Jọn ògwook mun̄ înu ininen̄e oniin̄ isun̄
3
Me emen mgbọ ya,
Jọn ògwook mun̄ onunu,
mè ikijijen̄e ikana me emen èwê òkup me Judia ikilook ebi ene ata etip ibe,
2 “Ìgwu ìkom me ijo kinyi,
mije,
mkpulu eyi Awaji îkup mgbet.”
3 Jọn ògwook mun̄ yi ke Asaya oben nriran ofolek mgbọ îtumube ibe,
“Ida ene ge òkitaan̄ ukpo me emen èwê ibe,
‘Ìnen̄e oniin̄ ìsun̄ ìban Okumugwem,
mè ìrọ oniin̄ òtatat ìnyi ọmọ.’ ”a
4 Ofọnti Jọn okitap,
esa inwọọn̄ aligọ irom.
Fanti îkitobo me ebon ìre fanti ikpa anam.
Inorie kan̄ ìre akaka ituuk mè njijoon̄ aran̄ akwọọk.
5 Ebi ene ekekigbọọk inan̄a me Jeruselem,
mè otutuuk ido Judia,
mè otutuuk ama òkup me agba okwaan̄ Jodan inu me lek kè Jọn,
6 mè ikifuk ijo kiban̄ isibi.
Jọn okekigwook ema mun̄ me okwaan̄ Jodan.
7 Ire,
mgbọ Jọn omun̄be owuwa ebi Farisi mè ebi Sadusi ekinu me lek kan̄ ibenigọọk igwook mun̄,
itutumu inyi ema ibe,
“Enyi ijo ulu kechi!
Ìre ekene oteme enyi ibe enyi elibi enwọnọ uyọt uyọt unaan̄-ejit Awaji eyi òbonunu?
8 Ìkirọ ata irọrọ eyi òbokijeen̄ ibe ke enyi mîgwu ikom me atikọ.
9 Ikakpọkpọ ìkup ìkitumu ìbe ke enyi ìre bọn kè Ebereyam,
mè ìkikeek ibe ke enyi mêsa me ikeyi inwọnọ osusut Awaji.
Ǹkitumu inyi enyi ibe ke Awaji môkọt irọ inyi ewuuk chi òkup me ere yi ikana bọn inyi Ebereyam.
10 Mgbọ yi,
mîto otuban itele me ebon uti geelek.
Ire ikaan̄ uti ikatoge ata mfut,
mêcho ito,
mè iben itọp itap me emen ukan̄.
11 “Emi ǹkisa mun̄ ikike igwook enyi mun̄,
isasa ijeen̄ ibe ke enyi mîgwu ikom.
Ire,
îkaan̄ ene ge òbonu me udun̄ n̄a.
Ene ya îmin igak emi enenen ire lek emi ǹkagbe ogwu òbokiben ikpukot ene ya.
Ene ya ìbosa Ekwukwu Mbuban mè ukan̄ igwook enyi mun̄.
12 Ofifi si,
ene ya îkaan̄ ugen̄ sanasana otu eyi ìbosa igen̄ mfufe isan̄a me lek akpa,
mè ikpulu akpa cha isi itap me emen uwu isun̄-akpa kan̄,
mè ikpulu mfufe cha isi iwọp me emen ukan̄ eyi ìkakiniin̄.”
Igwook-mun̄ kè Jisọs
13 Jisọs oneninan̄a me agan̄ Galili isi agba okwaan̄ Jodan,
inyi Jọn igwook ọmọ mun̄.
14 Ire,
Jọn oweweek ikpukput ọmọ,
mè itumu inyi ọmọ ibe,
“Owu ore ogwu mogwook emi mun̄.
Owu òyaka ìjeje ininu me lek n̄a ibe emi ǹnengwook owu mun̄?”
15 Jisọs ofọfọọk Jọn ibe,
“Tele inyi ikup ikeya mgbọ keyi,
mije,
îgbe ibe owu ògwook emi mun̄,
inyi eji esa me oniin̄ keyi erọ otutuuk inu eyi Awaji okiweek eso.”
Jọn onenichieek,
mè igwook ọmọ mun̄.
16 Mgbọ yaage Jọn ogwookbe Jisọs mun̄ isan̄a,
Jisọs onan̄abe me emen mun̄ okwaan̄ Jodan ya iwook inene ijọn̄,
isinyọn̄ ochichili,
imumun̄ Ekwukwu Awaji okinan̄a me isinyọn̄ iwulu kubọk ekerekwukwu isiki inu,
mè inisọọk me lek kan̄.
17 Ida ge onanan̄a me emen inyọn̄ ikitumu ibe,
“Ogwugwu ore gwun̄ n̄a enerieen̄,
ogwu mmabe.
Emi mbele ejit enenen me lek kan̄.”