2 Ata etip yi ìbene kubọk Asaya ogwu nriran ogebe ibe ke Awaji ìbe,

4 Ikeyi ke Jọn onikijijen̄e ikana me emen èwê,

ikigwook ene mun̄,

mè ikitumu inyi ebi ene ibe,

“Ìgwu ìkom me ijo kinyi,

inyi egwook enyi mun̄,

mè Awaji itele ijo kinyi inyi enyi.”

5 Ogbogbo ebi ene enanan̄a me agan̄ Judia mè ama Jeruselem isibi isi igban̄ ikọ kè Jọn,

mè ikitumu ijo kiban̄ isibi.

Jọn okekigwook ema mun̄ me okwaan̄ Jodan.

6 Jọn ìkitap ofọnti esabe inwọọn̄ aligọ irom,

mè ikitobo fanti ikpa anam me ebon.

Inorie îkirie ìre akaka ituuk melek njijoon̄ aran̄ akwọọk.

7 Inenikitumu inyi ebi ene ibe,

“Îkaan̄ ogwu mônube me udun̄ n̄a.

Ene ya îmin igak emi enenen.

Emi ǹkasoon̄ ogwu òbosiki isọọk itọn̄ọ olik ikpukot ene ya.

8 Emi ǹkisa mun̄ ikike igwook enyi mun̄,

ire,

ene ya ìbosa Ekwukwu Mbuban igwook enyi mun̄.”

9 Sọnja mgbọ iraraka,

Jisọs onanan̄a me Najeret me agan̄ Galili inu.

Jọn onenigwook ọmọ mun̄ me okwaan̄ Jodan.

10 Mgbọ yaage Jisọs onan̄abe me emen mun̄ iwook inene ijọn̄,

imumun̄ isinyọn̄ okigwuku ibook,

mè imun̄ Ekwukwu Mbuban okinu kubọk ekerekwukwu,

mè inisọọk ọmọ me lek.

11 Ida ge onanan̄a me inyọn̄ ikitumu ibe,

“Owu ore Gwun̄ n̄a ogwu mmabe.

Ejit n̄a îbele me lek kwun̄ enenen.”

12 Mgbọ yaage,

Ekwukwu Mbuban osasa Jisọs ifo emen èwê,

13 ere îkupbe akọp usen ini,

Yọk okekitọ ọmọ ikpọ.

Ebi kè anam oron si me ere ya ekupbe.

Ebi osat Awaji enunu inisi ikwaan̄ inyi ọmọ.

14 Mgbọ etetbe Jọn itap me mkpọn,

Jisọs osisi Galili,

mè ikilook ata etip eyi Awaji,

15 mè ikibe,

“Mgbọ îso!

Mkpulu eyi Awaji îkup mgbet!

Ìgwu ìkom me ijo kinyi,

mè ìchieek me lek ata etip yi.”

16 Usen ge,

mgbọ Jisọs okije me agba okwaan̄ oyô Galili,

inenimun̄ ebi mbọm irin̄,

ene iba,

Saimọn mè ogwu ngwan̄ Anduru,

ekitọp njin,

17 mè igwen ema ibe,

“Ìna,

ìnigọọk emi,

ke mârọ inyi enyi ekana ebi ìkibọm mbọm itet-ene.”

18 Mgbọ yaage,

ema etetele njin kiban̄ mè igọọk ọmọ ije.

19 Mgbọ înan̄abe me ere ya ije ifo isi sọnja,

ikpọkpọk imun̄ si ofifi ngwan̄ iba,

Jemis melek Jọn,

bọn kè Jebidi,

melek nte kiban̄ ekupbe me emen uji ikinama njin kiban̄.

20 Mgbọ yaage îmun̄be ema,

igwegwen ema si.

Ema etetele nte kiban̄ Jebidi melek ebi uji me emen uji,

mè isibi igọọk Jisọs.

21 Ema enenije isi ire ama ekigwen Kapanọm.

Mgbọ Usen Mbuban orebe,

Jisọs ojeje isi uwu ntitiin̄,

mè ibene ikijeen̄ ebi ene ikọ Awaji.

22 Inu îjeen̄be okeke ebi ene chieen̄ enenen,

mije,

ìkajeen̄ inu ya kubọk ebi ìjeen̄ Ikan ekijeen̄.

Ire,

ọmọ înye otu ikijeen̄ ikọ Awaji ya kubọk ogwukaan̄ ikọ ya me lek kan̄.

23 Me mgbọ ya,

ogwu enerieen̄ ge ijo erumun̄ okupbe me emen òwa me emen uwu ntitiin̄ ya.

Ogwu enerieen̄ yi otataan̄ ukpo itumu inyi Jisọs ibe,

24 “Ìre keke ke òkiweek eji me lek,

owu Jisọs ogwu Najeret?

Ìre ònu inenijijaka eji?

Nriọọn̄ owu ijaan̄ lek.

Owu ìre Ogwu Òkup Mbuban,

ogwu Awaji oriabe inu.”

25 Jisọs ogagana inyi ijo erumun̄ ya ibe,

“Chit otu!

Nan̄a sibi me emen gwun̄ enerieen̄ yi!”

26 Ijo erumun̄ ya obeben gwun̄ enerieen̄ ya itọbọ me ijọn̄.

Ogwu enerieen̄ ya okekijen.

Itataan̄ ukpo,

mè inan̄a me emen kan̄ isibi.

27 Inu yi okwukwu ebi ene lek enenen.

Ema ekekitumu ibe,

“Iyak,

ìre keke ire eyi?

Aya ijejeen̄ keyi,

mè unye keyi ye?

Ene yi ìkitọ ikọ inyi ijo erumun̄,

mè ijo erumun̄ ogban̄,

mè osiki ibot onyi.”

28 Mgbọ yaage,

etip kè Jisọs otataan̄ ikana otutuuk ama òkup me Galili.

29 Jisọs onenisa Jemis mè Jọn mè otutuuk ebi udun̄ kan̄ inan̄a me uwu ntitiin̄ ya isibi,

mè iraka isi ge isi uwu ebi Saimọn melek Anduru.

30 Mgbọ ema erebe uwu ya,

nga nwa kè Saimọn ìlalaak me inyọn̄ mkpilaak,

mije,

lek kan̄ ìkanye,

ukan̄ obak ọmọ me lek.

Mgbọ yaage Jisọs onin̄be uwu ya,

ebi ene etutumu inyi ibe ke lek ogwu enenwaan̄ ya ìkanye.

31 Jisọs ojeje inin̄,

mè itet ọmọ ubọk,

mè itap ubọk ibene ọmọ igwuun̄.

Ukan̄ ya otetele ọmọ,

lek kan̄ onyenye.

Inenitem inorie inyi ema.

32 Me otu ikakwun̄,

mgbọ ura onimbe,

ebi ene esasa ebi orukan̄ mè ebi ijo erumun̄ okupbe me emen ijet Jisọs.

33 Ogbogbo ebi ama Kapanọm ya esisibi inijot isi oyet uwu ya.

34 Jisọs ogwagwa otutuuk esese chieen̄ orukan̄ kiban̄ isan̄a,

mè irieen̄ owuwa ijo erumun̄ isibi me emen kiban̄.

Ìkachieek ijo erumun̄ cha esan̄a amọn,

mije,

ema mîriọọn̄ ogwu ọmọ orebe.

35 Me ofit iwele kan̄,

me agan̄ egwe,

Jisọs onanan̄a ikeke me ilaak,

mè ije isibi me emen ama Kapanọm ifo ere ònọnọọn̄,

isi ikup ikiriaak uriaak.

36 Saimọn mè ebi melek kan̄ enanan̄a isibi isi ikiweek ọmọ.

37 Mgbọ emun̄be ọmọ,

enenitumu inyi ọmọ ibe,

“Otutuuk ene mêkiweek owu.”

38 Ire,

Jisọs ofọfọọk ema ibe,

“Eji eneje esi ofifi ama òkukup ikana ere yi,

inyi ǹsi ǹtumu ikọ Awaji si me ama cha.

Îre mije keyi ke nnu linyọn̄.”

39 Sa me ikeyi ke îje ikana otutuuk ama me Galili ikitumu ikọ Awaji me emen uwu ntitiin̄ kiban̄,

mè ikirieen̄ ijo erumun̄ isibi me emen ebi ene.

40 Ene ge òkifiak orukan̄ inyakpa onunu,

mè initọbọ ekpe me isi kè Jisọs,

mè ibeek ọmọ ibe,

“Ire ineme owu,

owu môkọt igwa emi,

inyi emi ǹtana.”

41 Njijin kan̄ otetet Jisọs,

inyanyana ubọk itet ọmọ me lek,

mè ibe,

“Îneme emi.

Lek kwun̄ inye!”

42 Mgbọ yaage orukan̄ kan̄ otata,

lek kan̄ onyenye,

ọmọ otatana.

43 Jisọs oraria ọmọ ibe ifo,

mè iriọọn̄ ubọk itaba ọmọ ubọk me utọn̄ ibe,

44 “Kakpa inu yi geege ìnyi ene geege.

Je si sa lek kwun̄ jeen̄ ogwu ngwugwa ikpọ,

mè gwa ngwugwa eyi Mosis onyibe me Ikan ibe ene geelek egwabe inyakpa isan̄a me lek igwa,

inyi ebi ene esa eriọọn̄ ibe ke mîgwa owu;

ke owu otana.”

45 Ire,

ogwu enerieen̄ ya osasa ukpatu igwagwa kan̄ ya isi ikikpa ikana otutuuk ere.

Mije keyi,

Jisọs ìkayaka ìkọt ìkije me isi ene ìnin̄ ama,

ìyaka ikije ikana me ere ene ekalukge.

Ebi ene mîra ikinan̄a me ere geelek ikisibi si igọọk ọmọ.