,

itutumu inyi Saimọn mè ebi uji kan̄ ibe,

“Ìkọp ìfo okwaan̄,

mè ìto njin,

ke enyi mêtet irin̄.”

5 Saimọn ofọfọọk ọmọ ibe,

“Ogwu Nte,

eji mîkwukwulu ibọm mbọm otutuuk eririeen̄ mege iniwele egwe cherekeyi,

eji kpetet kubọk ufuk irin̄ ge.

Ire,

mije owu oyakabe initumu ikeyi,

mâsi igwook njin ma.”

6 Ema enenikọp ida ibọkọ,

mè igwook njin.

Irin̄ oninin̄ igak lek njin ya.

Mgbọ ema ekitaba njin ya,

ulobo irin̄ cha obebene ikigwak njin ya.

7 Ema ebebene ubọk igwen ebi ìkup me uji eyi òkup me agan̄ ijọn̄ ya ibe enetap ubọk enyi ema.

Ife cha ekọkọp inu,

mè initaba usini njin ya itap me uji kiban̄.

Irin̄ cha ojojot uji iba cha,

mè isiki uji kubọk ìborerek.

8 Mgbọ Saimọn Pita omun̄be inu ya òrọrọ,

isisiki isọọk,

mè itet Jisọs me akpatukot,

mè itumu inyi ibe,

“Okaan̄-ene,

je nan̄a emi me lek,

ke emi ìre ogwu ijo.”

9 Saimọn ìtumu ikọ ya,

mije,

ubọk irin̄ ge ya ema etetbe îke ọmọ mè ebi uji kan̄ chieen̄,

10 mè ike si Jemis mè Jọn bọn kè Jebidi ebi ìnitap ubọk inyi ema chieen̄.

Jisọs otutumu inyi Saimọn ibe,

“Katet ukpook,

mije,

bene me mgbọ keyi fo isi,

owu môkitet ene.”

11 Ema ekọkọp uji kiban̄ itoon̄ me ijọn̄,

mè ijuuk irin̄ cha,

mè njin,

mè uji itele,

mè igọọk Jisọs.

12 Jisọs onenije isi ama ge me ere ya.

Me ama ya,

ogwu enerieen̄ ge òkifiak orukan̄ inyakpa òwa.

Mgbọ ogwu enerieen̄ ya omun̄be Jisọs,

itọtọbọ ekpe,

mè iyaka isi ichit me ijọn̄ me isi kè Jisọs,

mè ibeek ọmọ ibe,

“Okaan̄-ene,

ire ineme owu,

owu môkọt igwa emi,

inyi emi ǹtana.”

13 Jisọs onyanyana ubọk ichak ogwu inyakpa ya me lek,

mè itumu ibe,

“Îneme emi.

Lek kwun̄ inye!”

Mgbọ yaage,

inyakpa ya otata isan̄a kpai.

14 Jisọs otataba ogwu enerieen̄ ya ubọk me utọn̄ ibe,

“Kakpa inu yi òrọrọ ìnyi ene geege.

Ire,

je fo,

mè sa lek kwun̄ si jeen̄ ogwu ibot ngwugwa,

mè gwa ngwugwa eyi Mosis onyibe me Ikan ibe ene geelek egwabe inyakpa isan̄a me lek igwa,

inyi ebi ene esa eriọọn̄ ibe ke owu otana.”^a

15 Ire,

etip kè Jisọs otataan̄ ikana ere igak adasi mgbọ.

Ogbogbo ene esisibi inu inigban̄ ikọ kan̄,

mè isa si orukan̄ kiban̄ inu ibe igwa ema.

16 Ire,

Jisọs okekisibi isi ere ònọnọọn̄ isi ikup ikiriaak uriaak.

17 Usen ge,

mgbọ Jisọs okijeen̄ ebi ene inu,

ebi Farisi,

mè ebi ìjeen̄ Ikan ìnan̄a me ama geelek me agan̄ Galili,

mè agan̄ Judia mè ama Jeruselem egọgọọk inu inisiki ikweek irek ikigban̄ ikọ kan̄.

Okumugwem onyinyi si Jisọs unye isasa igwa orukan̄.

18 Usini ebirieen̄ eneniben ogwu enerieen̄ ge òkifiak orukan̄ ngọm me inyọn̄ mkpilaak isa inu,

mè iweek isasa ọmọ iraka inin̄ uwu ya isi imaan̄ me isi kè Jisọs.

19 Ire,

ema kpekọt iraka inin̄ uwu ya mije ebi ene enin̄be inwaan̄ uwu ya.

Ema esasa ene ya inene ifo inyọn̄ uwu ya,

mè ichili nruruk ge me otoon̄-uwu ya,

mè itobo olik me lek mkpilaak ogwu ngọm ya,

mè iben ọmọ me inyọn̄ mkpilaak itap itibi me otu nruruk ya iniyik me etete ebi ene,

me isi kè Jisọs,

me emen uwu ya.

20 Mgbọ Jisọs omun̄be ichechieek kiban̄,

itutumu inyi ene ya ibe,

“Une,

mîtele ijo kwun̄ inyi owu.”

21 Ebi Farisi mè ebi ìjeen̄ Ikan ìkup me ere ya ebebene ikinunuun̄ ibe,

“Ìre ekene ire ogwu,

òkimọnọ lek kan̄ kubọk Awaji ikeyi?

Ìre ekene obokọt itele ijo inyi ene ilọ Awaji gaalek?”

22 Jisọs orọriọọn̄ ekiket kiban̄,

mè inido ema ibe,

“Ìre keke orọ enyi ekikeek ojelek ekiket òkup ikeyi me ejit kinyi?

23 Ìre eyi owa ofet?

Ìre ibebe:

Mîtele ijo kwun̄ inyi owu?

Sà ìre ibebe:

Nan̄a keke,

mè je ije?

24 Mgbọ keyi,

emi mârọ inyi enyi eriọọn̄ ibe ke emi Gwun̄ Ebilene nkaan̄ unye me linyọn̄ keyi itetele ijo inyi ene.”

Itutumu inyi ogwu ngọm ya ibe,

“M̀be owu,

nan̄a keke,

kat mkpilaak kwun̄,

mè je fo.”

25 Mgbọ yaage,

ogwu ngọm ya onanan̄a ikeke me isi otutuuk kiban̄,

mè ikat mkpilaak ya esabe iben ọmọ inu ikaan̄ me ubọk,

mè ije isibi ifo,

mè ikitọn̄ Awaji.

26 Inu ya okeke otutuuk ebi ìkup me ere ya chieen̄ enenen.

Ema ebebene ikitọn̄ Awaji,

mè ikitumu ibe,

“Iyak,

chieen̄ kiji îmun̄ uyeke uyeke inu cherekeyi.”

27 Mgbọ eya orakabe,

Jisọs osisibi me uwu ya,

mè ije ifo isi,

mè imun̄ ogwu enerieen̄ ge ekigwen Libai,

ogwu òkibọkọ otitip ido,

osikibe ikweek irek me uwu ikwaan̄ kan̄.

Jisọs ogwegwen ọmọ ibe,

“Na,

na gọọk emi.”

28 Mgbọ yaage Libai onanan̄a ikeke,

mè ijuuk otutuuk inu òkup me uwu ya itele,

mè igọọk Jisọs.

29 Libai osasa Jisọs isi uwu kan̄,

mè ito ikpele ijọk inyi Jisọs.

Owuwa ebi ìkibọkọ otitip ido mè ebi ofifi ene egọgọọk ema ikweek irek ikirie inorie ya si.

30 Ire,

mgbọ ebi Farisi mè ebi ìjeen̄ Ikan ebi ìrere si ebi Farisi emun̄be ike ebi ife cha ekigọọk Jisọs igbaan̄ irie inorie,

ema edodo ebi udun̄ kè Jisọs ibe,

“Ìre keke orọ enyi ekigọọk ebi otitip ido mè ebi ijo igbaan̄ irie inorie?”

31 Jisọs ofọfọọk ema ibe,

“Ebi lek onyebe kpekiweek ogwu ofia.

Îre ebi lek ikanyege ekiweek ogwu ofia.

32 Eya orọ,

emi ǹkanu inenigwen ebi ata irọrọ.

Ire,

ǹnu inenigwen ebi ijo irọrọ ibe egwu ekom me emen ijo kiban̄.”

33 Usini ebi Farisi mè ebi ìjeen̄ Ikan cha enenitumu inyi Jisọs ibe,

“Ebi udun̄ kè Jọn ògwook mun̄,

mè ebi udun̄ ebi Farisi mîkijin otu,

mè ikiriaak uriaak mgbọ geelek.

Ire,

ebi udun̄ kwun̄ ekpọkpọ ikisa lek kiban̄ inyi irerie mè inwọnwọ.”

34 Jisọs onenitumu inyi ema ibe,

“Me ere ijọk ido-nwa,

ìre ebi unene ogwu òdo nwa mêkọt ijin otu me ere ogwu òdo nwa okupbe melek kiban̄?

In̄-in̄,

eya ìkpokọt irọ!

35 Ire,

mgbọ òkinu,

mgbọ mêsan̄abe ogwu òdo nwa isan̄a me etete kiban̄.

Îre mgbọ keya ke ema ebejin otu.”

36 Jisọs ototo urọk ge inyi ema ibe,

“Kpekikọọk okpọkọ aya ofọnti isa ichim ichit ere ògwagwak me lek oka ofọnti.

Mije,

ire irọ ikeya,

aya ofọnti ya môje me ere ekọọkbe ya igwak.

Okpọkọ aya ofọnti ya si ìkpoje ge melek oka ofọnti ya.

37 Ikeya si,

kpekitap aya miin̄ me emen oka ogbokot ikpa anam,

mije,

unye aya miin̄ ya môrama oka ogbokot ya ibum.

Inenire,

miin̄ me ichep,

ogbokot me ichep.

38 Eya orọ,

ekitap aya miin̄ me emen ayaya ogbokot ikpa anam.

39 Ofifi si,

ene geelek ònwọnwọ oka miin̄ isan̄a,

ìkakiyaka ìweek inwọnwọ aya miin̄,

mije,

ìbobe ke oka miin̄ ya înwọn igak aya miin̄.”