On tlatlachalistli kampa Ezequiel okintak sempoajli uan makuijli tekiuajkej yejuan xompayejyejkej
11
Kemaj ipoder Dios onechkuiteu niman onechuikak hasta itech iueyitsakuijlou on iueyitiopan toTEKO, itech on ueyitsakuijlotl yejuan nokaua kampaka ikisayan tonaltsintli. Niman ompa itech on ueyitsakuijlotl, nemiyaj sempoajli uan makuijli tlakamej yejuan uejueyixtikatkaj. Ompa teuan nemiya Jaazanías, ikoneu Azur, niman Pelatías, ikoneu Benaías, yejuan tlayekankej katkaj intech on israelitas.2 Niman toTEKO onechijlij: “Tejua tlaltikpaktlakatl, in tlakamej yejuamej on yejuan kinejnemilijtokej ken kichiuaskej xompayejyeualistli, niman no, xkuajli tlinon kinmijijliaj ma kichiuakan on chanejkej Jerusalén. 3 Yejuamej kijtouaj: 'Saniman oksejpa ma tikinchijchiuakan tokaluan. Ijki tej, ipan in ueyikalpan toyolika tinemiskej pampa xitlaj techpajsolos, no kenon nakatl yejuan kuajli yejtikaj ipan on teposkontli.’ 4 Yejua ika tej, pampa ijkon tlajtlajtouaj, tejua Ezequiel xtiotlajto ikan notokatsin; xkinmijli tlinon xkuajli impan nochiuas.”
5 Kemaj iespíritu toTEKO ouajlaj nopan niman onechnauatij para ma nikijto ika yejua ijkin kijtoua: "Nemejuamej israelitas, nejua kuajli nikmatstikaj tlinon nenkijtouaj niman tlinon nenkinemiliaj. 6 Nemejuamej sanoyej yonentemiktijkej ipan in ueyikalpan, niman yonenkintemiltijkej on kalpanojtin ikan mikatsitsimej. 7 Yejua ika, nejua nemoTEKO Dios, ika tlen melauak nemechijlia: Jerusalén yes ken sen teposkontli kampa kejeuaj nakatl, pero on nakatl xnenmejuamej nenyeskej, yej yeskej on mikatsitsimej yejuan nemejuamej onenkinmiktijkej, niman nemejuamej nemechkixtis ipan on teposkontli kampa nenkinemiliaj kuajli nenyejtokej. 8 Nejua nemechajtitlanilis on nouijsokilistli yejuan nemejuamej sanoyej nenkimakajsij. ¡Nejua akin ninemoTEKO Dios, ijki yonikijtoj nochiuas! 9 Nejua melauak nemechcastigaros ken yonemechijlij: Nemechkixtis ipan in ueyikalpan Jerusalén, niman nemechtemakas intech on yejuan xchanejkej para ma mechajsikan niman ma mechtlajyouiltikan ken yejuamej kinekiskej. Ijki nemechcastigaros ken mechmelaua. 10 Mechmiktiskej ipan nouijsokilistli. Nochiuiyan, hasta itlajtlankan in país Israel, nikuajkis on castigo. Niman ijkuakon, nenkimatiskej ika nejua ninemoTEKO. 11 Jerusalén xuelis yes ken sen teposkontli kampa nemejuamej uelis nenmomanauiskej ken sen teposkontli kejeua nakatl. Niman nochiuiyan, hasta itlajtlankan in país Israel, nemechcastigaros. 12 Niman ijkuakon, nenkimatiskej ika nejua ninemoTEKO. Ijkon nemopan nochiuas pampa xonenkitlakamatkej notlanauatiluan nion noleyes, yej onenmouikakej ken nouikaj on naciones yejuan onokej nemoyeualkan.”
13 Niman chika nejua Ezequiel nitiotlajtouaya ikan itokatsin toTEKO, Pelatías, ikoneu Benaías, ouets ipan tlajli niman omik. Kemaj nejua oninotlakuantelkets niman oninopachoj hasta ipan tlajli, niman ijkin chikauak oninoueyikatsajtsilij: “¡Ay noTEKO! ¿Tlamis tikinmiktis on achijtsitsimej israelitas yejuan nokauaj?”
ToTEKO okijtoj ika on israelitas yejuan nomanauiskej oksejpa nokuepaskej ipan impaís
14 Kemaj toTEKO onechnots, niman onechijlij: 15 “Tejua tlaltikpaktlakatl, on israelitas yejuan sanken nemij Jerusalén, ijkin kijtouaj de tejua niman de on mochanejkauan israelitas yejuan okinuajuikakej nikan Babilonia. Kijtouaj: ‘¡Yejuamej nemij uejka de toTEKO, niman aman in país san tejuamej toyaxka yes!’ 16 Yejua ika tej, on israelitas yejuan nemij Babilonia xkinmijli ika nejua nemoTEKO Dios ijkin nikijtoua: 'Maski nejua onikinkixtij ipan imimpaís, niman onikinuikak ipan oksekimej naciones, xuejkauis ika ompa nemiskej. Niman ipan on naciones nikinmanauis.' 17 No xkinmijli ika ijkin nikijtoua: 'Nejua nemoTEKO Dios nikinkixtis ipan on naciones kampa onikinchajchayau, niman oksejpa nikinsentlalis san sekan niman oksejpa nikinmakas on país Israel. 18 Niman ijkuak nokuepaskej ipan imimpaís, ompa kimpopoloskej nochimej on tetlajyelojkej ídolos yejuan kinmauistiliaj on israelitas yejuan ompa onokajkej, niman kiteltiskej nochi on tlen sanoyej tetlajyeloj kichiuaj ompa. 19 Nejua nikinkixtilis on iminyojlo yejuan sanoyej chikauak kenon tetl, niman nikinmakas iminyojlo yejuan yemanki, niman nikinmakas yenkuik intlamachilis para uelis nechtlakamatiskej. 20 Ijki tej, kintlakamatiskej notlanauatiluan niman noleyes. Niman ijki, yejuamej notlapejpeniluan yeskej, niman nejua niiminDios yes. 21 Pero on yejuan xkinekiskej kajkauaskej ika kinmauistiliaj iminídolos, niman sanken kichiuaskej on tlen sanoyej tetlajyeloj, nejua nikincastigaros ipampa nochi on tlen sanoyej xkuajli kichiuaj. ¡Nejua akin niiminTEKO Dios, ijki yonikijtoj nochiuas!' ”
Iueyilis toTEKO kitlalkauiya Jerusalén
22 Kemaj on querubines okintlapojkej inmastlakapaluan para opatlankej, niman on ruedas iminuan oyajkej. Niman on petlankatlauijli yejuan kixnextia on Dios de Israel ikan iueyilis, yejuan onkatka inkuatipan on querubines, 23 onokuiteu niman okitlalkauij on ueyikalpan, niman onotlalito ikuapan on tepetl yejuan onkaj kampaka ikisayan tonaltsintli de on ueyikalpan. 24 Kemaj ipoder Dios onechkuiteu niman oksejpa onechuikak ne Babilonia, kampa nemiyaj on oksekimej israelitas yejuan no ompa okinuikakej ken esclavos. Ijki tej, otlan nikita on tlatlachalistli ken notemikpan yejuan iespíritu Dios onechititij. 25 Niman nejua onikintlajtlajtouilij on israelitas yejuan nemiyaj ne Babilonia, nochi on tlen toTEKO onechititij ipan on tlatlachalistli ken notemikpan.